ಅಂಗಡಿಗಳನ್ನು ತೆರೆದ ವ್ಯಾಪಾರಿಗಳನ್ನು ನೋಡಿ ಕೆಂಡಾಮಂಡಲರಾದ ನಗರಸಭೆ ಆಯುಕ್ತರು; ಮಂಗಳೂರು ಪೊಲೀಸ್​ ಕಮಿಷನರ್​ರಿಂದ ಖಡಕ್​ ಎಚ್ಚರಿಕೆ

ಉಡುಪಿ: ಕರೊನಾ ವೈರಸ್​ ಸೋಂಕು ತಡೆಗಟ್ಟುವ ಸಲುವಾಗಿ ಮುನ್ನೆಚ್ಚರಿಕಾ ಕ್ರಮವಾಗಿ ಬಹುತೇಕ ಎಲ್ಲ ಕಡೆ ಸೆಕ್ಷನ್​ 144 ಜಾರಿಯಾಗಿದೆ.

ಮಂಗಳೂರಿನಲ್ಲಿ ವ್ಯಕ್ತಿಯೋರ್ವರಲ್ಲಿ ಕರೊನಾ ಕಾಣಿಸಿಕೊಂಡ ಹಿನ್ನೆಲೆಯಲ್ಲಿ ಕರಾವಳಿಯಲ್ಲಿ ಕೂಡ ಹೈ ಅಲರ್ಟ್​ ಇದೆ. ಆದರೆ ಉಡುಪಿಯಲ್ಲಿ ಸೆಕ್ಷನ್​ 144 ಜಾರಿಯಲ್ಲಿದ್ದರೂ ಕೆಲವು ವ್ಯಾಪಾರಿಗಳು ಅಂಗಡಿ ತೆರೆದಿದ್ದರು. ಇದನ್ನು ನೋಡಿದ ನಗರಸಭೆ ಆಯುಕ್ತರು ಕೆಂಡಾಮಂಡಲರಾದ ಘಟನೆ ನಡೆಯಿತು.

ಮಾತಿಗೂ ಬಗ್ಗದೆ ಅಂಗಡಿ ತೆರೆದು ಕುಳಿತಿದ್ದವರನ್ನು ನೋಡಿದ ನಗರಸಭೆ ಆಯುಕ್ತ ಆನಂದ್​ ಕಲ್ಲೋಲಿಕರ್​, ಅಂಗಡಿ ಮುಚ್ಚದಿದ್ದರೆ ಲೈಸನ್ಸ್​ ರದ್ದು ಮಾಡುತ್ತೇನೆ ಎಂದು ಹೆದರಿಸಿದರು. ಅದನ್ನು ಕೇಳಿ ವ್ಯಾಪಾರಿಗಳು ಬೇಗಬೇಗ ಅಂಗಡಿಗಳನ್ನು ಮುಚ್ಚಿದ್ದಾರೆ.

ದಿನನಿತ್ಯದ ವಸ್ತುಗಳನ್ನು ಮಾರುವ ಅಂಗಡಿಗಳನ್ನು ಹೊರತುಪಡಿಸಿ, ಉಳಿದ ಯಾವುದೇ ಅಂಗಡಿಗಳು ತೆರೆದಿದ್ದರೂ ಕಠಿಣ ಕ್ರಮ ತೆಗೆದುಕೊಳ್ಳುವುದಾಗಿ ಆಯುಕ್ತರು ಎಚ್ಚರಿಕೆ ನೀಡಿದ್ದಾರೆ.
ಪೊಲೀಸ್​ ಕಮಿಷನರ್​ ಖಡಕ್​ ಎಚ್ಚರಿಕೆ

ಲಾಕ್​ಡೌನ್​ ಆಗಿರುವ ಮಂಗಳೂರಿನಲ್ಲಿ ಯಾರಾದರೂ ಅನಗತ್ಯವಾಗಿ ರಸ್ತೆ ಮೇಲೆ ಓಡಾಡಿದರೆ ಬಂಧಿಸುವುದಾಗಿ ನಗರ ಪೊಲೀಸ್​ ಕಮಿಷನರ್​ ಡಾ. ಪಿ.ಎಸ್​. ಹರ್ಷ ಎಚ್ಚರಿಕೆ ನೀಡಿದ್ದಾರೆ.

ಮನೆಯಲ್ಲೇ ಇದ್ದು ಸರ್ಕಾರದ ಕಾನೂನನ್ನು ಪಾಲಿಸಬೇಕು. ಜಿಲ್ಲಾಧಿಕಾರಿಗಳ ಸೂಚನೆಯನ್ನು ಕೇಳಬೇಕು. ಅದು ಬಿಟ್ಟು ರಸ್ತೆಗೆ ಇಳಿದರೆ ಐಪಿಸಿ ಸೆಕ್ಷನ್​ 188, 269, 270ರಡಿ ಪ್ರಕರಣ ದಾಖಲಿಸುತ್ತೇವೆ ಎಂದಿದ್ದಾರೆ. ಜನರು ಅಗತ್ಯ ವಸ್ತುಗಳನ್ನು ಹೊರತುಪಡಿಸಿ, ಇನ್ಯಾವುದೇ ಕಾರಣಕ್ಕೂ ಮನೆಯಿಂದ ಹೊರಬೀಳಬಾರದು ಎಂದಿದ್ದಾರೆ. 

https://www.vijayavani.net/kapali-mohan-sandalwood-suicide-death-kundapura-udupi-v-k-mohan/