ಮಾವೋವಾದಿ ಕಾರ್ಯಕರ್ತರಿಂದಲೇ ನಕ್ಸಲ್ ನಾಯಕನ ಹತ್ಯೆ!

ಬಿಜಾಪುರ: ಛತ್ತೀಸ್‌ಗಢದ ಬಿಜಾಪುರ ಜಿಲ್ಲೆಯಲ್ಲಿ ಮಾವೋವಾದಿಗಳ ನಡುವೆ ಪರಸ್ಪರ ಗುಂಡಿನ ಕಾಳಗ ನಡೆದಿದ್ದು, ಗುಂಪಿನ ಕಾರ್ಯಕರ್ತರೇ ನಾಯಕನನ್ನು ಕೊಲೆ ಮಾಡಿದ್ದಾರೆ.

ನಕ್ಸಲರ ವಿಭಾಗೀಯ ಸದಸ್ಯ ಮೋಡಿಯಂ ವಿಜ್ಜಾ ಹತನಾದ ನಕ್ಸಲ. ಮೋಡಿಯಂ ವಿಜ್ಜಾ ಬಿಜಾಪುರ ಜಿಲ್ಲೆಯಲ್ಲಿ ನಡೆದ ಅನೇಕ ನಕ್ಸಲ ಚಟುವಟಿಕೆಗಳಲ್ಲಿ ಪ್ರಮುಖ ಪಾತ್ರ ವಹಿಸಿದ್ದ. ಅನೇಕರ ಹತ್ಯೆಗೆ ಕಾರಣನಾಗಿದ್ದ. ಈತನನ್ನು ಹಿಡಿದುಕೊಡುವವರಿಗೆ 8 ಲಕ್ಷ ರೂಪಾಯಿ ಬಹುಮಾನವನ್ನು ಘೋಷಿಸಲಾಗಿತ್ತು.

ಆದರೆ ಶುಕ್ರವಾರ ಅವರದೇ ಗುಂಪಿನಲ್ಲಿ ಜಗಳವಾಗಿದ್ದು, ಆತ ಸಾವಿಗೀಡಾಗಿದ್ದಾನೆ. ಈ ವಿಚಾರವಾಗಿ ಹೆಚ್ಚಿನ ವಿಚಾರಣೆಯನ್ನು ನಡೆಸುತ್ತಿರುವುದಾಗಿ ಬಸ್ತರ್ ಶ್ರೇಣಿಯ ಪೊಲೀಸ್ ಇನ್‌ಸ್ಪೆಕ್ಟರ್ ಜನರಲ್ ಪಿ. ಸುಂದರ್‌ರಾಜ್ ತಿಳಿಸಿದ್ದಾರೆ.