ರಾಜ್ಯದಲ್ಲಿ 12,614 ಮದ್ಯದಂಗಡಿಗಳಿದ್ದು, ಸಾಮಾನ್ಯ ದಿನಗಳಲ್ಲಿ ಮದ್ಯ ಮಾರಾಟದಿಂದ ಸರ್ಕಾರಕ್ಕೆ 65-70 ಕೋಟಿ ರೂ. ಆದಾಯ ಬರುತ್ತದೆ. ಆದರೆ, ಮಾಜಿ ಪ್ರಧಾನಿ ಮನಮೋಹನ್ ಸಿಂಗ್ ನಿಧನ ಹಿನ್ನೆಲೆಯಲ್ಲಿ ಸರ್ಕಾರ, ಡಿ.27ರಂದು ರಜೆ ಘೋಷಿಸಿತ್ತು. 4ನೇ ಶನಿವಾರವೂ ರಜೆ ಇರುವುದರಿಂದ ಕೆಎಸ್ಬಿಸಿಎಲ್ ಡಿಪೋಗಳಿಂದ ಮದ್ಯ ಎತ್ತುವಳಿ ಮಾಡಿಕೊಳ್ಳಲು ಸಾಧ್ಯವಾಗಿರಲಿಲ್ಲ. ಆದರೆ, ಸತತ ರಜೆ ಹಿನ್ನೆಲೆಯಲ್ಲಿ ಮದ್ಯ ಎತ್ತುವಳಿಗೆ ಅವಕಾಶ ನೀಡುವಂತೆ ರಾಜ್ಯ ಮದ್ಯ ಮಾರಾಟಗಾರರ ಸಂಘದ ವಿನಂತಿ ಮೇರೆಗೆ ಕರ್ನಾಟಕ ರಾಜ್ಯ ಪಾನೀಯ ನಿಗಮ ನಿಯಮಿತ (ಕೆಎಸ್ಬಿಸಿಎಲ್) ಸಾಲ ಸೌಲಭ್ಯ(ಕ್ರೆಡಿಟ್ ಫೆಸಿಲಿಟಿ) ಆಧಾರದ ಮೇರೆಗೆ ಶನಿವಾರ ಮದ್ಯ ಎತ್ತುವಳಿಗೆ ಅನುಮತಿ ನೀಡಿದ್ದು, 327 ಕೋಟಿ ರೂ. ಮೌಲ್ಯದ 6 ಲಕ್ಷ ಬಾಕ್ಸ್ ಇಂಡಿಯನ್ ಮೇಡ್ ಲಿಕ್ಕರ್ (ಐಎಂಎಲ್) ಹಾಗೂ 80 ಕೋಟಿ ರೂ. ಮೌಲ್ಯದ 4 ಲಕ್ಷ ಬಾಕ್ಸ್ ಬಿಯರ್ ಎತ್ತುವಳಿಯಾಗಿದೆ.
