ಜೋ ಬೈಡೆನ್ ಮೂಲವೂ ಭಾರತ! ಇಲ್ಲಿಯೇ ಇದ್ದಾರೆ ಸಂಬಂಧಿಕರು

ನಾಗ್ಪುರ: ಅಮೆರಿಕದ ಉಪಾಧ್ಯಕ್ಷೆಯಾಗಿ ಚುನಾಯಿತರಾಗಿರುವ ಕಮಲಾ ಹ್ಯಾರಿಸ್​ ಭಾರತ ಮೂಲದವರು ಎಂದು ಇದಾಗಲೇ ಹಲವಾರು ಬಾರಿ ಹೇಳಿಕೊಂಡಿದ್ದಾರೆ. ಅವರ ತಾಯಿ ಭಾರತದವರಾಗಿರುವ ಬಗ್ಗೆ ಇದಾಗಲೇ ವರದಿಯಾಗಿದೆ. ಆದರೆ ಇದೀಗ ಅಧ್ಯಕ್ಷರಾಗಿ ಚುನಾಯಿತರಾಗಿರುವ ಜೋ ಬೈಡೆನ್​ ಅವರಿಗೂ ಭಾರತದ ಲಿಂಕ್​ ಇದೆ ಎಂಬ ಅಂಶ ಇದೀಗ ಬೆಳಕಿಗೆ ಬಂದಿದೆ.

ಬೈಡೆನ್​ ಅವರ ದೂರದ ಸಂಬಂಧಿಗಳು ಭಾರತದಲ್ಲಿಯೇ ಇರುವ ಬಗ್ಗೆ ಬೈಡೆನ್​ ಅವರೇ ಹೇಳಿದ್ದಾರೆ. 1873ರಿಂದಲೇ ಮಹಾರಾಷ್ಟ್ರದ ನಾಗ್ಪುರದಲ್ಲಿ ಅವರ ಪೂರ್ವಜರು ವಾಸ ಮಾಡುತ್ತಿರುವ ಬಗ್ಗೆ 2013ರಲ್ಲಿ ನಡೆದ ಕಾರ್ಯಕ್ರಮವೊಂದರಲ್ಲಿ ಬೈಡೆನ್​ ಹೇಳಿರುವುದಾಗಿ ತಿಳಿದುಬಂದಿದೆ.

2013ರಲ್ಲಿ ಬೈಡೆನ್​ ಅಮೆರಿಕದ ಉಪಾಧ್ಯಕ್ಷರಾಗಿದ್ದ ಸಂದರ್ಭದಲ್ಲಿ ಮುಂಬೈಗೆ ಭೇಟಿ ನೀಡಿದ್ದರು. ಅಲ್ಲಿ ನಡೆದ ಕಾರ್ಯಕ್ರಮವೊಂದರಲ್ಲಿ ಅವರು ತಮ್ಮ ದೂರದ ಸಂಬಂಧಿಕರಲ್ಲಿ ಕೆಲವರು ಭಾರತದಲ್ಲಿ ವಾಸಿಸುತ್ತಿರುವ ಬಗ್ಗೆ ಹೇಳಿದ್ದರು.

ಇದನ್ನೂ ಓದಿ: ಪಟಾಕಿ ಬ್ಯಾನ್​- ಸುಪ್ರೀಂಕೋರ್ಟ್​ ಹೇಳಿದ್ದೇನು?

ಇದಾದ ಮೇಲೆ 2015ರಲ್ಲಿ ವಾಷಿಂಗ್ಟನ್​ನಲ್ಲಿ ನಡೆದ ಕಾರ್ಯಕ್ರಮವೊಂದರಲ್ಲಿ ಮಾತನಾಡುತ್ತಿದ್ದ ವೇಳೆಯೂ ಈ ವಿಷಯ ಪ್ರಸ್ತಾಪಿಸಿದ್ದರು. ತಮ್ಮ ಪೂರ್ವಜರು ಇಲ್ಲಿಯೇ ನೆಲೆಸಿರುವ ಬಗ್ಗೆ ಹೇಳಿದ್ದ ಬೈಡೆನ್​, ಭಾರತಕ್ಕೆ ಮರಳಲು ಮತ್ತು ಮುಂಬೈಗೆ ಇಲ್ಲಿಗೆ ಬರಲು ಇದು ಒಂದು ಗೌರವವಾಗಿದೆ ಎಂದು ಅವರು ಹೇಳಿದ್ದರು.

"ನಾನು 1972ರಲ್ಲಿ ಸೆನೆಟರ್​ ಆದ ನಂತರ ಭಾರತದ ಬೈಡೆನ್​ ಒಬ್ಬರಿಂದ ಪತ್ರ ಸ್ವೀಕರಿಸಿದ್ದೆ. ನನ್ನ ಬಹು ಹಿಂದಿನ ತಲೆಮಾರು ಭಾರತದಲ್ಲಿ ವಾಸವಾಗಿರುವುದು ತಿಳಿದಿದೆ. ನನ್ನ ಮುತ್ತಜ್ಜನ ಮುತ್ತಜ್ಜನವರು ಈಸ್ಟ್ ಇಂಡಿಯಾ ಕಂಪೆನಿಯಲ್ಲಿ ಕೆಲಸ ಮಾಡುತ್ತಿದ್ದರು" ಎಂದು ಬೈಡೆನ್​ ಹೇಳಿದ್ದರು. ನಂತರ ಈ ಪತ್ರದ ಬಗ್ಗೆ ವಿಚಾರಿಸಿದಾಗ ಇದು ನಾಗ್ಪುರ ಮೂಲದ ಲೆಸ್ಲಿ ಬೈಡೆನ್​ ಎನ್ನುವವರು ಬರೆದಿದ್ದಾರೆ, ಅವರ ಮೊಮ್ಮಕ್ಕಳು ನಾಗ್ಪುರದಲ್ಲಿ ಉಳಿದುಕೊಂಡಿದ್ದಾರೆ ಮತ್ತು ಅವರ ಕುಟುಂಬವು 1873ರಿಂದ ಅಲ್ಲಿ ವಾಸಿಸುತ್ತಿದೆ ಎಂದು ಹೇಳಿಕೊಂಡಿರುವುದಾಗಿ ಪ್ರಸ್ತಾಪಿಸಿದರು.

https://www.vijayavani.net/s-trump-tweet-we-will-win/