ಇಂತಹ ಹೆಗ್ಗಳಿಕೆಯ ಪುರಂದರದಾಸರದು ಬಹುಶ್ರುತ ಪ್ರತಿಭೆ. ಹುಟ್ಟಿನಿಂದ ದಾಸರು ಆಗರ್ಭ ಶ್ರೀಮಂತರು. ಬಾಲ್ಯದಿಂದಲೇ ಪ್ರತಿಭಾವಂತರು, ಸಂಗೀತ ಸಾಹಿತ್ಯಾಭ್ಯಾಸಿಗಳು. ಅವರು ನಾರದಾವತಾರವೆಂದು ವೈಷ್ಣವರ ನಂಬಿಕೆ. ಕರ್ನಾಟಕ ಸಂಗೀತಕ್ಕೆ ದಾಸರ ಕೊಡುಗೆಯನ್ನು ಗಮನಿಸುವುದಾದರೆ ಸರಳೆ, ಜಂಟಿವರಸೆ, ಅಲಂಕಾರಗಳು ಇತ್ಯಾದಿಗಳ ಶಾಸ್ತ್ರೀಯ ಅಳವಡಿಕೆ ಅವರಿಂದಲೇ ಆರಂಭವಾಗಿದೆಯೆನ್ನಬೇಕು. ವಿದ್ಯಾರ್ಥಿಗಳ ಅನುಕೂಲಕ್ಕಾಗಿ ಆರಂಭಿಕ ಹಂತದಲ್ಲಿಯೇ ‘ಮಾಯಾ ಮಾಳವ ಗೌಳ’ ರಾಗದ ನಿರೂಪಣೆಯೂ ಅವರದೇ. ಪುರಂದರರು ವಾಗ್ಗೇಯಕಾರರಷ್ಟೇ ಅಲ್ಲ, ಲಕ್ಷಣಕಾರರೂ ಹೌದು. ದೇಶಿ ರಾಗಗಳನ್ನು ಕೀರ್ತನೆಗಳಿಗೆ ಅಳವಡಿಸಿದ್ದು, ವರ್ಣಮಟ್ಟುಗಳ ಆವಿಷ್ಕಾರವೂ ಅವರ ಕಾಲದ್ದೇ. ಕರ್ನಾಟಕ ಸಂಗೀತವಷ್ಟೆ ಅಲ್ಲ ಹಿಂದೂಸ್ಥಾನಿ ಶಾಸ್ತ್ರೀಯ ಸಂಗೀತದ ಮೇಲೂ ಅವರ ಪ್ರಭಾವ ಇರುವಂತೆ ಕಾಣುತ್ತದೆ. ಪ್ರಸಿದ್ಧ ಹಿಂದೂಸ್ಥಾನಿ ಗಾಯಕ ತಾನ್ಸೇನನ ಗುರುವಾಗಿದ್ದ ಸ್ವಾಮಿ ಹರಿದಾಸರು, ಪುರಂದರದಾಸರ ಶಿಷ್ಯರಂತೆ. ಕರ್ನಾಟಕ ಸಂಗೀತಕ್ಕೊಂದು ಕ್ರಮಬದ್ಧ ವ್ಯಾಕರಣ ಕೊಟ್ಟ ಕಾರಣ ವಿದ್ವಾಂಸರು ಅವರನ್ನು ‘ಕರ್ನಾಟಕ ಸಂಗೀತ ಪಿತಾಮಹ’ ಎಂದು ಗುರುತಿಸುತ್ತಾರೆ. ಭಾವ-ರಾಗ-ಲಯಗಳ ಸಮ್ಮಿಳನ ಅವರ ಕೃತಿಗಳ ಸೊಗಸು. ಇಂದಿಗೂ ಸಂಗೀತಾಭ್ಯಾಸದ ಪಾಠ ಶ್ರೇಣಿಗಳಾದ ಸ್ವರಾವಳಿ, ಜಂಟೀ ಸ್ವರಗಳು, ಲಕ್ಷಣ ಗೀತೆಗಳು, ಅಲಂಕಾರಗಳು, ಪ್ರಬಂಧ, ಉಗಾಭೋಗ, ದಾಟುವಂತೆ, ಗೀತೆಗಳು, ಸುಳಾದಿ, ಕೃತಿಗಳು ಅವರ ಕೊಡುಗೆಯೇ.
