1986ರ ಜನವರಿ 16. ಸತೀಶ್ರ ಬದುಕಿನಲ್ಲೊಂದು ಮಹತ್ವದ ಘಟ್ಟ. ಬೆಂಗಳೂರಿಗೆ ಬಂದ ಹಂಪಿಹೊಳಿ ಅವರಿಗೆ ಚಾಮರಾಜಪೇಟೆಯ ಸಿದ್ದಾಶ್ರಮದಲ್ಲಿ ಉಳಿದುಕೊಳ್ಳಲು ಮಹಾಮಹೋಪಾಧ್ಯಾಯ ಪಂಡಿತ್ ಶೇಷಾದ್ರಿಗವಾಯಿಗಳೇ ವ್ಯವಸ್ಥೆ ಮಾಡಿದರು. ತಮ್ಮದೇ ಅರವಿಂದ ಸಂಗೀತ ಶಾಲೆಯಲ್ಲಿ ವಿದ್ಯಾರ್ಥಿಗಳಿಗೆ ತಬಲಾ ಸಾಥ್ ನೀಡಲು ನಿಯೋಜಿಸಿದರು. ಗವಾಯಿಗಳ ಮೂಲಕವೇ ಅವರ ಶಿಷ್ಯ ಜಿ. ವಿ.ಅತ್ರಿ ಹಾಗೂ ಹೆಸರಾಂತ ಗಾಯಕಿ ಶ್ಯಾಮಲಾ ಭಾವೆಯವರ ಪರಿಚಯವಾಯಿತು. ಶ್ಯಾಮಲಾ ಭಾವೆಯವರು ತಮ್ಮ ಸರಸ್ವತಿ ಸಂಗೀತ ವಿದ್ಯಾಲಯದಲ್ಲಿ ತಬಲಾ ಮಾರ್ಗದರ್ಶಕರಾಗಿ ಕೆಲಸ ಮಾಡಲು ಅವಕಾಶವನ್ನು ನೀಡಿ ಸತೀಶ್ ಅವರು ರಾಜಧಾನಿಯಲ್ಲಿ ಭದ್ರವಾಗಿ ನೆಲೆಯೂರಲು ಸಹಾಯ ಮಾಡಿದರು. ಮುಂದಿನ ದಿನಗಳಲ್ಲಿ ನಾಡಿನ ಪ್ರಖ್ಯಾತ ಸಂಗೀತಗಾರರಾದ ಪಂಡಿತ್ ಮಾಧವಗುಡಿ, ಪಂಡಿತ್ ವಿನಾಯಕ ತೊರ್ವಿ, ಪಂಡಿತ್ ಪರಮೇಶ್ವರ ಹೆಗಡೆ, ಪಂಡಿತ್ ಡಿ. ಕುಮಾರ ದಾಸ್, ಪಂಡಿತ್ ಆರ್ ವಿ ಶೇಷಾದ್ರಿಗವಾಯಿ, ವಿದುಷಿ ಕೃಷ್ಣಾ ಹಾನಗಲ್, ವಿದುಷಿ ಶಕುಂತಲಾ ನರಸಿಂಹನ್, ಉಭಯಗಾನ ವಿದುಷಿ ಶ್ಯಾಮಲಾ ಭಾವೆ, ಪಂಡಿತ್ ನರಸಿಂಹಲು ವಡವಟ್ಟಿ, ಪಂಡಿತ್ ಕುರುಡಿ ನಂದಕುಮಾರ್, ಪಂಡಿತ್ ನಾಗರಾಜ್ ಹವಾಲ್ದಾರ್, ಪಂಡಿತ್ ವಾಗೀಶ್ ಭಟ್, ಪಂಡಿತ್ ಡಾ. ಮೃತ್ಯುಂಜಯ ಶೆಟ್ಟರ್ ಮೊದಲಾದ ಅತಿರಥ ಮಹಾರಥರಿಗೆ ತಬಲಾ ಸಾಥ್ ನೀಡಿದ ಗೌರವಕ್ಕೆ ಪಾತ್ರರಾದ ಸತೀಶ್ ನಾಡಿನ ಅಗ್ರಮಾನ್ಯ ತಬಲಾವಾದಕರೆಂದು ಪ್ರಸಿದ್ಧರಾದರು. ಭಾರತದ ಉಪರಾಷ್ಟ್ರಪತಿಗಳಾಗಿದ್ದ ಬಿ.ಡಿ. ಜತ್ತಿ ಅವರಿಗೂ ಸತೀಶ್ ಅವರು ತಬಲಾ ಪಾಠ ಮಾಡಿದ್ದಾರೆ ಎಂಬುದು ಮರೆಯಲಾಗದ ಸ್ವಾರಸ್ಯಕರ ಸಂಗತಿ!
