ಕೃಷಿರಂಗವೇ ಹಾಗೇ. ಸಮತೋಲನದಲ್ಲಿ ಇದ್ದರೆ ಸುಗಮ. ಮಳೆ ಕಡಿಮೆಯಾದರೂ, ಹೆಚ್ಚಾದರೂ ಸಂಕಷ್ಟ ತಪ್ಪಿದ್ದಲ್ಲ. ಕರೊನಾ ಸೋಂಕು ಸೃಷ್ಟಿಸಿದ ಸ್ಥಿತ್ಯಂತರದಿಂದ ಕಳೆದ ಹದಿನೆಂಟು ತಿಂಗಳಿಂದ ಕೃಷಿಕ್ಷೇತ್ರ ಅನುಭವಿಸಿದ ಹಾನಿಯೂ ಅಗಾಧ. ಆದರೆ, ಈ ಬಾರಿ ಮುಂಗಾರು ಉತ್ತಮವಾಗಿದ್ದರಿಂದ ರೈತರಲ್ಲಿ ಸಂತಸ ಮನೆಮಾಡಿತ್ತು. ಅದರಂತೆ, ಬಿತ್ತನೆಯೂ ನಿರೀಕ್ಷಿತ ಪ್ರಮಾಣದಲ್ಲಿ ನಡೆಯಿತು. ಈ ಬಾರಿಯಾದರೂ ಒಂದಿಷ್ಟು ಆದಾಯ ದಕ್ಕಬಹುದೇನೋ ಎಂಬ ನಿರೀಕ್ಷೆಯಲ್ಲಿದ್ದರು ಬೆಳೆಗಾರರು. ಆದರೆ, ಸೆಪ್ಟೆಂಬರ್ ತಿಂಗಳ ಕೊನೆಯಲ್ಲಿ ಮತ್ತು ಅಕ್ಟೋಬರ್ನಲ್ಲಿ ಸುರಿದ ಅಕಾಲಿಕ ಹಾಗೂ ಭಾರಿ ಮಳೆ ರೈತರಿಗೆ ಭಾರಿ ಆಘಾತ ನೀಡಿದೆ. ಅಧಿಕ ಮಳೆಗೆ ಬಹುತೇಕ ಎಲ್ಲ ಬಗೆಯ ಬೆಳೆಗಳು ಆಹುತಿಯಾಗಿವೆ. ಫಸಲು ಕೈಗೆ ಸೇರುವ ಕೆಲ ದಿನಗಳ ಮುನ್ನ ಸಂಭವಿಸಿರುವ ಈ ನಷ್ಟದಿಂದ ರೈತರು ಚೇತರಿಸಿಕೊಳ್ಳುವುದಾದರೂ ಹೇಗೆ? ಆಹಾರಧಾನ್ಯಗಳು, ವಾಣಿಜ್ಯ ಬೆಳೆಗಳು, ತೋಟಗಾರಿಕೆ ಉತ್ಪನ್ನಗಳು ಹೀಗೆ ಎಲ್ಲ ಬಗೆಯ ಬೆಳೆಗಳನ್ನು ವರ್ಷಾಘಾತ ಆಹುತಿ ಪಡೆದಿದೆ.
