ರಷ್ಯಾ: ಕರೋನವೈರಸ್ ಲಸಿಕೆ ಸ್ಫುಟ್ನಿಕ್ ವಿ. ತಯಾರಿಸಿರುವ ರಷ್ಯಾ, ಈ ಕುರಿತು ಭಾರತದ ಜತೆ ಸೇರಿ ಸಾಮೂಹಿಕ ಉತ್ಪಾದನೆ ಮಾಡಲು ಒಲವು ತೋರಿದೆ. ಇಷ್ಟೇ ಅಲ್ಲದೇ, ಈ ಲಸಿಕೆ ತಯಾರಿಕೆಗೆ ಸಂಬಂಧಿಸಿದ ಡಾಟಾಗಳನ್ನು ಭಾರತಕ್ಕೆ ನೀಡಲು ರಷ್ಯಾ ಮುಂದಾಗಿದೆ.
ಈ ಕುರಿತು ಚಿಂತನೆ ನಡೆಸಿರುವ ರಷ್ಯಾ, ಇದಾಗಲೇ ಪ್ರಧಾನಿ ನರೇಂದ್ರ ಮೋದಿ ಅವರ ಜತೆ ಔಪಚಾರಿಕವಾಗಿ ಸಂಪರ್ಕಿಸಿದೆ. ಮಂಗಳವಾರ ಮೋದಿ ಅವರನ್ನು ರಷ್ಯಾದ ರಾಯಭಾರಿ ಸಂಪರ್ಕಿಸಿದ್ದು ಈ ಕುರಿತು ಮಾತುಕತೆ ನಡೆಸಿರುವುದಾಗಿ ತಿಳಿದುಬಂದಿದೆ.
ಭಾರತದಲ್ಲಿನ ರಷ್ಯಾದ ರಾಯಭಾರಿ ನಿಕೋಲಾಯ್ ಕುಡಾಶೇವ್ ಅವರು ಭಾರತದ ಪ್ರಧಾನ ವೈಜ್ಞಾನಿಕ ಸಲಹೆಗಾರ ಪ್ರಾಧ್ಯಾಪಕ ಕೆ.ವಿಜಯರಾಘವನ್, ಕಾರ್ಯದರ್ಶಿ ಡಿಬಿಟಿ (ಜೈವಿಕ ತಂತ್ರಜ್ಞಾನ ವಿಭಾಗ), ರಾನು ಸ್ವರೂಪ್ ಮತ್ತು ಆರೋಗ್ಯ ಸಂಶೋಧನಾ ವಿಭಾಗದ ಕಾರ್ಯದರ್ಶಿ ಮತ್ತು ಭಾರತೀಯ ವೈದ್ಯಕೀಯ ಸಂಶೋಧನಾ ಮಂಡಳಿಯ ಮಹಾನಿರ್ದೇಶಕರಾಗಿರುವ ಡಾ. ಬಲರಾಮ್ ಭಾರ್ಗವ ಅವರನ್ನು ಸಂಪರ್ಕಿಸಿರುವುದಾಗಿ ವರದಿಗಳು ಹೇಳಿವೆ.
