VIDEO| ಟ್ರಾಫಿಕ್​ ಸಿಗ್ನಲ್​ನಲ್ಲಿ ಸವಾರರ ಮುಂದೆ ಸೊಂಟ ಬಳುಕಿಸಿದ ಯುವತಿಗೆ ಪೊಲೀಸ್​ ಇಲಾಖೆ ಶಾಕ್​..!

ಇಂದೋರ್​: ಟಿಕ್​ಟಾಕ್​ನಂತಹ ವಿಡಿಯೋ ಕ್ರೇಜ್​ ಹುಟ್ಟಿಕೊಂಡಾಗಿನಿಂದ ಯುವಕರಿಂದಿಡಿದು ವಯಸ್ಸಾದ ವ್ಯಕ್ತಿಯವರೆಗೂ ಎಲ್ಲರೂ ಸ್ವಯಂ ವಿಡಿಯೋ ಮಾಡುವ ಗೀಳಿಗೆ ಬಿದ್ದಿದ್ದಾರೆ. ಎಷ್ಟರಮಟ್ಟಿಗೆ ಅಂದ್ರೆ ಸಾಮಾಜಿಕ ಜಾಲತಾಣದಲ್ಲಿ ವಿಡಿಯೋಗಳ ಭರಾಟೆ ಭಾರೀ ಜೋರಾಗಿದೆ. ಆದರೆ, ಕೆಲವೊಮ್ಮೆ ಅತಿರೇಕದ ವಿಡಿಯೋಗಳು ನಮ್ಮ ಕಣ್ಣ ಮುಂದೆ ಬಂದು ಹೋಗಿವೆ.

ಮಧ್ಯಪ್ರದೇಶದ ಇಂದೋರ್​ನಲ್ಲಿ ಯುವತಿಯೊಬ್ಬಳು ಟ್ರಾಫಿಕ್​ ಸಿಗ್ನಲ್​ನಲ್ಲಿ ಡ್ಯಾನ್ಸ್​ ಮಾಡಿರುವ ವಿಡಿಯೋ ಇದೀಗ ವೈರಲ್​ ಆಗಿದ್ದು, ಪರ-ವಿರೋಧದ ಚರ್ಚೆ ಕೇಳಿಬರುತ್ತಿದೆ. ಇಂದೋರ್​ನ ವಾಹನನಿಬಿಡ ರಸ್ತೆ ರಾಸೊಮಾ ಸ್ಕ್ವೇರ್​ನ ಟ್ರಾಫಿಕ್​ ಸಿಗ್ನಲ್​ ಬಳಿ ಯುವತಿ ಸೊಂಟ ಬಳುಕಿಸಿದ್ದಾಳೆ.

ರಸ್ತೆಯ ಮಧ್ಯೆ ಯುವತಿ ಡ್ಯಾನ್ಸ್​ ಮಾಡುವುದನ್ನು ನೋಡಿದ ಸವಾರರು ಇದು ಪೊಲೀಸ್​ ಇಲಾಖೆಯ ಅಭಿಯಾನ ಇರಬಹುದು ಎಂದು ತಪ್ಪಾಗಿ ಅರ್ಥೈಸಿಕೊಂಡರು. 30 ಸೆಕೆಂಡ್​ ವಿಡಿಯೋದಲ್ಲಿ ರೆಡ್​ ಸಿಗ್ನಲ್​ ಬೀಳುತ್ತಿದ್ದಂತೆ ಝೀಬ್ರಾ ಕ್ರಾಸಿಂಗ್​ ಬಳಿ ಬರುವ ಯುವತಿ ಶ್ರೇಯಾ ಕಾರ್ಲಾ ಗ್ರೀನ್​ ಸಿಗ್ನಲ್​ ಬೀಳುವವರೆಗೂ ಹಾಡೊಂದಕ್ಕೆ ಡ್ಯಾನ್ಸ್​ ಮಾಡಿದ್ದಾಳೆ. ಆಕೆ ಮಾಡೆಲ್​ ಎಂದು ತಿಳಿದುಬಂದಿದೆ. ಇನ್ನು ವಿಡಿಯೋದಲ್ಲಿ ಸರಿಯಾಗಿ ಮಾಸ್ಕ್​ ಧರಿಸುವಂತಲೂ ಯುವತಿ ಮನವಿ ಮಾಡಿದ್ದಾಳೆ.

ವಿಡಿಯೋ ನೋಡಿರುವ ಪೊಲೀಸ್​ ಅಧಿಕಾರಿಗಳು ಯುವತಿಯ ನಡೆಯಿಂದ ಅಸಮಾಧಾನಗೊಂಡಿದ್ದು ಇದು ಸಂಚಾರಿ ನಿಯಮ ಉಲ್ಲಂಘನೆ ಎಂದು ನೋಟಿಸ್​ ಕಳುಹಿಸಿದ್ದಾರೆ. ಈ ರೀತಿಯಾಗಿ ವರ್ತಿಸಬೇಡಿ ಎಂದು ಸಂಚಾರ ವಿಭಾಗ ಕೂಡ ಯುವ ಜನಾಂಗದಲ್ಲಿ ಮನವಿ ಮಾಡಿಕೊಂಡಿದೆ. ನಿಮ್ಮ ಮನರಂಜನೆ ಬೇರೆಯವರಿಗೆ ಹಾನಿ ಉಂಟು ಮಾಡಬಹುದು ಎಂದಿದೆ.

ನೋಟಿಸ್​ ನೀಡಿರುವ ಬಗ್ಗೆ ಪ್ರತಿಕ್ರಿಯೆ ನೀಡಿರುವ ಯುವತಿ ಶ್ರೇಯಾ, ನಾನು ಸಂಚಾರ ನಿಯಮವನ್ನು ಉಲ್ಲಂಘನೆ ಮಾಡಿಲ್ಲ ಎಂದಿದ್ದಾಳೆ. ವಿಡಿಯೋ ಹಿಂದೆ ರೆಡ್​ ಸಿಗ್ನಲ್​ ಬಿದ್ದಾಗ ವಾಹನಗಳನ್ನು ನಿಲ್ಲಿಸಬೇಕು ಮತ್ತು ಮಾಸ್ಕ್​ ಧರಿಸುವ ಬಗ್ಗೆ ಜಾಗೃತಿ ಮೂಡಿಸುವ ಉದ್ದೇಶವಿದೆಯೋ ಹೊರತು ಬೇರೇನೂ ಇಲ್ಲ. ನನ್ನ ಹಾಗೇ ಮಾಡುವಂತೆ ನಾನು ಯಾರಿಗೂ ಪ್ರಭಾವ ಬೀರಿಲ್ಲ ಎಂದು ಸಮಜಾಯಿಷಿ ನೀಡಿದ್ದಾಳೆ. (ಏಜೆನ್ಸೀಸ್​)

https://www.vijayavani.net/r-the-good-karma-that-saved-sai-dharam-tej/

https://www.vijayavani.net/r-viral-video-woman-constables-resignation-accepted-after-she-made-instagram-reels-with-revolver/

https://www.vijayavani.net/r-motogp-racer-miguel-oliveira-marries-his-pregnant-step-sister-after-keeping-relationship-under-wraps-for-11-years/