ಇತ್ತೀಚಿಗೆ ಕೆಲ ಕಂಪನಿಗಳಲ್ಲಿ ನಿವೃತ್ತಿ ಮುಂಚೆಯೇ ತರಬೇತಿ ನೀಡಲಾಗುತ್ತಿದೆ. ಇದು ಇನ್ನಷ್ಟು ವ್ಯಾಪಕಗೊಂಡಲ್ಲಿ ನಿವೃತ್ತರಿಗೆ ಹೆಚ್ಚಿನ ಅನುಕೂಲ ಆಗುತ್ತದೆ. ಮಾನಸಿಕ ಆರೋಗ್ಯ ಸಮಸ್ಯೆ, ಮರೆವು, ಖಿನ್ನತೆ, ಹಠಮಾರಿತನ, ಅನಾರೋಗ್ಯ ಸಮಸ್ಯೆ ಎದುರಿಸುತ್ತಿರುವ ಹಿರಿಯ ನಾಗರಿಕರನ್ನು ನೋಡಿಕೊಳ್ಳುವುದು ಕೂಡ ಸವಾಲಾಗಿದೆ. ಹೀಗಿರುವಾಗ ಆರ್ಥಿಕ ಸಂಕಷ್ಟವು ಬಾಧಿಸುತ್ತಿದ್ದಲ್ಲಿ ಗಾಯದ ಮೇಲೆ ಬರೆ ಎಳೆದಂತೆ. ಬದಲಾದ ಜೀವನಶೈಲಿ, ಕಾರ್ಯದೊತ್ತಡ ಮುಂತಾದ ಕಾರಣಗಳಿಂದ ಇತ್ತೀಚಿನ ದಿನಗಳಲ್ಲಿ ಯುವಕರು ಹೃದಯಾಘಾತ/ಹೃದಯಸ್ತಂಭನದಿಂದ ಅಕಾಲಿಕವಾಗಿ ಮರಣ ಹೊಂದುತ್ತಿದ್ದಾರೆ. ಆದ್ದರಿಂದ ಕಾಪೋರೇಟ್ ವಲಯದಲ್ಲಿ 45 ಅಥವಾ 50 ವರ್ಷಕ್ಕೆ ನಿವೃತ್ತಿ ಹೊಂದಿ, ಮುಂದಿನ ಸಮಯವನ್ನು ತಮ್ಮ ಹವ್ಯಾಸಗಳಿಗೆ ಮೀಸಲಿಡುವ, ಆ ಮೂಲಕ ಸಂತೃಪ್ತಿಯ ಜೀವನ ಸಾಗಿಸುವಂಥ ಟ್ರೆಂಡ್ ಹೆಚ್ಚುತ್ತಿದೆ. ಆದರೆ, ಇದು ಎಲ್ಲರಿಗೂ ಸಾಧ್ಯವಿಲ್ಲ. ಮಿತ ಆದಾಯ, ಕುಟುಂಬ ನಿರ್ವಹಣೆಯ ಜವಾಬ್ದಾರಿ, ಆರೋಗ್ಯ ಸಮಸ್ಯೆ ಹೀಗೆ ಸಾಲು-ಸಾಲು ಸವಾಲುಗಳು ಬಾಧಿಸುತ್ತವೆ.
