ಬುದ್ಧ, ಬಸವ, ಕಬೀರ, ಗುರುನಾನಕರಂತೆ ಸೇವಾಲಾಲರು ಸತ್ಯ, ಅಹಿಂಸೆ, ಪ್ರಾಮಾಣಿಕತೆಯ ಜೀವನಮೌಲ್ಯಗಳನ್ನು ಜಗತ್ತಿಗೆ ಸಾರಿ ಹೇಳಿದ್ದಾರೆ. ಸಮಾಜಕ್ಕೆ ನಿರಂತರವಾಗಿ ಬೋಧನೆ ಮಾಡಿದ ಸಂತ ಸೇವಾಲಾಲರು ಅಂತಿಮವಾಗಿ, ಮಹಾರಾಷ್ಟ್ರದ ವಾಸಿಂ ಜಿಲ್ಲೆಯ ಹೋರಾಗಡ್ ಎಂಬಲ್ಲಿ 1806 ಡಿಸೆಂಬರ್ 4ರಂದು ದೇಹತ್ಯಾಗ ಮಾಡಿದರು. ಅವರು ಭೌತಿಕವಾಗಿ ಇಲ್ಲವಾಗಿದ್ದರೂ, ಅವರ ಬೋಧನೆಗಳು ಸೂರ್ಯನಂತೆ ಪ್ರಜ್ವಲಿಸುತ್ತ ಸಮುದಾಯಕ್ಕೆ ಸರಿಯಾದ ದಾರಿ ತೋರಿಸುತ್ತಿವೆ. ಪ್ರತಿವರ್ಷವೂ ಸೇವಾಲಾಲ್ ಜಯಂತಿಯ ಪೂರ್ವಭಾವಿಯಾಗಿ ಬಂಜಾರ ಸಮುದಾಯದ ಯುವಕರು ಸೇವಾಲಾಲ್ ಮಾಲಾಧಾರಣೆ ಮಾಡಿ, ಸೇವಾಲಾಲರ ಬೋಧನೆಗಳನ್ನು ಅನುಸರಿಸಿ, ಅವರ ಜನ್ಮಭೂಮಿಗೆ ತೆರಳಿ, ಸಂತ ಸೇವಾಲಾಲರಿಗೆ ನಮಿಸುತ್ತಾರೆ. ಅವರ ಮಾರ್ಗದರ್ಶನ, ಬೋಧನೆಗಳು ಮಾನವ ಜನಾಂಗಕ್ಕೇ ಹಾದಿತೋರುತ್ತಿವೆ.
