ಮಾಘ ಮೇಳದಲ್ಲಿ ಶಿಬಿರ ನಡೆಸುತ್ತಿದ್ದ ಸಾಧು...ಅಲ್ಲಿಗೆ ಹೂವು ತೆಗೆದುಕೊಂಡು ಹೋದ ಅಪ್ರಾಪ್ತ ಬಾಲಕಿ...ಮುಂದೆ ಆತ ಮಾಡಿದ್ದು ಅನಾಚಾರ...

ಪ್ರಯಾಗ್​ರಾಜ್​: ಉತ್ತರಪ್ರದೇಶದ ಅಲಹಾಬಾದ್​ನ ಝುಸಿ ಎಂಬಲ್ಲಿ ಮಾಘ ಮೇಳದ ನಿಮಿತ್ತ ಶಿಬಿರ ನಡೆಸುತ್ತಿದ್ದ ಓರ್ವ ಸಾಧುವನ್ನು ಪ್ರಯಾಗ್ ರಾಜ್ ಪೊಲೀಸರು ಬಂಧಿಸಿದ್ದಾರೆ. ಅದಕ್ಕೆ ಕಾರಣ ಆತ ಮಾಡಿದ ಅನಾಚಾರ.

ಪರಮಾರ್ಥ ಉತ್ತಾನ್​ ಏವಂ ಅನುಸಂಧಾನ ಸಂಸ್ಥಾನ ಎಂಬ ತನ್ನ ಟ್ರಸ್ಟ್​ನಡಿಯಲ್ಲಿ ಸಾಧು ಸಂಜೀವ್​ ಕುಮಾರ್​ ರೈ (ಸಂಜೀವ್​ ಮಹಾರಾಜ್​)ನಡೆಸುತ್ತಿದ್ದ ಶಿಬಿರಕ್ಕೆ 14 ವರ್ಷದ ಬಾಲಕಿಯೋರ್ವಳು ಹೂವು ಕೊಡಲು ಬಂದಿದ್ದಳು. ಆಕೆಯ ಮೇಲೆ ಈ ಸಾಧು ಅತ್ಯಾಚಾರ ಮಾಡಿದ್ದರಿಂದ ಆತನನ್ನು ಬಂಧಿಸಿದ್ದಾಗಿ ಪೊಲೀಸರು ಹೇಳಿದ್ದಾರೆ.

ಮಾಘಮೇಳವೆಂದರೆ ಮಿನಿ ಕುಂಭಮೇಳದಂತೆ. ಇದು ಪ್ರಮುಖ ನದಿಗಳ ದಂಡೆಯ ಮೇಲೆ ನಡೆಯುತ್ತದೆ. ಅದರಲ್ಲಿ ಪಾಲ್ಗೊಳ್ಳಲು ಬಂದಿದ್ದ ಬಲ್ಲಿಯಾ ಜಿಲ್ಲೆಯ ಗಡ್ವಾರ್​ನ ಈ ಸಾಧು ತನ್ನದೇ ಶಿಬಿರ ನಡೆಸುತ್ತಿದ್ದ. ಅವನಿಂದ ಅತ್ಯಾಚಾರಕ್ಕೆ ಒಳಗಾದ ಬಾಲಕಿಯ ಅಮ್ಮ ಮಾಘಮೇಳದ ಮೈದಾನದಲ್ಲಿ ಹೂವು ಮಾರುತ್ತಿದ್ದಳು. ಬಾಲಕಿ ಅಲ್ಲೇ ಸುತ್ತಲಿನ ಹಲವು ಶಿಬಿರಗಳಿಗೆ ಹೂವು ಕೊಡುತ್ತಿದ್ದಳು. ಹಾಗೇ ಫೆ.5ರಂದು ಬಾಲಕಿ ಸಾಧು ಸಂಜೀವ್​ ಮಹಾರಾಜ್​ನ ಕ್ಯಾಂಪ್​ಗೆ ಹೋದಾಗ ಪ್ರಸಾದ ಕೊಡುವುದಾಗಿ ಹೇಳಿ ಒಳಗೆ ಕರೆದು, ಅತ್ಯಾಚಾರ ಮಾಡಿದ್ದಾನೆ ಎಂದು ಪೊಲೀಸರು ಮಾಹಿತಿ ನೀಡಿದ್ದಾರೆ.

ಬಾಲಕಿ ಪಾರಾಗಲು ತುಂಬ ಪ್ರಯತ್ನ ಮಾಡಿದ್ದಾಳೆ. ಆದರೆ ಆಗಲಿಲ್ಲ. ಅಲ್ಲಿಂದ ಬಂದು ಅಮ್ಮನಿಗೆ ವಿಷಯ ತಿಳಿಸಿದ್ದಾಳೆ.

ತಾಯಿಯ ದೂರಿನ ಮೇರೆಗೆ ಸಾಧುವಿನ ವಿರುದ್ಧ ಎಫ್​ಐಆರ್​ ದಾಖಲಾಗಿದೆ. (ಏಜೆನ್ಸೀಸ್)