Indonesia rain video: ಕಳೆದ ಕೆಲವು ತಿಂಗಳುಗಳಿಂದ ಭೀಕರ ಕಾಡ್ಗಿಚ್ಚಿಗೆ ತುತ್ತಾಗಿ ನಲುಗಿಹೋಗಿದ್ದ ಇಂಡೋನೇಷ್ಯಾದಲ್ಲಿ ಹಠಾತ್ತನೆ ಸುರಿದ ಭಾರಿ ಮಳೆ ಜನರ ಮುಖದಲ್ಲಿ ನಗು ಮೂಡಿಸಿದೆ. ತಿಂಗಳುಗಳ ಕಾಲ ಬೆಂಕಿಯೊಂದಿಗೆ ಹೋರಾಡಿ ದಣಿದಿದ್ದ ಅಗ್ನಿಶಾಮಕ ಸಿಬ್ಬಂದಿ, ಮಳೆ ಬಂದ ತಕ್ಷಣ ಭಾವುಕರಾಗಿ ದೇವರಿಗೆ ಧನ್ಯವಾದ ಅರ್ಪಿಸಿದ ಹೃದಯಸ್ಪರ್ಶಿ ವಿಡಿಯೋ ಈಗ ಸಾಮಾಜಿಕ ಜಾಲತಾಣಗಳಲ್ಲಿ ವೈರಲ್ ಆಗಿದೆ.
ಇಂಡೋನೇಷ್ಯಾದ ಸೌತ್ ಕಾಲಿಮಂಟನ್ ಪ್ರಾಂತ್ಯದ ಬಂಜಾರ್ ರೆಜೆನ್ಸಿಯ ಅಸ್ತಂಬುಲ್ ಪ್ರದೇಶದಲ್ಲಿ ಕಳೆದ ಮೂರರಿಂದ ನಾಲ್ಕು ತಿಂಗಳಿಂದ ಭೀಕರ ಕಾಡ್ಗಿಚ್ಚು ಹಾಗೂ ಬರಗಾಲ ತಲೆದೋರಿತ್ತು. ವಿಶೇಷವೆಂದರೆ, ಸತತ 60 ದಿನಗಳಿಗೂ ಹೆಚ್ಚು ಕಾಲ ಈ ಭಾಗದಲ್ಲಿ ಒಂದು ಹನಿ ಮಳೆಯೂ ಬಿದ್ದಿರಲಿಲ್ಲ.
ಕಾಡ್ಗಿಚ್ಚಿನಿಂದ ನೀರಿನ ಕೊರತೆ
ಇನ್ನು, ಭೀಕರ ಕಾಡ್ಗಿಚ್ಚಿನ ಪರಿಣಾಮ ದಟ್ಟವಾದ ಹೊಗೆ, ವಿಪರೀತ ಸೆಕೆ ಹಾಗೂ ನೀರಿನ ತೀವ್ರ ಹಾಹಾಕಾರದ ನಡುವೆಯೂ ಅಲ್ಲಿನ ಅಗ್ನಿಶಾಮಕ ಸಿಬ್ಬಂದಿ ಹಾಗೂ ಸ್ವಯಂಸೇವಕರು ಹಗಲಿರುಳು ಕಷ್ಟಪಟ್ಟು ಕಾಡ್ಗಿಚ್ಚನ್ನು ನಂದಿಸಲು ಶ್ರಮಿಸುತ್ತಿದ್ದರು.
