ಅತ್ಯಾಚಾರ ಆರೋಪಿ ಸೆಂಟ್ರಲ್​ ಜೈಲ್​ನಿಂದಲೇ ಪರಾರಿ! ಹಿಂದೆಯೂ ಒಮ್ಮೆ ಜೈಲಿಂದ ಎಸ್ಕೇಪ್​ ಆಗಿದ್ದ..

ಪಣಜಿ: ಅತ್ಯಾಚಾರದ ಆರೋಪ ಹೊಂದಿದ್ದ ಕೈದಿಯೊಬ್ಬ ಸೆಂಟ್ರಲ್​ ಜೈಲ್​ನಿಂದಲೇ ಪರಾರಿಯಾಗಿರುವ ಅಪರೂಪದ ಪ್ರಸಂಗ ವರದಿಯಾಗಿದೆ. ವಿದೇಶಿ ಯುವತಿಯ ಮೇಲೆ ಅತ್ಯಾಚಾರ ನಡೆಸಿದ ಆರೋಪ ಇವನ ಮೇಲಿದೆ.

ತಮಿಳುನಾಡು ಮೂಲದ ರಾಮಚಂದ್ರನ್​ ಚೆನ್ನಂಡಾಯೆಲ್ಲಪ್ಪ ಎಂಬ ಈ ಆರೋಪಿ ಗೋವಾದ ಕೇಂದ್ರ ಕಾರಾಗೃಹದಿಂದ ಮಂಗಳವಾರ ಪರಾರಿಯಾಗಿದ್ದಾನೆ. ಈತ 2018ರ ಡಿಸೆಂಬರ್​ನಲ್ಲಿ ದಕ್ಷಿಣ ಗೋವಾ ಜಿಲ್ಲೆಯ ಕೆನಕೊನಾ ಎಂಬಲ್ಲಿ ಬ್ರಿಟಿಷ್​ ಯುವತಿ ಮೇಲೆ ಅತ್ಯಾಚಾರ ನಡೆಸಿದ್ದ ಬಗ್ಗೆ ಪ್ರಕರಣ ದಾಖಲಾಗಿದೆ. ಈತನ ಪತ್ತೆಗೆ ತೀವ್ರ ಶೋಧ ನಡೆಸಲಾಗುತ್ತಿದೆ ಎಂದು ಹಿರಿಯ ಪೊಲೀಸ್​ ಅಧಿಕಾರಿಗಳು ತಿಳಿಸಿದ್ದಾರೆ.

ಅಂದಹಾಗೆ ಈ ಆರೋಪಿ ಜೈಲಿನಿಂದ ಪರಾರಿ ಆಗುತ್ತಿರುವುದು ಇದೇ ಮೊದಲೇನಲ್ಲ. 2019ರ ಜುಲೈನಲ್ಲೂ ಈತ ಜೈಲ್​ನಿಂದ ಪರಾರಿಯಾಗಿದ್ದು, ಬಳಿಕ ತಮಿಳುನಾಡು ಪೊಲೀಸರು ಈತನನ್ನು ಮತ್ತೆ ಬಂಧಿಸಿ ಸೆರೆಮನೆಗೆ ತಳ್ಳಿದ್ದರು ಎಂದು ಪೊಲೀಸ್​ ಮೂಲಗಳು ತಿಳಿಸಿವೆ. (ಏಜೆನ್ಸೀಸ್)