VIDEO| 70 ದಿನದಿಂದ ಬಂದ್​ ಆಗಿದ್ದ ರಸ್ತೆ ಶಾಹೀನ್​ ಬಾಗ್ ಪ್ರತಿಭಟನಾಕಾರರಿಂದಲೇ ತೆರವು: ಸಂಭ್ರಮಾಚರಣೆ

ನವದೆಹಲಿ: ರಾಷ್ಟ್ರ ರಾಜಧಾನಿ ದೆಹಲಿಯಿಂದ ನೋಯ್ಡಾಗೆ ಪ್ರಯಾಣ ಬೆಳೆಸುವ ಪ್ರಯಾಣಿಕರು ಸದ್ಯ ನೆಮ್ಮದಿಯ ನಿಟ್ಟುಸಿರು ಬಿಡುವಂತಾಗಿದೆ. ಪೌರತ್ವ ತಿದ್ದುಪಡಿ ಕಾಯ್ದೆ ವಿರೋಧಿ ಪ್ರತಿಭಟನೆಯಿಂದಾಗಿ ಕಳೆದ 70 ದಿನಗಳಿಂದ ಪ್ರತಿಭಟನಾಕಾರರದಿಂದ ಬ್ಲಾಕ್​ ಆಗಿದ್ದ ರಸ್ತೆಯನ್ನು ಶನಿವಾರ ಮತ್ತೆ ತೆರೆಯಲಾಗಿದೆ.

ಶಾಹೀನ್​ ಬಾಗ್​​ ರಸ್ತೆಯು ದೆಹಲಿಯ ಜಾಮಿಯಾದಿಂದ ಉತ್ತರ ಪ್ರದೇಶದ ನೋಯ್ಡಾ ಮತ್ತು ಹರಿಯಾಣದ ಫರೀದಾಬಾದ್​ಗೆ ಸಂಪರ್ಕ ಕೊಂಡಿಯಾಗಿತ್ತು. ಆದರೆ, ಸಿಎಎ ವಿರೋಧಿ ಪ್ರತಿಭಟನೆಯಿಂದಾಗಿ ರಸ್ತೆಯನ್ನು ಬ್ಲಾಕ್​ ಮಾಡಲಾಗಿತ್ತು. ಇದೀಗ ಮತ್ತೆ ತೆರೆದಿರುವುದು ಪ್ರಯಾಣಿಕರಿಗೆ ಖುಷಿಯ ವಿಚಾರವಾಗಿದೆ. ಪ್ರತಿಭಟನೆ ಆರಂಭವಾದ ದಿನದಿಂದಲೂ ಶಾಹೀನ್​ ಬಾಘ್​ನಲ್ಲಿ ದೆಹಲಿ ಪೊಲೀಸ್​ ಸಿಬ್ಬಂದಿಯನ್ನು ನಿಯೋಜಿಸಲಾಗಿತ್ತು.

ಮೂಲಗಳ ಪ್ರಕಾರ ಶಾಹೀನ್​ ಬಾಗ್​ ಪ್ರತಿಭಟನಾಕಾರರು ರಸ್ತೆಯನ್ನು ತೆರವುಗೊಳಿಸುವ ವಿಚಾರವಾಗಿ ದೆಹಲಿ ಪೊಲೀಸರೊಂದಿಗೆ ಯಾವುದೇ ಮಾತುಕತೆ ನಡೆಸಿಲ್ಲ. ಇತ್ತೀಚಿನ ಬೆಳವಣಿಗೆ ಬಗ್ಗೆ ನಮಗೂ ಮಾಹಿತಿ ಇಲ್ಲವೆಂದು ದೆಹಲಿ ಪೊಲೀಸರು ಕೂಡ ಹೇಳಿದ್ದಾರೆ. ಆದರೂ ಶಾಹೀನ್​ ಬಾಗ್​ ಪ್ರತಿಭಟನಾಕಾರರು ತೆಗೆದುಕೊಂಡು ನಿರ್ಧಾರವನ್ನು ಪೊಲೀಸರು ಒಪ್ಪಿಕೊಂಡಿದ್ದಾರೆ.

ಇನ್ನೊಂದೆಡೆ ಪ್ರತಿಭಟನಾಕಾರರು ನೋಯ್ಡಾ-ಕಲಿಂದಿ ಕುಂಜ್​ ಮಾರ್ಗ ನಂ.9(ಓಕ್ಲಾ ರಸ್ತೆ) ಅನ್ನು ಸಂಚಾರಕ್ಕೆ ಮುಕ್ತ ಮಾಡಿದ್ದಕ್ಕೆ ಸ್ಥಳದಲ್ಲಿ ಸಂಭ್ರಮಾಚರಣೆಯು ನಡೆದಿದೆ.

ಇದಕ್ಕೂ ಮುನ್ನಾ ಪ್ರತಿಭಟನಾಕಾರರ ಒಂದು ಗುಂಪು ರಸ್ತೆಯನ್ನು ಓಪನ್​ ಮಾಡಿದ್ದರು. ಆದರೆ, ಮತ್ತೆ ಇನ್ನೊಂದು ಗುಂಪಿನಿಂದ ಮುಚ್ಚಲಾಗಿತ್ತು. ಮತ್ತೆ ಒಂದು ಗುಂಪು ರಸ್ತೆಯನ್ನು ಮರು ತೆರೆದರು. ಆದರೆ, ಇದಕ್ಕೆ ಎಲ್ಲರ ಒಪ್ಪಿಗೆ ಇದೆಯೇ ಎಂಬುದು ಈವರೆಗೂ ಸ್ಪಷ್ಟವಾಗಿಲ್ಲ ಎಂದು ದೆಹಲಿಯ ಆಗ್ನೇಯ ಡಿಸಿಪಿ ತಿಳಿಸಿದ್ದಾರೆ.

ಸಿಎಎ ವಿರೋಧಿಸಿ ಪ್ರಾಥಮಿಕವಾಗಿ ಸ್ಥಳೀಯ ಮಹಿಳೆಯರು ಡಿಸೆಂಬರ್​ ಮಧ್ಯ ಭಾಗದಲ್ಲಿ ಶಾಹೀನ್​ ಬಾಗ್​ನಲ್ಲಿ ಪ್ರತಿಭಟನೆ ಆರಂಭಿಸಿದರು. ಇದು ರಸ್ತೆ ಬ್ಲಾಕ್​ಗೆ ಕಾರಣವಾಗಿ, ಆಗ್ನೇಯ ದೆಹಲಿ ಪ್ರದೇಶಗಳಿಂದ ನೋಯ್ಡಾ ಸಂಪರ್ಕಿಸುವ ರಸ್ತೆ ಮುಚ್ಚಲಾಗಿತ್ತು. ಇದರಿಂದ ದಿನನಿತ್ಯದ ಪ್ರಯಾಣಿಕರಿಗೆ ಬಹಳಷ್ಟು ತೊಂದರೆಯಾಗಿತ್ತು. ಇದೀಗ ಮತ್ತೆ ತೆರೆದಿರುವುದು ಸಾಕಷ್ಟು ಮಂದಿ ಸಂತಸದ ವಿಚಾರವಾಗಿದೆ. (ಏಜೆನ್ಸೀಸ್​)