ಸಚಿನ್ ಪೈಲಟ್​ ಗಟ್ಟಿ ನಿರ್ಧಾರದ ಹಿಂದೆ ಇದ್ದಾರಾ ಜ್ಯೋತಿರಾದಿತ್ಯ ಸಿಂಧಿಯಾ? ಇಂದು ಇಬ್ಬರೂ ಭೇಟಿಯಾಗಿದ್ದೇಕೆ?

ನವದೆಹಲಿ: ಕಾಂಗ್ರೆಸ್ ಹೈಕಮಾಂಡ್​ ಭೇಟಿ ಮಾಡಲು ತಮ್ಮ ಆಪ್ತ ಶಾಸಕರೊಂದಿಗೆ ದೆಹಲಿಗೆ ತೆರಳಿದ್ದ ಸಚಿನ್​ ಪೈಲಟ್​​ಗೆ ಸೋನಿಯಾಗಾಂಧಿವರೊಂದಿಗೆ ಆಗಲಿ, ರಾಹುಲ್​ ಗಾಂಧಿಯವರೊಂದಿಗೆ ಆಗಲಿ ಮಾತುಕತೆಗೆ ಅವಕಾಶ ಸಿಕ್ಕಿಲ್ಲ.

ಬದಲಿಗೆ, ಇಂದೇ ಜೈಪುರಕ್ಕೆ ತೆರಳಿ, ಅಶೋಕ್​ ಗೆಹ್ಲೋಟ್ ನೇತೃತ್ವದಲ್ಲೇ ಕೆಲಸ ಮಾಡಿ. ಜು.13ರಂದು ನಡೆಯಲಿರುವ ಶಾಸಕಾಂಗ ಸಭೆಯಲ್ಲಿ ಪಾಲ್ಗೊಳ್ಳಿ ಎಂದು ಸಚಿನ್​ ಪೈಲಟ್​ಗೆ ಹೈಕಮಾಂಡ್​ ಸೂಚನೆ ನೀಡಿದೆ.  ಅದಾದ ಕೆಲವೇ ಹೊತ್ತಲ್ಲಿ ಸಚಿನ್​ ಪೈಲಟ್ ಕೂಡ, ತಾವು ಜೈಪುರಕ್ಕೆ ಹೋಗುವುದಿಲ್ಲ. ನಾಳಿನ ಸಭೆಗೆ ಹಾಜರಾಗುವುದಿಲ್ಲ ಎಂದಿದ್ದಾರೆ.

ಆದರೆ ಇದೀಗ ಇನ್ನೊಂದು ಮಾಹಿತಿ ಲಭ್ಯವಾಗಿದ್ದು, ಸಚಿನ್​ ಪೈಲಟ್​ ಅವರು ಇಂದು ಸಂಜೆ ದೆಹಲಿಯಲ್ಲಿ ತಮ್ಮ ಮಾಜಿ ಸಹೋದ್ಯೋಗಿ, ಸ್ನೇಹಿತ, ಈಗಿನ ಬಿಜೆಪಿ ಮುಖಂಡ ಜ್ಯೋತಿರಾದಿತ್ಯ ಸಿಂಧಿಯಾ ಅವರನ್ನು ಭೇಟಿ ಮಾಡಿದ್ದಾರೆ ಎನ್ನಲಾಗಿದೆ.

ಸಚಿನ್​ ಪೈಲಟ್​ ಮತ್ತು ಜ್ಯೋತಿರಾದಿತ್ಯ ಸಿಂಧಿಯಾ ಅವರು ಸುಮಾರು 40 ನಿಮಷ ಮಾತುಕತೆ ನಡೆಸಿದ್ದಾರೆ. ಈ ವೇಳೆ ರಾಜಸ್ಥಾನದ ರಾಜಕೀಯದಲ್ಲಿ ಉಂಟಾಗಿರುವ ಬಿಕ್ಕಟ್ಟಿನ ಬಗ್ಗೆ ಚರ್ಚಿಸಿದ್ದಾರೆ ಎಂದು ತಿಳಿದುಬಂದಿದೆ. ಇದನ್ನೂ ಓದಿ: ಸಚಿನ್​ ಪೈಲಟ್​ ಜತೆ ದೆಹಲಿಗೆ ಹೋಗಿ, ಈಗ ಉಲ್ಟಾ ಹೊಡೆದ ಶಾಸಕರು; ನಾವು ಕಾಂಗ್ರೆಸ್​ ಸೈನಿಕರು ಎಂದರು…!

ಜ್ಯೋತಿರಾದಿತ್ಯ ಸಿಂಧಿಯಾ ಅವರು ಇಂದು ಸಂಜೆ ಟ್ವೀಟ್ ಮಾಡಿ, ಕಾಂಗ್ರೆಸ್​​ನಲ್ಲಿ ಸಚಿನ್​ ಪೈಲಟ್​ಗೆ ಒಳ್ಳೆಯ ಸ್ಥಾನ ಕೊಡುತ್ತಿಲ್ಲ. ಆ ಪಕ್ಷದಲ್ಲಿ ಸಾಮರ್ಥ್ಯಕ್ಕೆ, ಬುದ್ಧಿವಂತಿಕೆಗೆ ಬೆಲೆ ಇಲ್ಲ ಎಂದಿದ್ದರು. ಅಷ್ಟೇ ಅಲ್ಲ, ಸಚಿನ್​ ಪೈಲಟ್​ ಪರಿಸ್ಥಿತಿ ನೋಡಿದರೆ ತುಂಬ ನೋವಾಗುತ್ತದೆ ಎಂದೂ ಹೇಳಿದ್ದರು.

ಇವರಿಬ್ಬರ ಭೇಟಿಯ ಬಳಿಕವೇ ಜ್ಯೋತಿರಾದಿತ್ಯ ಸಿಂಧಿಯಾ ಟ್ವೀಟ್​ ಮಾಡಿದ್ದಾರೆ ಎಂದು ಅವರ ಆಪ್ತ ವಲಯಗಳಿಂದಲೇ ಮಾಹಿತಿ ಸಿಕ್ಕಿದೆ. (ಏಜೆನ್ಸೀಸ್​)

https://www.vijayavani.net/wont-attend-congress-legislative-meet/