ದೊಡ್ಡದೇನನ್ನಾದರೂ ಮಾಡಿ ಸರ್ಕಾರಕ್ಕೆ ಒಂದು ಸಂದೇಶ ರವಾನೆ ಮಾಡಬೇಕು ಎಂಬ ಪಿತೂರಿಯ ಹಿಂದಿನ ಸಂಚನ್ನು ಮನೋರಂಜನ್ ಹೂಡಿರಬಹುದು ಎಂಬ ಶಂಕೆ ಮೂಡಿದ್ದಾಗಿ ಮೂಲಗಳು ತಿಳಿಸಿವೆ. ಆರೋಪಿಗಳಲ್ಲೊಬ್ಬನಾಗಿರುವ ಲಲಿತ್ ಝಾ ಮಾಸ್ಟರ್ವೆುೖಂಡ್ ಎಂದು ಈ ಹಿಂದೆ ಹೇಳಲಾಗಿತ್ತು. ಆದರೆ ಗುಂಪಿನ ಸದಸ್ಯರಿಗೆ ದೊಡ್ಡ ಕೆಲಸ ಮಾಡುವ ಪ್ರಚೋದನೆ ನೀಡಿ, ಭದ್ರತಾ ಲೋಪದ ಸಂಚು ಹೆಣೆದಿದ್ದು ಮನೋರಂಜನ್ ಎಂದು ಲಲಿತ್ ಝಾ ವಿಚಾರಣೆ ವೇಳೆ ಬಾಯ್ಬಿಟ್ಟಿದ್ದಾನೆ ಎನ್ನಲಾಗಿದೆ. ಅಲ್ಲದೆ ಇಡೀ ಪ್ರಕರಣದಲ್ಲಿ ಝಾ ಪಾತ್ರ ಕೃತ್ಯದ ನಂತರ ಸಾಕ್ಷ್ಯನಾಶಗೊಳಿಸಿದ್ದಷ್ಟೇ ಆಗಿತ್ತು ಎಂದೂ ಹೇಳಲಾಗುತ್ತಿದೆ. ಕಳೆದ ವರ್ಷ ತನಗೆ ಮತ್ತು ಇತರರಿಗೆ ಮೈಸೂರಿಗೆ ಬರಲು ವಾಟ್ಸ್ಆಪ್ ಮೂಲಕ ಟಿಕೆಟ್ ಕಳುಹಿಸಿದ್ದು ಕೂಡ ಮನೋರಂಜನ್ನೇ ಎಂದು ಝಾ ಪೊಲೀಸ್ ವಿಚಾರಣೆಯಲ್ಲಿ ತಿಳಿಸಿರುವುದು ಬೆಳಕಿಗೆ ಬಂದಿದೆ. ಸಂಸತ್ನಲ್ಲಿ ಘಟನೆ ದಿನವೇ ಮನೋರಂಜನ್ ಮತ್ತು ಸಾಗರ್ ಶರ್ವನನ್ನು ಲೋಕಸಭೆಯಲ್ಲಿ ವಶಕ್ಕೆ ಪಡೆಯಲಾಗಿತ್ತು. ಮೈಸೂರು ಮೂಲದ ಮನೋರಂಜನ್ ಇಂಜಿನಿಯರಿಂಗ್ ವಿದ್ಯಾಭ್ಯಾಸ ಮೊಟಕುಗೊಳಿಸಿ, ಸಾಮಾಜಿಕ ಕಾರ್ಯದಲ್ಲಿ ತೊಡಗಿಸಿಕೊಂಡಿದ್ದ. ನಿರುದ್ಯೋಗಿಯಾಗಿದ್ದರೂ ಕಾಂಬೋಡಿಯಾ ಮುಂತಾದೆಡೆಗೆ ಹೋಗಿಬಂದಿದ್ದ ಎನ್ನಲಾಗಿದೆ.
