ಬಜೆಟ್ನಲ್ಲಿ ರಾಮಮಂದಿರ ನಿರ್ಮಾಣ ಘೋಷಣೆ ಆಗುತ್ತಿದ್ದಂತೆ ಮಂದಿರ ನಿರ್ಮಾಣ ಸಮಿತಿ ನೇಮಕ ಮಾಡಲು ಜಿಲ್ಲಾ ಉಸ್ತುವಾರಿ ಸಚಿವರೂ ಆದ ಡಾ.ಸಿ.ಎನ್.ಅಶ್ವತ್ಥನಾರಾಯಣ ಅವರು ಜಿಲ್ಲಾಧಿಕಾರಿಗೆ ಸೂಚನೆ ನೀಡಿದ್ದರು. ತಮ್ಮನ್ನೂ ಒಳಗೊಂಡಂತೆ ಶಾಸಕಿ ಅನಿತಾ ಕುಮಾರಸ್ವಾಮಿ, ಗೌತಮ್ಗೌಡ, ಕೇತೋಹಳ್ಳಿ ಶಂಕರಪ್ಪ, ಜಿ.ವಿ.ಪದ್ಮನಾಭ್, ನರಸಿಂಹಯ್ಯ, ಶೇಷಾದ್ರಿ ಅಯ್ಯರ್, ಡಿ.ಶ್ರೀನಿವಾಸ್ ಎನ್ನುವವರನ್ನು ನೇಮಕ ಮಾಡುವಂತೆ ಶಿಫಾರಸು ಮಾಡಿದ್ದರು. ಆದರೆ, ರಾಮನಗರಕ್ಕೆ ಸಂಬಂಧವೇ ಇಲ್ಲದ ಗೌತಮ್ಗೌಡರನ್ನು ಸಮಿತಿಗೆ ಶಿಫಾರಸು ಮಾಡಿರುವುದು ಮೂಲ ಕಾರ್ಯಕರ್ತರ ಆಕ್ರೋಶಕ್ಕೆ ಕಾರಣವಾಗಿತ್ತು. ಇದಾದ ನಂತರ ಫೆ.24ರಂದು ಮತ್ತೆ ಪತ್ರ ಬರೆಯುವ ಮೂಲಕ ಸಮಿತಿ ರದ್ದುಪಡಿಸುವಂತೆಯೂ ಸಚಿವರು ಸೂಚನೆ ನೀಡಿದ್ದರು. ಈ ನಡೆ ಅಸಮಧಾನಿತರ ಕೋಪ ತಣ್ಣಗೆ ಮಾಡುತ್ತದೆ ಎನ್ನುವ ನಂಬಿಕೆ ಹುಸಿಯಾಗಿದೆ. ಇದು ಮಾ.4ರಂದು ರಾಮನಗರದಲ್ಲಿ ನಡೆದ ವಿಜಯ ಸಂಕಲ್ಪ ಯಾತ್ರೆಯಲ್ಲಿ ಬಹಿರಂಗಗೊಂಡಿದೆ.
