ಕಾಲಮಾನಕ್ಕೆ ತಕ್ಕಂತೆ ಸಂಬಳ, ಭತ್ಯೆಗಳು ಪರಿಷ್ಕರಣೆ ಆಗಬೇಕು ಎಂಬುದರಲ್ಲಿ ಎರಡು ಮಾತಿಲ್ಲ. ಇದರಿಂದ ಸರ್ಕಾರಿ ನೌಕರರು ಮತ್ತು ಅವರನ್ನು ಅವಲಂಬಿಸಿರುವವರ ಆರ್ಥಿಕ ಪರಿಸ್ಥಿತಿ ಕೊಂಚ ಸುಧಾರಿಸುತ್ತದೆ. ಆದರೆ, ಸಂಬಳ, ಸೌಲಭ್ಯದ ಹೆಚ್ಚಳದ ಜತೆಗೆ ಕಾರ್ಯದಕ್ಷತೆಯೂ ಹೆಚ್ಚಬೇಕು. ಸುಶಾಸನದ ಬಗ್ಗೆ ಎಷ್ಟೇ ಮಾತನಾಡಿದರೂ, ಪ್ರಧಾನಿ ನರೇಂದ್ರ ಮೋದಿಯವರೇ ಈ ಬಗ್ಗೆ ಹಲವು ಬಾರಿ ಪ್ರಸ್ತಾಪಿಸಿದರೂ, ಪರಿಸ್ಥಿತಿಯಲ್ಲಿ ಬಹಳವೇನೂ ಸುಧಾರಣೆಯಾಗಿಲ್ಲ. ಸರ್ಕಾರಿ ಕಚೇರಿಗಳೆಂದರೆ ಜಡತ್ವ, ವಿಳಂಬದ ಕೇಂದ್ರಗಳಂತೆ ಆಗುತ್ತಿರುವುದು ಸರಿಯಾದ ಬೆಳವಣಿಗೆಯಂತೂ ಅಲ್ಲ. ಹಾಗಾಗಿಯೇ, ಜನಸಾಮಾನ್ಯರು ಸರ್ಕಾರಿ ಕಚೇರಿಗಳಿಗೆ ತೆರಳಲು ಹಿಂದೇಟು ಹಾಕುವಂಥ ಪರಿಸ್ಥಿತಿ ಇದೆ. ಹಲವು ಬಾರಿ ಎಡತಾಕಿದರೂ ಕೆಲಸ ಆಗುವುದಿಲ್ಲ ಎಂಬ ದೂರನ್ನು ಸಂಬಂಧಿತ ವ್ಯವಸ್ಥೆ ಗಂಭೀರವಾಗಿ ಪರಿಗಣಿಸುತ್ತಿಲ್ಲ.
