ಮರಿಯುಪೋಲ್​ ಹಿಡಿತಕ್ಕೆ ರಷ್ಯಾ ಪಡೆ ಸಜ್ಜು

ಮಾಸ್ಕೊ/ಕಿಯೆವ್​: ರಷ್ಯಾ ಮೇ 9ರಂದು ವಿಕ್ಟರಿ ಡೇ ಆಚರಿಸುತ್ತಿದ್ದು, ಅದಕ್ಕೂ ಮೊದಲೇ ಅಝೊವಸ್ತಲ್​ ಅನ್ನು ವಶಪಡಿಸಿಕೊಂಡು ಮರಿಯುಪೋಲ್​ ಮೇಲೆ ಸಂಪೂರ್ಣ ಹಿಡಿತ ಸಾಧಿಸಲು ರಷ್ಯಾ ಸೇನೆ ಸಜ್ಜಾಗಿದೆ ಎಂದು ಬ್ರಿಟನ್​ ಸೇನೆ ಎಚ್ಚರಿಸಿದೆ.

ಎರಡನೇ ವಿಶ್ವಮಹಾಯುದ್ಧದಲ್ಲಿ ನಾಜಿ ಜರ್ಮನಿಯ ವಿರುದ್ಧ ಸೋವಿಯತ್​ ಯೂನಿಯನ್​ ಗೆಲುವು ದಾಖಲಿಸಿದ ದಿನ ಮೇ 9 ಆಗಿದ್ದು, ಆ ದಿನವನ್ನು ರಷ್ಯಾ ವಿಕ್ಟರಿ ಡೇ ಎಂದು ಆಚರಿಸುತ್ತ ಬಂದಿದೆ. ಹೀಗಾಗಿ, ಈ ಐತಿಹಾಸಿಕ ದಿನದ ವೇಳೆ, ಮರಿಯುಪೋಲ್​ ಮೇಲೆ ಸಂಪೂರ್ಣ ಹಿಡಿತ ಸಾಧಿಸಿದರೆ ಯೂಕ್ರೇನ್​ ಮೇಲೆ ಸಾಂಕೇತಿಕವಾಗಿ ಗೆಲುವು ಸಾಧಿಸಿದಂತೆ ಎಂದು ರಷ್ಯಾ ಅಧ್ಯಕ್ಷ ವ್ಲಾದಿಮಿರ್​ ಪುತಿನ್​ ನಂಬಿದ್ದಾರೆ. ಅದನ್ನು ಈಡೇರಿಸಲು ಸೇನೆ ಹೊಸ ಹುರುಪಿನೊಂದಿಗೆ ಕೆಲಸ ಶುರುಮಾಡಿದೆ. ಅಝೊವಸ್ತಲ್​ ಸ್ಟೀಲ್​ ಪ್ಲಾಂಟ್​ ಪ್ರದೇಶ ಯೂಕ್ರೇನ್​ ಸೇನೆಯ ವಶವಿದ್ದು, ರಷ್ಯಾ ಸೇನೆಗೆ ತೀವ್ರ ಪ್ರತಿರೋಧ ಅಲ್ಲಿಂದ ವ್ಯಕ್ತವಾಗಿದೆ. ಈ ಹೊಸ ಪ್ರಯತ್ನದಲ್ಲಿ ರಷ್ಯಾ ಸೇನೆ ವಿಲವಾದರೆ ಅದು ಇನ್ನಷ್ಟು ಹತಾಶ ಸ್ಥಿತಿಗೆ ತಳ್ಳಲ್ಪಡಲಿದೆ.

ಕೈದಿಗಳ ಅಮಾನವೀಯ ಪರೇಡ್​

ಡೊನೆಟ್​ಸ್ಕ್​ನಲ್ಲಿ ಬಂಧಿತರಾಗಿರುವ ಯೂಕ್ರೇನ್​ನ ಯುದ್ಧ ಕೈದಿಗಳ ಪರೇಡ್​ ಅನ್ನು ರಷ್ಯಾ ಸೇನೆ ನಡೆಸಿದೆ. ಇದೇ ವೇಳೆ, ರಸ್ತೆ ಬದಿಯಲ್ಲಿದ್ದವರು ಈ ಕೈದಿಗಳ ಮೇಲೆ ತ್ಯಾಜ್ಯವನ್ನು ಎಸೆದು ಅಮಾನವೀಯ ವರ್ತನೆಯನ್ನು ತೋರಿದ್ದಾರೆ ಎಂದು ಯೂಕ್ರೇನ್​ ಅಧ್ಯಕ್ಷ ವೊಲೊದಿಮಿರ್​ ಝೆಲೆನ್​ಸ್ಕಿ ಆರೋಪಿಸಿದ್ದಾರೆ.

45 ಸೇನಾ ನೆಲೆಗಳ ನಾಶ

ಯೂಕ್ರೇನ್​ಗೆ ಸಂಬಂಧಿಸಿದ 45 ಸೇನಾ ನೆಲೆ ಮತ್ತು ಸೌಲಭ್ಯಗಳನ್ನು ರಷ್ಯಾದ ವಾಯುಪಡೆ ನಾಶ ಪಡೆಸಿದೆ. ಲುಹಾನ್​ಸ್ಕ್​ ಪ್ರಾಂತ್ಯದ ಪೂರ್ವಭಾಗದಲ್ಲಿ ಗುರುವಾರ ನಡೆಸಿದ ದಾಳಿಯ ವೇಳೆ ಇವಿಷ್ಟೂ ನಾಶವಾಗಿವೆ ಎಂದು ರಷ್ಯಾದ ರಕ್ಷಣಾ ಸಚಿವಾಲಯದ ವಕ್ತಾರ ಮೇಜರ್​ ಜನರಲ್​ ಐಗೋರ್​ ಕೊನಾಶೆನ್​ಕೋವ್​ ಹೇಳಿದ್ದಾರೆ.

ಉಪದೇಶ ಬೇಡ...

ವಿಶ್ವಸಂಸ್ಥೆಯ ಜನರಲ್​ ಅಸೆಂಬ್ಲಿಯಲ್ಲಿ ನೀವು ಗೈರಾಗ ಬಾರದಿತ್ತು ಎಂದು ಬ್ರಿಟನ್​ ಮತ್ತು ನಾರ್ದರ್ನ್​ ಐರ್ಲೆಂಡ್​ಗೆ ನೆದರ್ಲೆಂಡ್ಸ್​ನ ರಾಯಭಾರಿ ಕಾರೆಲ್​ ವ್ಯಾನ್​ ಊಸ್ಟೆರೋಮ್​ ಅವರು ಭಾರತದ ರಾಯಭಾರಿ ತಿರುಮೂರ್ತಿ ಅವರನ್ನು ಉದ್ದೇಶಿಸಿ ಟ್ವೀಟ್​ ಮಾಡಿದ್ದರು. ಇದಕ್ಕೆ ಪ್ರತಿ ಟ್ವೀಟ್​ ಮಾಡಿದ ತಿರುಮೂರ್ತಿ ಅವರು, ನಮಗೆ ಉಪದೇಶ ಮಾಡಲು ಬರಬೇಡಿ. ನಾವೇನು ಮಾಡಬೇಕು ಎಂಬುದು ನಮಗೆ ಚೆನ್ನಾಗಿ ತಿಳಿದಿದೆ ಎಂದು ತಿರುಗೇಟು ನೀಡಿದ್ದರು.