ದುಬಾರಿ ವೆಚ್ಚ ತಗುಲುವ ಇಂತಹ ಅತ್ಯಾಧುನಿಕ ಶ್ರವಣ ಸಾಧನಗಳನ್ನು ಖರೀದಿಸಲು ಸಾಧ್ಯವಾಗದ ಕಾರಣ ಬೇರೆಯವರೊಂದಿಗೆ ಸರಿಯಾಗಿ ಮಾತುಕತೆಯಾಡಲು ಒದ್ದಾಡುತ್ತಿದ್ದ ಹಿರಿಯ ಜೀವಗಳ ಮುಖದಲ್ಲಿ ಆಯಿಷ್ ಇಂದು ಮಂದಹಾಸ ಮೂಡಿಸುವ ಕೆಲಸ ಮಾಡಿದೆ. ಇಂತಹ ಕಾರ್ಯಗಳು ನಿರಂತರವಾಗಿ ಸಾಗಲಿ ಎಂದು ಶ್ಲಾಘನೆ ವ್ಯಕ್ತಪಡಿಸಿದರು.
ಸಂಸ್ಥೆಯ ನಿರ್ದೇಶಕಿ ಎಂ.ಪುಷ್ಪಾವತಿ ಮಾತನಾಡಿ, ಸುಖಿ ಜೀವನಕ್ಕೆ ಮಾತು ಅವಶ್ಯ. ಅದನ್ನು ಕೇಳಿಸಿಕೊಳ್ಳಲು ಕಿವಿಯಲ್ಲಿನ ನರವು ಪ್ರಾಮುಖ್ಯತೆ ವಹಿಸುತ್ತದೆ. ವಯಸ್ಸಿನ ಕಾರಣದಿಂದ ಹಿರಿಯ ನಾಗರಿಕರಲ್ಲಿ ಕಿವಿ ಕೇಳಿಸದೆ ಸಂವಹನಕ್ಕೆ ತೊಂದರೆಯಾಗುತ್ತದೆ. ಈ ವೇಳೆ ಅವರು ಒಂಟಿತನ ಅನುಭವಿಸುತ್ತಾರೆ. ಅದನ್ನು ಹೋಗಲಾಡಿಸಲು ಶ್ರವಣ ಸಾಧನ ವಿತರಿಸುತ್ತಿದ್ದೇವೆ ಎಂದು ಹೇಳಿದರು.
ಇದೇ ವೇಳೆ ಆಯಿಷ್ ಸಂಸ್ಥೆಯು ಕೇಂದ್ರ ಸರ್ಕಾರದ ಸುಗಮ ಭಾರತ ಅಭಿಯಾನ ಮತ್ತು ರಾಷ್ಟ್ರೀಯ ವಯೋಶ್ರೀ ಯೋಜನೆ ವತಿಯಿಂದ ಚಾಮರಾಜನಗರ, ಕೊಡಗು, ಮೈಸೂರು ಜಿಲ್ಲೆಯ ಆರ್ಥಿಕವಾಗಿ ಹಿಂದುಳಿದ 240 ಹಿರಿಯ ನಾಗರಿಕರಿಗೆ ಶ್ರವಣ ಸಾಧನಗಳನ್ನು ವಿತರಿಸಿತು.ಈ ಉಪಕರಣದ ಮಾರುಕಟ್ಟೆ ಬೆಲೆ 17 ಸಾವಿರ ರೂ. ಆದರೆ ಈ ಯೋಜನೆಯ ಮೂಲಕ 500 ರೂ.ಗೆ ವಿತರಿಸಲಾಯಿತು.
ಸಂಸ್ಥೆಯ ಉಪನ್ಯಾಸಕ ಎಂ.ಸಂದೀಪ್ ಸೇರಿದಂತೆ ಹಲವರು ಹಾಜರಿದ್ದರು.
