ವಿದೇಶಿ ನೆಲದಲ್ಲಿ ಭಾರತೀಯನ ಸಾಹಸ: ಸರೋವರದಿಂದ ಬಾಲಕಿಯನ್ನು ರಕ್ಷಿಸಿದ ವಿಪಿನ್ ಕುಮಾರ್‌ಗೆ ರೊಮೇನಿಯಾ ಉನ್ನತ ಗೌರವ! Romania Honours Indian

ವರದಿಯ ಪ್ರಕಾರ, ವಿಪಿನ್ ಕುಮಾರ್ ತಮ್ಮ ಸ್ನೇಹಿತನೊಂದಿಗೆ ರೊಮೇನೆಸ್ಕು ಪಾರ್ಕ್ ಸಮೀಪ ನಡೆದುಕೊಂಡು ಹೋಗುತ್ತಿರುವಾಗ ಬಾಲಕಿ ಮಂಜುಗಡ್ಡೆ ಒಡೆದು ಕೆರೆಯೊಳಗೆ ಬೀಳುತ್ತಿರುವುದನ್ನು ಗಮನಿಸಿದರು. ಈ ವೇಳೆ ಒಂದು ಕ್ಷಣವೂ ಹಿಂಜರಿಯದೆ ಅವರು ಹತ್ತಿರದಲ್ಲಿದ್ದ ಸ್ಲೆಡ್ಜ್​​ ಬಳಸಿಕೊಂಡು ಬಾಲಕಿಯ ಕಡೆಗೆ ಸಾಗಿದರು. ಆದರೆ ಅವರ ಕೆಳಗಿದ್ದ ಮಂಜುಗಡ್ಡೆಯೂ ಒಡೆದುಹೋಗಿದ್ದು, ಅವರು ಸಹ ಹೆಪ್ಪುಗಟ್ಟಿದ ನೀರಿನೊಳಗೆ ಬಿದ್ದರು. ಆದರೂ ಧೈರ್ಯ ಕಳೆದುಕೊಳ್ಳದೆ ಬಾಲಕಿಯನ್ನು ಹಿಡಿದುಕೊಂಡು ನೀರಿನ ಮೇಲ್ಮೈಯಲ್ಲಿ ಸುಮಾರು 30 ನಿಮಿಷಗಳ ಕಾಲ ಬಾಲಕಿಯನ್ನು ರಕ್ಷಿಸುತ್ತಾ ತುರ್ತು ಸೇವಾ ಸಿಬ್ಬಂದಿ ಬರುವವರೆಗೆ ಕಾದರು.

ಕುಮಾರ್ ಮತ್ತು ಹುಡುಗಿ ಇಬ್ಬರೂ ತೀವ್ರ ಹೈಪೋಥರ್ಮಿಕ್ ಆಘಾತದಿಂದ ಬಳಲುತ್ತಿದ್ದರು ಮತ್ತು ಅವರನ್ನು ತಕ್ಷಣವೇ ಆಸ್ಪತ್ರೆಗೆ ದಾಖಲಿಸಿ ಚಿಕಿತ್ಸೆ ನೀಡಲಾಯಿತು. ಆದಾಗ್ಯೂ, ಈ ವೇಳೆ ಸಹಾಯ ಮಾಡಲು ಹೋಗಿ ಬಾಲಕಿಯ ತಂದೆಯೂ ಮಂಜುಗಡ್ಡೆಯಲ್ಲಿ ಸಿಲುಕಿರುವುದಾಗಿ ಸ್ಥಳೀಯ ಅಧಿಕಾರಿಗಳು ಗಮನಿಸಿದರು.

ಭಾರತೀಯ ಕಾರ್ಮಿಕನ ಈ ನಿಸ್ವಾರ್ಥತೆಯಿಂದ ತೀವ್ರವಾಗಿ ಪ್ರೇರಿತರಾದ ಕ್ರಯೋವಾ ನಗರದ ಮೇಯರ್ ಲಿಯಾ ಓಲ್ಗುಟಾ ವಾಸಿಲೆಸ್ಕು (Lia Olgua Vasilescu) ಅವರು, ವಿಪಿನ್ ಅವರಿಗೆ ಈ ಅಸಾಧಾರಣ ಗೌರವವನ್ನು ನೀಡಲು ಸ್ವತಃ ಪ್ರಸ್ತಾಪಿಸಿದ್ದರು. ಜೂನ್ 4 ರಂದು ರೊಮೇನಿಯಾದ ಭಾರತದ ರಾಯಭಾರಿ ಡಾ. ಮನೋಜ್ ಕುಮಾರ್ ಮೊಹಾಪಾತ್ರ ಅವರು ಭಾಗವಹಿಸಿ, ವಿಪಿನ್ ಕುಮಾರ್ ಅವರಿಗೆ ಪ್ರಶಸ್ತಿ ಪ್ರಧಾನ ಮಾಡಿದರು.

ಕಾರ್ಯಕ್ರಮದಲ್ಲಿ ಮಾತನಾಡಿದ ರಾಯಭಾರಿ, ಕುಮಾರ್ ಅವರ ಧೈರ್ಯವು ಭಾರತದ ಸೇವೆ ಮತ್ತು ಮಾನವೀಯತೆಯ ಮೂಲ ಮೌಲ್ಯಗಳನ್ನು ಸಂಪೂರ್ಣವಾಗಿ ಪ್ರತಿಬಿಂಬಿಸುತ್ತದೆ. ಇದು ಜಗತ್ತು ಒಂದು ಕುಟುಂಬ ಎಂಬ ಅರ್ಥವನ್ನು ನೀಡುವ ವಸುಧೈವ ಕುಟುಂಬಕಂ ಎಂಬ ಪ್ರಾಚೀನ ತತ್ವಶಾಸ್ತ್ರವನ್ನು ಸಹ ಪ್ರತಿಬಿಂಬಿಸುತ್ತದೆ.

ಜೂನ್ 2025 ರಲ್ಲಿ ರೊಮೇನಿಯಾಗೆ ನಿರ್ಮಾಣ ಕಾರ್ಮಿಕರಾಗಿ ಕೆಲಸ ಮಾಡಲು ತೆರಳಿದ ಕುಮಾರ್, ರೊಮೇನಿಯನ್ ಪ್ರಸಾರಕ ಡಿಜಿ24 ಜೊತೆ ಮಾತನಾಡುವಾಗ ನಂಬಲಾಗದಷ್ಟು ವಿನಮ್ರರಾಗಿದ್ದರು. ನಾನು ಅವಳನ್ನು ನೀರಿನಿಂದ ಮೇಲಕ್ಕೆತ್ತಲು ಪ್ರಯತ್ನಿಸಲು ಅಷ್ಟೇ ಯೋಚಿಸಿದೆ. ಆದರೆ, ಅವಳು ತುಂಬಾ ಧೈರ್ಯಶಾಲಿಯಾಗಿದ್ದಳು ಎಂದು ಹೇಳಿದರು. 

ಔಪಚಾರಿಕ ಪ್ರಶಸ್ತಿಯ ಜೊತೆಗೆ, ಕುಮಾರ್ ಅವರಿಗೆ ತ್ವರಿತ ನಿವಾಸ ಪರವಾನಗಿ ಸೇರಿದಂತೆ ಹೆಚ್ಚುವರಿ ಪ್ರಾಯೋಗಿಕ ಪ್ರಯೋಜನಗಳನ್ನು ರೊಮೇನಿಯಾ ಸರ್ಕಾರದಿಂದ ಕೊಡಿಸಲಾಗುವುದು ಎಂದು ನಗರ ಆಡಳಿತ ಪ್ರಕಟಿಸಿದೆ (ಏಜೆನ್ಸೀಸ್​).