20:20ನೂ ಅಲ್ಲ, ಟೆಸ್ಟ್​ ಮ್ಯಾಚೂ ಅಲ್ಲ... ಇದೋ ನೋಡಿ ಕ್ವಾರಂಟೈನ್​ ಕ್ರಿಕೆಟ್​

ಜಮ್ಮು: ಕರೊನಾ ಸೋಂಕಿತರು, ಶಂಕಿತರು ಹಲವು ದಿನಗಳ ಕಾಲ ಎಲ್ಲಿಯೂ ಹೊರ ಹೋಗದೇ ಒಂದೇ ಕಡೆ ಕುಳಿತಿರುವುದು ಎಂದರೆ ಹಲವರಿಗೆ ಇದು ನುಂಗಲಾಗದ ತುತ್ತು. ಆದರೂ ಸುರಕ್ಷತೆಯ ದೃಷ್ಟಿಯಿಂದ ಇದು ಅನಿವಾರ್ಯ.

ಅದೇ ಕಾರಣಕ್ಕೆ ಹಲವಾರು ಕಡೆಗಳಲ್ಲಿ ಕ್ವಾರಂಟೈನ್​ ಕೇಂದ್ರಗಳಲ್ಲಿ ಹೊಸ ಹೊಸ ಬಗೆಯ ಆವಿಷ್ಕಾರಗಳು ನಡೆಯುತ್ತಲೇ ಇವೆ. ನೃತ್ಯ, ಸಂಗೀತ, ವಿವಿಧ ಬಗೆಯ ಆಟೋಟಗಳು ಮೂಲಕ ಕ್ವಾರಂಟೈನ್​ ವಾಸಿಗಳು ಸಮಯ ಕಳೆಯುತ್ತಿದ್ದಾರೆ.

ಅಂಥದ್ದೇ ಒಂದು ಹೊಸ ಪ್ರಯೋಗ ಇದೀಗ ಸಾಮಾಜಿಕ ಜಾಲತಾಣಗಳಲ್ಲಿ ವೈರಲ್​ ಆಗಿದ್ದು, ನೆಟ್ಟಿಗರ ಗಮನ ಸೆಳೆದಿದೆ. ಇದು ನಿಖರವಾಗಿ ಎಲ್ಲಿಯ ಕ್ವಾರಂಟೈನ್‌ ಸೆಂಟರ್‌ ಎಂಬ ಮಾಹಿತಿ ಇಲ್ಲವಾದರೂ, ಜಮ್ಮು ಮತ್ತು ಕಾಶ್ಮೀರದ ಬಾರಾಮುಲ್ಲಾದ ಸಾಂಸ್ಥಿಕ ಕ್ವಾರಂಟೈನ್‌ ಕೇಂದ್ರ ಎಂದು ಹೇಳಲಾಗುತ್ತಿದೆ.

ಇದನ್ನೂ ನೋಡಿ: ಭಗವದ್ಗೀತೆ, ಕರ್ಮಯೋಗದ ಮಹತ್ವ ಹೇಳಿಕೊಡುತ್ತಿದ್ದಾರೆ ಅಮೆರಿಕ ಸಂಸದೆ

ಇಲ್ಲಿರುವ ವಾಸಿಗಳು ಕ್ರಿಕೆಟ್​ ಆಡುತ್ತಿದ್ದು, ಅದೀಗ ಕ್ವಾರಂಟೈನ್​ ಕ್ರಿಕೆಟ್​ ಎಂದೇ ಪ್ರಸಿದ್ಧಿ ಪಡೆದಿದೆ.

ಜಮ್ಮು ಮತ್ತು ಕಾಶ್ಮೀರ ಮಾಜಿ ಮುಖ್ಯಮಂತ್ರಿ ಮತ್ತು ನ್ಯಾಶನಲ್‌ ಕಾನ್ಫರೆನ್ಸ್‌ ಮುಖಂಡ ಓಮರ್ ಅಬ್ದುಲ್ಲಾ, ದಕ್ಷಿಣ ಆಫ್ರಿಕಾದ ಮಾಜಿ ಕ್ರಿಕೆಟಿಗ ಜಾಂಟಿ ರೋಡ್ಸ್‌ ಸೇರಿದಂತೆ ಹಲವರು ಈ ವಿಡಿಯೊ ಶೇರ್‌ ಮಾಡಿಕೊಂಡಿರುವ ಕಾರಣ, ಇದು ಅಲ್ಲಿಯ ಕ್ವಾರಂಟೈನ್​ ಕೇಂದ್ರದ್ದು ಎಂದು ಅಂದಾಜಿಸಲಾಗಿದೆ.