ಸ್ನಾನ ಮಾಡುತ್ತಿದ್ದ ಶಾಲಾ ಬಾಲಕಿ ಮೇಲೆ ಚಾರ್ಜಿಂಗ್​ನಲ್ಲಿದ್ದ ಸ್ಮಾರ್ಟ್​ಫೋನ್​ ಬಿದ್ದು ಸಾವು

ಪ್ಯಾರಿಸ್​: ಚಾರ್ಜಿಂಗ್​ಗೆ ಇಡಲಾಗಿದ್ದ ಮೊಬೈಲ್​ ಫೋನ್​​ ಸ್ನಾನ ಮಾಡುತ್ತಿದ್ದ ಶಾಲಾ ಬಾಲಕಿಯ ಎದೆಯ ಮೇಲೆ ಬಿದ್ದು, ಬಳಿಕ ನೀರಿನೊಳಗೆ ಜಾರಿದ ಪರಿಣಾಮದಿಂದ ಉಂಟಾದ ವಿದ್ಯುತ್​ ಅವಘಡದಿಂದ ಬಾಲಕಿ ಸಾವಿಗೀಡಾಗಿರುವ ಘಟನೆ ಫ್ರಾನ್ಸ್​ನಲ್ಲಿ ನಡೆದಿದೆ.

ಶಾಲಾ ಬಾಲಕಿಯನ್ನು ಟಿಫ್ಫನ್​(15) ಎಂದು ಗುರುತಿಸಲಾಗಿದ್ದು, ಮಾರ್ಸೈಲ್​ನಲ್ಲಿರುವ ಮನೆಯಲ್ಲಿ ಕಳೆದ ಭಾನುವಾರ ಘಟನೆ ನಡೆದಿದೆ. ವಿದ್ಯುತ್​ ಶಾಕ್​ನಿಂದ ಬಳಲುತ್ತಿದ್ದ ಬಾಲಕಿಯನ್ನು ರಕ್ಷಿಸಲು ಸ್ಥಳೀಯ ಟಿಮೋನ್​ ಆಸ್ಪತ್ರೆಗೆ ದಾಖಲಿಸಿದಾದರೂ ಚಿಕಿತ್ಸೆ ಫಲಿಸದೇ ಸಾವಿಗೀಡಾಗಿದ್ದಾಳೆ. ವಿದ್ಯುತ್​ ಆಘಾತದಿಂದ ಉಸಿರಾಟದ ತೊಂದರೆಯಿಂದಾಗಿ ಬಾಲಕಿ ಸಾವಿಗೀಡಾಗಿರುವುದಾಗಿ ತಿಳಿದುಬಂದಿದೆ.

ಶಾಲಾ ಬಾಲಕಿ ಸ್ನಾನ ಮಾಡುತ್ತಿದ್ದಾಗ ಅವಳ ಸ್ಮಾರ್ಟ್​ಫೋನ್​ ಅನ್ನು ಸಮೀಪದಲ್ಲೇ ಚಾರ್ಜಿಂಗ್​ ಇಟ್ಟಿದ್ದಳು. ಅದು ಆಕಸ್ಮಿಕವಾಗಿ ಎದೆಯ ಮೇಲೆ ಬಿದ್ದು, ನೀರಿನೊಳಗೆ ಜಾರಿದ್ದರಿಂದ ವಿದ್ಯುತ್​ ಶಾಕ್​ ಹೊಡೆದಿದೆ ಎಂದು ಮೂಲಗಳು ತಿಳಿಸಿವೆ. ಆದರೂ, ಸಾವಿಗೆ ನಿಖರ ಕಾರಣ ತಿಳಿದುಕೊಳ್ಳಲು ತನಿಖೆ ಕೈಗೊಳ್ಳಲಾಗಿದೆ. (ಏಜೆನ್ಸೀಸ್​)