ಆರ್​ಟಿಒ ಗೋಲ್ಮಾಲ್ ಗುಜರಿ ಗಾಡಿಗಳಿಗೂ ಕೊಡ್ತಾರೆ ಎಫ್​ಸಿ! 20 ವರ್ಷ ಹಳೆ ವಾಹನಕ್ಕೂ ಫಿಟ್​ನೆಸ್ ಸರ್ಟಿಫಿಕೇಟ್

• ತಲಾ ವಾಹನಕ್ಕೆ 5 ರಿಂದ 10 ಸಾವಿರ ರೂ.ವರೆಗೂ ವಸೂಲಿ
• ಮಧ್ಯವರ್ತಿಗಳ ಜತೆಗೂಡಿ ಅಧಿಕಾರಿ-ಸಿಬ್ಬಂದಿ ಅವ್ಯವಹಾರ

| ಕೀರ್ತಿನಾರಾಯಣ ಸಿ. ಬೆಂಗಳೂರು

ದೇಶದಲ್ಲಿ ಗುಜರಿ ನೀತಿ ಜಾರಿಗೊಂಡು 15 ವರ್ಷ ತುಂಬಿದ ವಾಹನಗಳನ್ನು ಸ್ಕ್ರ್ಯಾಪ್​ ಮಾಡುವ ಪ್ರಕ್ರಿಯೆ ಆರಂಭವಾಗುತ್ತಿದ್ದಂತೆ ರಾಜ್ಯದ ಕೆಲ ಪ್ರಾದೇಶಿಕ ಸಾರಿಗೆ ಕಚೇರಿಗಳಲ್ಲಿ (ಆರ್​ಟಿಒ) ‘ಫಿಟ್​ನೆಸ್ ಸರ್ಟಿಫಿಕೇಟ್’ (ಎಫ್​ಸಿ) ದಂಧೆ ಮಿತಿಮೀರಿದೆ. ದುಡ್ಡು ಕೊಟ್ಟರೆ ಸಂಚಾರಕ್ಕೆ ಯೋಗ್ಯವಲ್ಲದ ಹಾಗೂ ಸುರಕ್ಷತಾ ಕ್ರಮಗಳಿರದ ವಾಹನಗಳಿಗೂ ಎಫ್​ಸಿ ಕೊಡುತ್ತಿರುವ ವಿಚಾರ ಬೆಳಕಿಗೆ ಬಂದಿದೆ. ಏತನ್ಮಧ್ಯೆ ಎಫ್​ಸಿ ವಿತರಣೆಯಲ್ಲಿ ಪಾರದರ್ಶಕತೆ ತರುವ ಉದ್ದೇಶದಿಂದ ಹೊಸ ವರ್ಷದಿಂದ ಎಲ್ಲ ಆರ್​ಟಿಒ ಕಚೇರಿಗಳಲ್ಲಿ ಜಿಯೋ ಫೆನ್ಸಿಂಗ್ ವ್ಯವಸ್ಥೆ ಅನುಷ್ಠಾನಕ್ಕೆ ಸಾರಿಗೆ ಇಲಾಖೆ ತಯಾರಿ ನಡೆಸಿದೆ. ಗುಜರಾತ್, ಮಹಾರಾಷ್ಟ್ರ, ತಮಿಳುನಾಡು, ಆಂಧ್ರಪ್ರದೇಶ ಸೇರಿ ದೇಶದ ಬೇರೆಬೇರೆ ರಾಜ್ಯಗಳ ಹಳೇ ವಾಹನಗಳಿಗೂ ಬೆಂಗಳೂರು ಸೇರಿ ರಾಜ್ಯದ ಕೆಲ ಆರ್​ಟಿಒ ಕಚೇರಿಗಳಲ್ಲಿ ಎಫ್​ಸಿ ಕೊಡಲಾಗಿದೆ. ಈ ಕುರಿತು ‘ವಿಜಯವಾಣಿ’ಗೆ ದಾಖಲೆಗಳು ಲಭ್ಯವಾಗಿದ್ದು, ಕೆಲ ಆರ್​ಟಿಒ ಕಚೇರಿಗಳಲ್ಲಿ ತಲಾ ವಾಹನಕ್ಕೆ 5 ರಿಂದ 10 ಸಾವಿರ ರೂ. ಪಡೆದು ಒಂದೇ ದಿನ ನೂರಾರು ವಾಹನಗಳಿಗೆ ಎಫ್​ಸಿ ಕೊಟ್ಟಿರುವುದು ದೃಢಪಟ್ಟಿದೆ.

ಸದ್ಯ ರಾಜ್ಯದಲ್ಲಿ ವಾಹನಗಳನ್ನು ಬ್ರೇಕ್ ಇನ್​ಸ್ಪೆಕ್ಟರ್​ಗಳು ಭೌತಿಕವಾಗಿ ಪರಿಶೀಲನೆ ನಡೆಸಿ, ಎಫ್​ಸಿ ಕೊಡುವ ಪದ್ಧತಿ ಜಾರಿಯಲ್ಲಿದೆ. ಮಾನವ ಹಸ್ತಕ್ಷೇಪ ಇಲ್ಲದೆ ಸ್ವಯಂಚಾಲಿತ ಪರೀಕ್ಷಾ ಕೇಂದ್ರಗಳಲ್ಲೇ (ಎಟಿಎಸ್) ವಾಹನಗಳನ್ನು ತಪಾಸಣೆ ನಡೆಸುವ ನಿಯಮವನ್ನು ಕೇಂದ್ರ ಸರ್ಕಾರ ಜಾರಿಗೆ ತಂದಿದೆ. ಅರ್ಹತೆ ಹೊಂದಿರುವ ವಾಹನಕ್ಕೆ ಮಾತ್ರವೇ ಎಫ್​ಸಿ ವಿತರಿಸಬೇಕು ಎಂದು ನಿಯಮ ರೂಪಿಸಿದೆ. ಕರ್ನಾಟಕದಲ್ಲಿ ಬೆಂಗಳೂರಿನ ನೆಲಮಂಗಲ, ಮೈಸೂರು ಹಾಗೂ ಧಾರವಾಡದಲ್ಲಿ ಮಾತ್ರವೇ ಸ್ವಯಂ ಚಾಲಿತ ಪರೀಕ್ಷಾ ಕೇಂದ್ರಗಳಿವೆ. ಬಹುತೇಕ ಆರ್​ಟಿಒ ಕಚೇರಿಗಳಲ್ಲಿ ಭೌತಿಕವಾಗಿಯೇ ವಾಹನಗಳನ್ನು ಪರಿಶೀಲನೆ ಮಾಡಿ ಎಫ್​ಸಿ ಕೊಡುವ ಪದ್ಧತಿ ಇದೆ. ರಾಜ್ಯದ ಯಾವುದೇ ಆರ್​ಟಿಒ ಕಚೇರಿಯಲ್ಲಿ ಬೇಕಾದರೂ ವಾಹನಕ್ಕೆ ಎಫ್​ಸಿ ಮಾಡಿಸಲು ಅವಕಾಶ ಇದೆ. ಈ ಅವಕಾಶ ದುರ್ಬಳಕೆಯಾಗುತ್ತಿದ್ದು, ಕೆಲ ನಿರ್ದಿಷ್ಟ ಕಚೇರಿಗಳಲ್ಲಿ ಮಾತ್ರ ಅವ್ಯವಹಾರ ನಡೆಯುತ್ತಿದೆ. ಆರ್​ಟಿಒಗಳಲ್ಲಿ ಮಧ್ಯವರ್ತಿಗಳೇ ಎಫ್​ಸಿ ದಂಧೆ ನಡೆಸುತ್ತಿರುವ ಆರೋಪ ಕೇಳಿಬಂದಿದೆ. ಒಂದು ಕಚೇರಿಯಲ್ಲಿ ಪ್ರತಿನಿತ್ಯ 200 ರಿಂದ 300 ವಾಹನಗಳಿಗೆ ನಿಯಮಬಾಹಿರವಾಗಿ ಎಫ್​ಸಿ ಕೊಡಲಾಗುತ್ತಿದೆ.

ದಂಧೆ ಹೇಗೆ?

• ಹೆಡ್​ಲೈಟ್, ಗೇರ್, ಬೇರಿಂಗ್, ತೂಕ ಪ್ರಮಾಣ ಸೇರಿ ಎಲ್ಲವೂ ಸರಿಯಾಗಿ ಇರಬೇಕು
• ವಾಹನ ನೂರಕ್ಕೆ ನೂರರಷ್ಟು ಸರಿಯಾಗಿದ್ದರೆ ಮಾತ್ರ ಎಫ್​ಸಿ ವಿತರಣೆ ಮಾಡಬೇಕು
• ವಾಹನ ಸರಿಯಾಗಿರದಿದ್ದರೂ ಹಣ ಪಡೆದು ಎಫ್​ಸಿ ಕೊಡಲಾಗುತ್ತದೆ
• ಒಂದು ವಾಹನದ ತಪಾಸಣೆಗೆ ಕನಿಷ್ಠ 30 ರಿಂದ 45 ನಿಮಿಷ ಬೇಕಾಗುತ್ತದೆ
• 5 ರಿಂದ 10 ಸಾವಿರ ರೂ. ಕೊಟ್ಟರೆ ವಾಹನ ಪರಿಶೀಲನೆ ನಡೆಸದೆಯೇ ಫಿಟ್​ನೆಸ್ ವರದಿ
• ಕೆಲ ಕಚೇರಿಗಳಲ್ಲಿ ವಾಹನಗಳನ್ನು ಕಚೇರಿಗೆ ತರದಿದ್ದರೂ ಎಫ್​ಸಿ ಕೊಡುತ್ತಿರುವ ಆರೋಪ ಇದೆ

ಹೊಸ ಇನ್​ಸ್ಪೆಕ್ಟರ್​ಗಳ ಅಕ್ರಮ ಜಾಸ್ತಿ!

ಹೊಸದಾಗಿ ನೇಮಕಗೊಂಡಿರುವ ಬ್ರೇಕ್ ಇನ್​ಸ್ಪೆಕ್ಟರ್​ಗಳಿಂದ ಅಕ್ರಮ ಪ್ರಕರಣಗಳು ಜಾಸ್ತಿಯಾಗಿವೆ ಎಂದು ಹಿರಿಯ ಅಧಿಕಾರಿಗಳು ಆರೋಪಿಸಿದ್ದಾರೆ. ಸರಿಯಾದ ರೀತಿ ಟ್ರೇನಿಂಗ್ ಪಡೆದಿಲ್ಲ. ಕೆಲಸ ಮಾಡುವುದು ಹೇಗೆ ಎಂಬುದು ತಿಳಿದಿಲ್ಲ. ಹಲವರ ವಿರುದ್ಧ ಸಾರಿಗೆ ಸಚಿವರು ಹಾಗೂ ಆಯುಕ್ತರಿಗೆ ದೂರುಗಳು ಸಲ್ಲಿಕೆಯಾಗಿವೆ ಎಂದು ಮಾಹಿತಿ ನೀಡಿದ್ದಾರೆ.

ದಿನಕ್ಕೆ 5 ಲಕ್ಷ ರೂ. ವಸೂಲಿ?

ಹಿರಿಯ ಅಧಿಕಾರಿಗಳು ಹೇಳುವ ಪ್ರಕಾರ ಕೆಲವೊಂದು ಆರ್​ಟಿಒ ಕಚೇರಿಗಳಲ್ಲಿ ಎಫ್​ಸಿ ದಂಧೆಯಿಂದಲೇ 3 ರಿಂದ 5 ಲಕ್ಷ ರೂ.ವರೆಗೆ ಲಂಚದ ಹಣ ಗಳಿಕೆಯಾಗುತ್ತಿದೆ. ಸುಲಭವಾಗಿ ಎಫ್​ಸಿ ಸಿಗುತ್ತದೆಂಬ ಕಾರಣಕ್ಕಾಗಿಯೇ ಹೊರ ರಾಜ್ಯ ಹಾಗೂ ಹೊರ ಜಿಲ್ಲೆಗಳಿಂದ ನಿರ್ದಿಷ್ಟ ಆರ್​ಟಿಒ ಕಚೇರಿಗಳಿಗೆ ವಾಹನಗಳನ್ನು ತರಲಾಗುತ್ತಿದೆ. ಈ ಬಗ್ಗೆ ಸಾರಿಗೆ ಇಲಾಖೆ ಆಯುಕ್ತರು ಹಾಗೂ ಸಚಿವರು ಎಚ್ಚರಿಕೆ ವಹಿಸಬೇಕು ಎಂಬ ಮನವಿ ಕೇಳಿಬಂದಿದೆ.

ಏನಿದು ಜಿಯೋಫೆನ್ಸಿಂಗ್?

• ಜಿಯೋ ಫೆನ್ಸಿಂಗ್ ವ್ಯವಸ್ಥೆಯಲ್ಲಿ ವಾಹನ 500 ಮೀಟರ್ ಅಂತರದಲ್ಲಿರಲೇಬೇಕು. ಆಗಷ್ಟೇ ಸರ್ಟಿಫಿಕೇಟ್​ಗೆ ಅನುಮತಿ
• ಎಂ ವಾಹನ್ ಆಪ್​ನಲ್ಲಿ ಎಫ್​ಸಿಗೆ ಬರುವ ವಾಹನದ ಫೋಟೋ ತೆಗೆದು ಕಡ್ಡಾಯವಾಗಿ ಅಪ್​ಲೋಡ್ ಮಾಡಬೇಕು.
• ಈ ಯೋಜನೆಯಲ್ಲಿ ಪ್ರತಿ ಆರ್​ಟಿಒ ಕಚೇರಿಗೆ ಎರಡು ಪಾಯಿಟ್ ಗುರುತಿಸಿ, ಅಲ್ಲಿ ಎಫ್​ಸಿ ಪರಿಶೀಲನೆಗೆ ಅವಕಾಶ ಸಿಗುತ್ತದೆ.
• ಬ್ರೇಕ್ ಇನ್​ಸ್ಪೆಕ್ಟರ್​ಗಳಿಗೆ ಟ್ಯಾಬ್ ಕೊಡಲಾಗುತ್ತದೆ. ವಾಹನದ ನಾಲ್ಕೂ ಕಡೆ ಫೋಟೋ ತೆಗೆದು, ಆಪ್​ನಲ್ಲಿ ಅಪ್​ಲೋಡ್ ಮಾಡಬೇಕು.

ಎಫ್​ಸಿಗಾಗಿ 1400 ಕಿ.ಮೀ. ಪ್ರಯಾಣ!

ಗುಜರಾತ್ ಮತ್ತು ಮಹಾರಾಷ್ಟ್ರದ 20 ವರ್ಷ ಹಳೆಯ ವಾಹನಗಳಿಗೆ ಮಲೆನಾಡು ಭಾಗದ ಆರ್​ಟಿಒ ಕಚೇರಿಯಲ್ಲಿ ಎಫ್​ಸಿ ಕೊಡಲಾಗಿದೆ. 1400ರಿಂದ 1800 ಕಿ.ಮೀ ಪ್ರಯಾಣಿಸಿ ಬಂದು ಎಫ್​ಸಿ ಪಡೆಯಲಾಗುತ್ತದೆ. ಇದೊಂದೇ ಕಚೇರಿಯಲ್ಲಿ ಅ.3ರಂದು ಗುಜರಾತ್​ನ ಅಂದಾಜು 85 ವಾಹನ ಹಾಗೂ ಮಹಾರಾಷ್ಟ್ರದ 45 ವಾಹನಗಳಿಗೆ ಎಫ್​ಸಿ ಕೊಡಲಾಗಿದೆ. ಅಲ್ಲದೆ, ರಾಜ್ಯದ ಬೇರೆ ಜಿಲ್ಲೆಗಳ 17 ವಾಹನಗಳಿಗೆ ಸರ್ಟಿಫಿಕೇಟ್ ವಿತರಣೆಯಾಗಿದೆ. ಅ.4ರಂದು ಗುಜರಾತ್​ನ 85 ಹಾಗೂ ಮಹಾರಾಷ್ಟ್ರದ 22 ವಾಹನ ಮತ್ತು ರಾಜ್ಯದ 29 ವಾಹನಗಳಿಗೆ ಫಿಟ್​ನೆಸ್ ಸರ್ಟಿಫಿಕೇಟ್ ಕೊಡಲಾಗಿದೆ.

https://www.vijayavani.net/struggles-of-actress-silk-smitha/