ಹುಲಿ ಪಕ್ಕ ಕಾರು ಚಲಾಯಿಸಿ ತೊಂದರೆಗೆ ಸಿಲುಕಿದ ರವೀನಾ ಟಂಡನ್..!​

ಮಧ್ಯಪ್ರದೇಶ: 'ಟಿಪ್​ ಟಿಪ್​ ಬರ್​ಸಾ ಪಾನಿ' ಹಾಡಿನ ಮೋಹಕ ನಟಿ ರವೀನಾ ಟಂಡನ್​ ಹುಲಿ ಪಕ್ಕ ಕಾರು ಚಲಾಯಿಸಿ ಸಮಸ್ಯೆಗೆ ಸಿಲುಕಿದ್ದಾರೆ.

ರವೀನಾ ಟಂಡನ್ ಇತ್ತೀಚೆಗೆ ಮಧ್ಯಪ್ರದೇಶದ ಸತ್ಪುರ ಹುಲಿ ಸಂರಕ್ಷಿತ ಪ್ರದೇಶದಲ್ಲಿ ಸಫಾರಿ ಮಾಡುವಾಗ ಹುಲಿಯ ಸಮೀಪದಲ್ಲಿ ಚಾಲನೆ ಮಾಡುತ್ತಿರುವ ವೀಡಿಯೊ ಆನ್‌ಲೈನ್‌ನಲ್ಲಿ ಕಾಣಿಸಿಕೊಂಡ ನಂತರ ತೊಂದರೆಗೆ ಸಿಲುಕಿದ್ದಾರೆ. ಈ ಬಗ್ಗೆ ಅರಣ್ಯ ಅಧಿಕಾರಿಗಳು ತನಿಖೆ ಆರಂಭಿಸಿದ್ದಾರೆ. ಆದರೆ ನಟಿಯ ನಿಕಟವರ್ತಿಗಳು 'ಸಫಾರಿ ಟ್ರ್ಯಾಕ್‌ನಿಂದ ಹೊರಕ್ಕೆ ರವೀನಾ ಕಾರು ಓಡಿಸಲಿಲ್ಲ. ಅದು ಪಕ್ಕದಲ್ಲೇ ಹಾದು ಹೋಗುತ್ತಿತ್ತು' ಎಂದು ತಿಳಿಸಿದ್ದಾರೆ. ವಿಚಿತ್ರ ಎಂದರೆ ಎಲ್ಲಾ ಸಫಾರಿ ವಾಹನಗಳು ಅರಣ್ಯ ಇಲಾಖೆಯಿಂದ ನಿಯೋಜಿಸಲಾದ ಚಾಲಕರು ಮತ್ತು ಮಾರ್ಗದರ್ಶಿಗಳು ಇರವ ಅಧಿಕೃತ ಜೀಪ್‌ಗಳಾಗಿವೆ.

ರವೀನಾ ಅವರು ಮಧ್ಯಪ್ರದೇಶದ ಸತ್ಪುರ ಹುಲಿ ಸಂರಕ್ಷಿತ ಪ್ರದೇಶಕ್ಕೆ ಇತ್ತೀಚೆಗೆ ಭೇಟಿ ನೀಡಿದ ವೀಡಿಯೊವನ್ನು ತಮ್ಮ ಟ್ವಿಟರ್​ ಖಾತೆಯಲ್ಲಿ ಪೋಸ್ಟ್ ಮಾಡಿದ್ದರು. ಮೀಸಲು ಪ್ರದೇಶಕ್ಕೆ ಭೇಟಿ ನೀಡಿದಾಗ ತೆಗೆದ ಹುಲಿಗಳ ಕೆಲವು ಛಾಯಾಚಿತ್ರಗಳನ್ನೂ ಅವರು ಹಂಚಿಕೊಂಡಿದ್ದರು. ಸಾಮಾಜಿಕ ಜಾಲತಾಣಗಳಲ್ಲಿ ವೈರಲ್ ಆಗಿರುವ ವಿಡಿಯೋದಲ್ಲಿ ಸಫಾರಿ ವಾಹನವು ಹುಲಿಯನ್ನು ಸಮೀಪಿಸುತ್ತಿರುವುದು ಕಾಣಬಹುದು. ಮೀಸಲು ಪ್ರದೇಶದಲ್ಲಿ ಹುಲಿ ಘರ್ಜಿಸುತ್ತಿರುವಂತೆ ಕ್ಯಾಮರಾ ಶಟರ್ ಸದ್ದು ವಿಡಿಯೋದಲ್ಲಿ ಕೇಳಿಬರುತ್ತಿದೆ.

ಅರಣ್ಯದ ಎಸ್‌ಡಿಒ ಆಗಿರುವ ಧೀರಜ್ ಸಿಂಗ್ ಚೌಹಾಣ್, ಮಂಗಳವಾರ ಹಿರಿಯ ಅಧಿಕಾರಿಗಳ ನಿರ್ದೇಶನದ ಮೇರೆಗೆ ಘಟನೆಯ ಕುರಿತು ತನಿಖೆ ಆರಂಭಿಸಿರುವುದಾಗಿ ತಿಳಿಸಿದ್ದಾರೆ. ನವೆಂಬರ್ 22 ರಂದು ರವೀನಾ ಟಂಡನ್ ಮೀಸಲು ಪ್ರದೇಶಕ್ಕೆ ಭೇಟಿ ನೀಡಿದಾಗ ಅವರು ಕಾರನ್ನು ಹುಲಿಯ ಹತ್ತಿರಕ್ಕೆ ತೆಗೆದುಕೊಂಡು ಹೋಗಿದ್ದಾರೆ ಎಂದು ಆರೋಪಿಸಲಾಗಿದೆ.

ವಾಹನದ ಚಾಲಕ ಮತ್ತು ಹಾಜರಿದ್ದ ಮಾರ್ಗದರ್ಶಕರಿಗೆ ನೋಟಿಸ್ ನಿಡಿ ವಿಚಾರಣೆ ನಡೆಸಿ ಮುಂದಿನ ಕ್ರಮಕ್ಕಾಗಿ ತನಿಖಾ ವರದಿಯನ್ನು ಹಿರಿಯ ಅಧಿಕಾರಿಗಳಿಗೆ ನೀಡಲಾಗುವುದು ಎಂದು ಅಧಿಕಾರಿಗಳು ಹೇಳಿದ್ದಾರೆ.

ರವೀನಾ ವನ್ಯಜೀವಿ ಪ್ರೇಮಿಯಾಗಿದ್ದು ಆಗಾಗ ದೇಶಾದಾದ್ಯಂತ ಇರುವ ಸಫಾರಿಗಳಲ್ಲಿ ಪ್ರಯಾಣಿಸುತ್ತಾರೆ. ಈ ತಿಂಗಳ ಆರಂಭದಲ್ಲಿ, ರವೀನಾ ಟಂಡನ್ ವೀಡಿಯೊವನ್ನು ಪೋಸ್ಟ್ ಮಾಡಿದ್ದರು. ಈ ಹಿಂದೆ ಕೆಲವು ದುಷ್ಕರ್ಮಿಗಳು ಉದ್ಯಾನವನದ ಹುಲಿ ಆವರಣದ ಮೇಲೆ ಕಲ್ಲುಗಳನ್ನು ಎಸೆಯುತ್ತಿದ್ದಾರೆ ಎಂದು ರಾಜ್ಯ ರಾಜಧಾನಿ ಭೋಪಾಲ್‌ನಲ್ಲಿರುವ ವಾನ್ ವಿಹಾರ್ ರಾಷ್ಟ್ರೀಯ ಉದ್ಯಾನವನದ ಅಧಿಕಾರಿಗಳು ತನಿಖೆಯನ್ನು ಪ್ರಾರಂಭಿಸಲು ಪ್ರೇರೇಪಿಸಿದ್ದರು. ನಟಿ ಈ ವಿಡಿಯೋವನ್ನು ಪೋಸ್ಟ್ ಮಾಡಿದ ನಂತರ ಘಟನೆ ಕುರಿತು ಉದ್ಯಾನವನದ ಆಡಳಿತ ಮಂಡಳಿ ತನಿಖೆಗೆ ಆದೇಶಿಸಿದೆ. (ಏಜೆನ್ಸೀಸ್​)