ನಟಿ ಕೀರ್ತಿ ಸುರೇಶ್ ಹಾಗೂ ರಾಧಿಕಾ ಆಪ್ಟೆ ಪ್ರಮುಖ ಪಾತ್ರಗಳಲ್ಲಿ ಅಭಿನಯಿಸಿರುವ ಬಹುನಿರೀಕ್ಷಿತ 'ಅಕ್ಕ' (Akka) ವೆಬ್ ಸರಣಿಯು ಶೀಘ್ರದಲ್ಲೇ ಬಿಡುಗಡೆಯಾಗಲಿದೆ. ಈ ಸರಣಿಯಲ್ಲಿ ಇಬ್ಬರು ಬಲಶಾಲಿ ಮಹಿಳಾ ಪಾತ್ರಗಳ ನಡುವಿನ ಸಂಘರ್ಷವನ್ನು ತೋರಿಸಲಾಗಿದ್ದು, ಚಿತ್ರೀಕರಣದ ವೇಳೆ ನಿಮ್ಮಿಬ್ಬರ ನಡುವೆ ಅಥವಾ ಮಹಿಳಾ ಕಲಾವಿದರ ನಡುವೆ ಜಗಳಗಳು ಅಥವಾ ವಾಗ್ವಾದಗಳು ನಡೆದಿದ್ದವೇ ಎಂದು ನಿರೂಪಕರು ಪ್ರಶ್ನಿಸಿದ್ದರು. ಈ ಪ್ರಶ್ನೆಗೆ ಉತ್ತರಿಸಿದ ರಾಧಿಕಾ, "ಮಹಿಳೆಯರು ಒಂದೆಡೆ ಸೇರಿದರೆ ಜಗಳವಾಡುತ್ತಾರೆ ಎನ್ನುವುದು ಅತ್ಯಂತ ಹಳೆಯ ಕಲ್ಪನೆ. ಇಂತಹ ಪ್ರಶ್ನೆಯನ್ನು ಕೇಳಿ ತುಂಬಾ ದಿನಗಳಾಗಿತ್ತು, ಏಕೆಂದರೆ ಈ ರೀತಿಯ ಆಲೋಚನೆಗೆ ಮತ್ತು ವಾಸ್ತವಕ್ಕೆ ಯಾವುದೇ ಸಂಬಂಧವಿಲ್ಲ ಎಂದು ಖಡಕ್ಕಾಗಿ ಪ್ರತಿಕ್ರಿಯಿಸಿದ್ದಾರೆ.
ಇದೇ ವೇಳೆ ಪುರುಷರ ಮಾನಸಿಕತೆಯ ಕುರಿತೂ ಮುಕ್ತವಾಗಿ ಮಾತನಾಡಿದ ರಾಧಿಕಾ, ಪ್ರಾಮಾಣಿಕವಾಗಿ ಹೇಳಬೇಕೆಂದರೆ, ನಾನು ಮಹಿಳೆಯರಿಗಿಂತ ಪುರುಷರಲ್ಲೇ ಹೆಚ್ಚಿನ ಅಭದ್ರತೆಯನ್ನು ಕಂಡಿದ್ದೇನೆ ಎಂದು ಹೇಳಿದ್ದಾರೆ. ಆದರೆ, ಇದನ್ನು ಕೇವಲ ಲಿಂಗಾಧಾರಿತ ವಿಷಯವನ್ನಾಗಿ ನೋಡದೆ, ಇದು ಸಂಪೂರ್ಣವಾಗಿ ವೈಯಕ್ತಿಕ ನಡವಳಿಕೆ, ಪರಸ್ಪರ ಸಹಕಾರ ಮತ್ತು ವ್ಯಕ್ತಿಗತ ಸಂಬಂಧಗಳಿಗೆ ಸಂಬಂಧಿಸಿದ್ದು ಎಂದಿದ್ದಾರೆ. ನಾವು ಕೆಲವು ಜನರೊಂದಿಗೆ ತಕ್ಷಣ ಬೆರೆಯುತ್ತೇವೆ, ಇನ್ನು ಕೆಲವರೊಂದಿಗೆ ಅಷ್ಟಾಗಿ ಹೊಂದಿಕೊಳ್ಳಲು ಸಾಧ್ಯವಾಗುವುದಿಲ್ಲ. ಸಹೋದ್ಯೋಗಿಗಳ ನಡುವಿನ ಬಾಂಧವ್ಯವು ಅವರು ಗಂಡೋ ಅಥವಾ ಹೆಣ್ಣೋ ಎಂಬುದರ ಮೇಲೆ ನಿರ್ಧಾರವಾಗುವುದಿಲ್ಲ, ಬದಲಿಗೆ ವ್ಯಕ್ತಿಗಳ ಗುಣಸ್ವಭಾವ ಮತ್ತು ಪರಸ್ಪರ ಕೊಡುವ ಗೌರವದ ಮೇಲೆ ಆಧಾರಿತವಾಗಿರುತ್ತದೆ" ಎಂದು ಅವರು ಸ್ಪಷ್ಟಪಡಿಸಿದ್ದಾರೆ.
ತಮ್ಮ ಹೊಸ ವೆಬ್ ಸರಣಿ 'ಅಕ್ಕ' ಚಿತ್ರೀಕರಣದ ಅನುಭವಗಳನ್ನು ಹಂಚಿಕೊಂಡ ನಟಿ, ಶೂಟಿಂಗ್ ಸೆಟ್‌ನಲ್ಲಿ ಅತ್ಯಂತ ಆರೋಗ್ಯಕರ ಹಾಗೂ ಸೌಹಾರ್ದಯುತ ವಾತಾವರಣವಿತ್ತು ಎಂದು ನೆನಪಿಸಿಕೊಂಡಿದ್ದಾರೆ. ಈ ಯೋಜನೆಯಲ್ಲಿ ನಟಿಯರಷ್ಟೇ ಅಲ್ಲದೆ, ಹಿನ್ನೆಲೆ ತಾಂತ್ರಿಕ ವರ್ಗದಲ್ಲೂ ಪುರುಷರು ಮತ್ತು ಮಹಿಳೆಯರು ಸಮಾನ ಸಂಖ್ಯೆಯಲ್ಲಿದ್ದರು. ಅನೇಕ ಮಹಿಳಾ ತಂತ್ರಜ್ಞರು ಶೂಟಿಂಗ್ ಸೆಟ್‌ನಲ್ಲಿ ಕಾರ್ಯನಿರ್ವಹಿಸುತ್ತಿದ್ದರು. ಪ್ರತಿಯೊಬ್ಬರೂ ಪರಸ್ಪರ ಬೆಂಬಲವಾಗಿ ನಿಂತು ಕೆಲಸ ಮಾಡಿದ್ದರಿಂದ, ಯಾವುದೇ ರೀತಿಯ ಅಡಚಣೆಗಳಿಲ್ಲದೆ ಅತ್ಯಂತ ಕಂಫರ್ಟಬಲ್ ಆಗಿ ಹಾಗೂ ಸಂತೋಷದಿಂದ ಕೆಲಸ ಮಾಡಲು ಸಾಧ್ಯವಾಯಿತು ಎಂದು ಅವರು ತಿಳಿಸಿದ್ದಾರೆ.
