ಒಡಿಶಾದಲ್ಲಿ ಪತ್ತೆಯಾಯಿತು ಅಪರೂಪದ ಹಳದಿ ಬಣ್ಣದ ಆಮೆ

ಬಾಲಾಸೋರ್​: ಕೆಲದಿನಗಳ ಹಿಂದೆ ಮಳೆಗಾಲದಲ್ಲಿ ಸಂಗಾತಿಯನ್ನು ಆಕರ್ಷಿಸಲು ಕಪ್ಪೆಗಳು ಹಳದಿ ಬಣ್ಣಕ್ಕೆ ತಿರುಗುವ ಸಂಗತಿಯನ್ನು ಓದಿದ್ದಿರಿ. ಆದರೆ ಈಗ ಆಮೆಯ ಸರದಿ.

ಓಡಿಶಾದ ಬಾಲಾಸೋರ್​ನ ಸುಜಾನ್​ಪುರ ಗ್ರಾಮದ ನಿವಾಸಿಗಳು ಅತ್ಯಂತ ಅಪರೂಪದ ಹಳದಿ ಬಣ್ಣದ ಆಮೆಯೊಂದನ್ನು ಪತ್ತೆ ಮಾಡಿದ್ದಾರೆ. ಹಾಗೆಂದು ಮಳೆಗಾಲದಲ್ಲಿ ಸಂಗಾತಿಯನ್ನು ಆಕರ್ಷಿಸಲು ಮೈಬಣ್ಣ ಬದಲಿಸಿಕೊಳ್ಳುವ ಕಪ್ಪೆಗಳಂತೆ ಇದು ತನ್ನ ಮೈಬಣ್ಣವನ್ನು ಬದಲಿಸಿಕೊಂಡಿಲ್ಲ. ಬದಲಿಗೆ ಅದು ಇರುವುದೇ ಹಾಗೆ.

ಗ್ರಾಮಸ್ಥರು ಈ ಆಮೆಯನ್ನು ಅರಣ್ಯ ಇಲಾಖೆಯ ಅಧಿಕಾರಿಗಳ ವಶಕ್ಕೆ ಒಪ್ಪಿಸಿದ್ದಾರೆ. ಅಧಿಕಾರಿಗಳ ಪ್ರಕಾರ ಈ ಆಮೆಯು ಚರ್ಮ ಬಿಳಿಚುವಿಕೆ (Albino) ರೋಗದಿಂದ ಬಳಲುತ್ತಿರಬಹುದು. ಇದರ ಕಣ್ಣು ಕೂಡ ನಸುಗೆಂಪು ಬಣ್ಣದಿಂದ ಕೂಡಿದೆ. ಇದು ಕೂಡ ಚರ್ಮದ ಬಿಳಿಚುವಿಕೆಯ ರೋಗದ ಲಕ್ಷಣವಾಗಿದೆ ಎಂದು ವಿವರಿಸಿದ್ದಾರೆ.

ಇದನ್ನೂ ಓದಿ: ದೇಶದಲ್ಲಿ ಕರೊನಾ ವೈರಾಣು ಸೋಂಕು ಸಾಮುದಾಯಿಕವಾಗಿ ಹಬ್ಬುತ್ತಿದೆ, ಸತ್ಯ ಒಪ್ಪಿಕೊಳ್ಳಲು ಹಿಂದೇಟು

ಹಳದಿ ಬಣ್ಣದ ಆಮೆಯ ಬಗ್ಗೆ ಹೆಚ್ಚಿನ ಮಾಹಿತಿ ನೀಡಿರುವ ವನ್ಯಜೀವಿಗಳ ವಾರ್ಡನ್​ ಭಾನುಮಿತ್ರಾ ಆಚಾರ್ಯ, ಆಮೆಯ ಚಿಪ್ಪು ಮತ್ತು ದೇಹವಿಡೀ ಹಳದಿ ಬಣದ್ದಾಗಿದೆ. ಇಂಥ ಆಮೆಯನ್ನು ನಾನು ಹಿಂದೆಂದೂ ನೋಡಿರಲಿಲ್ಲ ಎಂದು ಹೇಳಿದ್ದಾರೆ.

ಕಳೆದ ತಿಂಗಳು ಒಡಿಶಾದ ಮಯೂರಭ್​ಗಂಜ್​ ಜಿಲ್ಲೆಯ ಡ್ಯೂಲಿ ಅಣೆಕಟ್ಟಿನಲ್ಲಿ ಅತ್ಯಂತ ಅಪರೂಪದ ಟ್ರಿಯಾನ್​ಚಿಡೇ ಆಮೆಯೊಂದು ಪತ್ತೆಯಾಗಿತ್ತು. ಸಾಮಾನ್ಯವಾಗಿ ಆಮೆಗಳ ಚಿಪ್ಪು ಗಟ್ಟಿಯಾಗಿರುತ್ತದೆ. ಆದರೆ, ಈ ಆಮೆಯ ಚಿಪ್ಪು ತುಂಬಾ ಮೆದುವಾಗಿರುತ್ತದೆ. ಇಂಥ ಆಮೆಗಳು ಆಫ್ರಿಕಾ, ಏಷ್ಯಾ ಮತ್ತು ಉತ್ತರ ಅಮೆರಿಕದಲ್ಲಿ ಹೆಚ್ಚಾಗಿ ಕಂಡುಬರುತ್ತವೆ.

https://www.vijayavani.net/bubey-bail-court-suprpised/