ಅಫ್ಘಾನಿಸ್ತಾನ ಬರ ಪರಿಸ್ಥಿತಿಯನ್ನು ಎದುರಿಸುತ್ತಿದೆ. ಕರೊನಾ ಸಂಕಷ್ಟದ ಹೊಡೆತಕ್ಕೂ ಒಳಗಾಗಿದೆ. ದಶಕಗಳ ಆಂತರಿಕ ಸಂಘರ್ಷದಿಂದಾಗಿ ಆರ್ಥಿಕತೆಯೂ ಕುಸಿದಿದೆ. ಒಟ್ಟು ಜನಸಂಖ್ಯೆಯ ಅರ್ಧ ಭಾಗ ಅಂದಾಜು 24 ದಶಲಕ್ಷ ಜನರು ಹಸಿವಿನಿಂದ ಕಂಗಾಲಾಗಿದ್ದಾರೆ. ದೇಶದ 97% ಜನಸಂಖ್ಯೆ ಈ ವರ್ಷದ ಕೊನೆಯೊಳಗೆ ಬಡತನಕ್ಕೆ ಜಾರಲಿದೆ. ಹೀಗಾಗಿ ಅಂತಾರಾಷ್ಟ್ರೀಯ ಸಮುದಾಯ ಈಗ ನೆರವಿನ ಹಸ್ತ ಚಾಚವೇಕು ಎಂದು ಬೇಸ್ಲೆ ಮನವಿ ಮಾಡಿದ್ದಾರೆ. ಜರ್ಮನಿಯ ಸರ್ಕಾರಿ ಸ್ವಾಮ್ಯದ ಅಂತಾರಾಷ್ಟ್ರೀಯ ಮಾಧ್ಯಮ ಸಂಸ್ಥೆ ಡಷೆ ವೆಲ್ಲೆಗೆ ನೀಡಿದ ಸಂದರ್ಶನದಲ್ಲಿ ಬೇಸ್ಲೆ, ಅಫ್ಘಾನಿಸ್ತಾನ ಜಗತ್ತಿನ ಬಡ ರಾಷ್ಟ್ರಗಳಲ್ಲಿ ಒಂದು. 4 ಕೋಟಿ ಜನರ ಪೈಕಿ 2.3 ಕೋಟಿ ಜನ ಹಸಿವಿನಿಂದ ಕಂಗಾಗಲಾಗಿದ್ದಾರೆ. ಅಫ್ಘನ್ಗೆ ಹೋಗಿದ್ದಾಗ ಒಬ್ಬ ಮಹಿಳೆ ತಮ್ಮ ಸಮೀಪ ಬಂದು ಬದುಕಿನ ಬವಣೆಯನ್ನು ಹೇಳಿದ್ದಳು. ಆಕೆ ತನ್ನ ಮಗಳನ್ನೇ ಇನ್ನೊಂದು ಕುಟುಂಬಕ್ಕೆ ಮಾರಾಟ ಮಾಡಿ ತನ್ನ ಕುಟುಂಬದ ಇತರೆ ಸದಸ್ಯರ ಹೊಟ್ಟೆ ಹೊರೆಯಬೇಕಾದ ಸ್ಥಿತಿ ಎದುರಾಗಿರುವುದನ್ನು ವಿವರಿಸಿದ್ದಳು. ಇದು ಒಬ್ಬಳ ವ್ಯಥೆ ಅಲ್ಲ. ಅಲ್ಲಿ ಅನೇಕರ ವ್ಯಥೆಯೂ ಇದುವೇ. ಜಗತ್ತಿನ ಶ್ರೀಮಂತ ರಾಷ್ಟ್ರಗಳು ಈಗ ಮಾನವೀಯ ನೆಲೆಯಲ್ಲಿ ಅಲ್ಲಿನ ಜನರ ನೆರವಿಗೆ ಮುಂದಾಗಬೇಕು ಎಂದು ಕರೆ ನೀಡಿದರು.
