Save the Vote Rally: ದೆಹಲಿಯ ರಾಮಲೀಲಾ ಮೈದಾನದಲ್ಲಿ ನವೆಂಬರ್ 1ರಂದು ನಡೆಯಲಿರುವ ಬೃಹತ್ 'ಸೇವ್ ದಿ ವೋಟ್' ರ್‍ಯಾಲಿಗೂ ಮುನ್ನ, ಲೋಕಸಭೆ ವಿಪಕ್ಷ ನಾಯಕ ರಾಹುಲ್ ಗಾಂಧಿ 'ಎಕ್ಸ್'ನಲ್ಲಿ ‘ಸತ್ಯಂ ಶಿವಂ ಸುಂದರಂ’ ಎಂದು ಪೋಸ್ಟ್ ಮಾಡಿದ್ದಾರೆ.
ಈ ಪೋಸ್ಟ್‌ನಲ್ಲಿ ಕಪ್ಪು ಹಿನ್ನೆಲೆಯ ಮೇಲೆ ಮೂರು ಬಿಳಿ ಗೆರೆಗಳು ಹಾಗೂ ಮಧ್ಯದಲ್ಲಿ ಕೆಂಪು ತಿಲಕವಿರುವ ಗ್ರಾಫಿಕ್ಸ್‌ ಇದ್ದು, ಇದು ಲಾರ್ಡ್ ಶಿವನ 'ತ್ರಿಪುಂಡ್ರ ತಿಲಕ್'ನಂತೆ ಕಾಣುತ್ತದೆ.
ಪ್ರತಿಭಟನೆಯನ್ನು ಶಿವನ ತಾಂಡವಕ್ಕೆ ಹೋಲಿಕೆ
ಇತ್ತೀಚೆಗೆ ಮುಖ್ಯ ಚುನಾವಣಾ ಆಯುಕ್ತ (ಸಿಇಸಿ) ಜ್ಞಾನೇಶ್ ಕುಮಾರ್ ವಿರುದ್ಧ ನಡೆದ ಪ್ರತಿಭಟನೆಯನ್ನು ರಾಹುಲ್ ಗಾಂಧಿ ಅವರು 'ಶಿವನ ತಾಂಡವ'ಕ್ಕೆ ಹೋಲಿಸಿದ್ದರು. ಈ ಹೋರಾಟಕ್ಕೆ ಯಾವುದೇ ಪೂರ್ವಯೋಜಿತ ಪ್ಲಾನ್ ಬೇಕಿಲ್ಲ. ಇದು ನಿರಂತರವಾಗಿ ಸಾಗುವ ಶಿವನ ಮೆರವಣಿಗೆಯಂತೆ, ಯಾರು ಬೇಕಾದರೂ ಇದರಲ್ಲಿ ಭಾಗಿಯಾಗಬಹುದು ಎಂದಿದ್ದರು. ಇದಕ್ಕೂ ಮುನ್ನ ಸಂಸತ್ತಿನಲ್ಲಿ ಶಿವನ ಚಿತ್ರ ಪ್ರದರ್ಶಿಸಿ ಅಭಯಮುದ್ರೆ ಹಾಗೂ ನಿರ್ಭಯತೆಯ ಮಹತ್ವವನ್ನೂ ಅವರು ವಿವರಿಸಿದ್ದರು.
ನವೆಂಬರ್ 1ರಂದು ದೆಹಲಿ ಚಲೋ ಕರೆ
ಮತದಾರರ ಪಟ್ಟಿಯಿಂದ ಹೆಸರುಗಳನ್ನು ಅಕ್ರಮವಾಗಿ ತೆಗೆದುಹಾಕಲಾಗುತ್ತಿದೆ ಮತ್ತು ನಿಯಮಗಳನ್ನು ಉಲ್ಲಂಘಿಸಲಾಗುತ್ತಿದೆ ಎಂದು ರಾಹುಲ್ ಗಾಂಧಿ ಆರೋಪಿಸಿದ್ದಾರೆ. ನಮ್ಮ ಮತಗಳನ್ನು ಕದಿಯಲಾಗುತ್ತಿದ್ದು, ಇದನ್ನು ನಾವು ಸುಮ್ಮನೆ ಸಹಿಸುವುದಿಲ್ಲ ಎಂದು ಹೇಳಿದ್ದಾರೆ.
