ನಾನು ಆಮ್​ ಆದ್ಮಿ ಪಕ್ಷದವನು ಎಂದು ಒಪ್ಪಿಕೊಂಡಿದ್ದ ಶಾಹಿನ್​ಬಾಗ್​ ಶೂಟರ್​; ಆದರೆ ಆತನ ತಂದೆ ಹೇಳಿದ್ದೇ ಬೇರೆ...

ನವದೆಹಲಿ: ಶಾಹೀನ್​ ಬಾಗ್​ನಲ್ಲಿ ಸಿಎಎ ವಿರೋಧಿ ಪ್ರತಿಭಟನೆ ನಡೆಸುತ್ತಿರುವವರ ಮೇಲೆ ಇತ್ತೀಚೆಗೆ ಕಪಿಲ್ ಗುಜ್ಜಾರ್​ ಎಂಬಾತ ಗುಂಡು ಹಾರಿಸಿದ್ದ.

ಜಾಮಿಯಾ ಮಿಲಿಯಾ ಇಸ್ಲಾಮಿಯಾ ಯೂನಿವರ್ಸಿಟಿ ಬಳಿ ಅಪ್ರಾಪ್ತನೋರ್ವ ಗುಂಡುಹಾರಿಸಿದ ಎರಡೇ ದಿನದಲ್ಲಿ ಈ ಘಟನೆ ನಡೆದಿತ್ತು.

ಶಾಹೀನ್​ಬಾಗ್​ನಲ್ಲಿ ಫೈರಿಂಗ್ ಮಾಡಿದ ಕಪಿಲ್​ ಗುಜ್ಜರ್​ ಆಮ್​ ಆದ್ಮಿ ಪಕ್ಷಕ್ಕೆ ಸೇರಿದವನು ಎನ್ನಲಾಗಿತ್ತು. ಅಲ್ಲದೆ ಆಪ್​ನ ಟೊಪ್ಪಿ ಹಾಕಿಕೊಂಡು, ಕೆಲವು ಸದಸ್ಯರ ಜತೆ ಇರುವ ಫೋಟೋ ಕೂಡ ವೈರಲ್ ಆಗಿತ್ತು. ಆತನೇ ತಾನು ಆಮ್​ ಆದ್ಮಿ ಪಕ್ಷದವನು ಎಂದು ಪೊಲೀಸರೆದುರು ಒಪ್ಪಿಕೊಂಡಿದ್ದ.

ಆದರೆ ನಿನ್ನೆ ಕಪಿಲ್​ ಗುಜ್ಜರ್​ ಕುಟುಂಬ ಅದನ್ನು ಅಲ್ಲಗಳೆದಿತ್ತು. ಆತನ ಸಹೋದರ ಮಾಧ್ಯಮಗಳೊಂದಿಗೆ ಮಾತನಾಡುತ್ತ, ನಾವ್ಯಾರೂ ಯಾವುದೇ ಪಕ್ಷಕ್ಕೂ ಸೇರಿದವರಲ್ಲ. ಕಪಿಲ್​ ಕೂಡ ಯಾವುದೇ ಪಕ್ಷಕ್ಕೆ ಸೇರಿಲ್ಲ ಎಂದಿದ್ದರು.

ಕಳೆದ ಲೋಕಸಭಾ ಚುನಾವಣೆ ವೇಳೆಗೆ ಪ್ರಚಾರಕ್ಕೆ ಬಂದ ಆಮ್​ ಆದ್ಮಿ ಮುಖಂಡರು, ಕಾರ್ಯಕರ್ತರು ನಮಗೆಲ್ಲ ಟೊಪ್ಪಿ ಕೊಟ್ಟಿದ್ದರು. ಅದನ್ನು ಹಾಕಿಕೊಂಡು ಅವರೊಟ್ಟಿಗೆ ನಿಂತು ಫೋಟೋ ತೆಗೆಸಿಕೊಂಡಿದ್ದೇವೆ ಅಷ್ಟೇ ಎಂದು ಹೇಳಿದ್ದರು.

ಆದರೆ ಅದರ ಬೆನ್ನಲ್ಲೇ ಕಪಿಲ್​ ಗುಜ್ಜರ್​ ತಂದೆ ಹೊಸ ವಿಚಾರವನ್ನು ತಿಳಿಸಿದ್ದಾರೆ. ನನ್ನ ಮಗ ಪ್ರಧಾನಿ ನರೇಂದ್ರ ಮೋದಿ ಹಾಗೂ ಗೃಹ ಸಚಿವ ಅಮಿತ್​ ಷಾ ಅವರ ಕಟ್ಟಾ ಅನುಯಾಯಿ ಎಂದು ಹೇಳಿದ್ದಾರೆ. ಕಪಿಲ್​ ಯಾವಾಗಲೂ ಹಿಂದುತ್ವ, ಹಿಂದು ರಾಷ್ಟ್ರದ ಬಗ್ಗೆ ಮಾತನಾಡುತ್ತಿರುತ್ತಾನೆ ಎಂದಿದ್ದಾರೆ.

ಅಲ್ಲದೆ ಶಾಹೀನ್​ ಬಾಗ್​ ಪ್ರತಿಭಟನೆಯಿಂದ ರಸ್ತೆಗಳು ಬ್ಲಾಕ್​ ಆಗಿದ್ದವು. ನನ್ನ ಮಗನೂ ಸೇರಿ ಹಲವರಿಗೆ ತೊಂದರೆಯಾಗಿತ್ತು. ಒಂದು ತಾಸಿನಲ್ಲಿ ಹೋಗಬಹುದಾದ ಜಾಗಕ್ಕೆ ತಲುಪಲು ನಾಲ್ಕು ಗಂಟೆ ಬೇಕಾಗುತ್ತಿತ್ತು. ಇದು ಆತನನ್ನು ಕೆರಳಿಸಿರಬಹುದು ಎಂದು ಕಪಿಲ್​ ಗುಜ್ಜರ್​ ತಂದೆ ಹೇಳಿದ್ದಾರೆ.(ಏಜೆನ್ಸೀಸ್​)