ಪರಿಸ್ಥಿತಿ ಎಷ್ಟು ಗಂಭೀರವಾಗಿದೆ ಎಂದರೆ ನೆರವು ಬಯಸಿದ ಸಾವಿರಾರು ಅರ್ಜಿಗಳ ಪೈಕಿ ಬೆರಳೆಣಿಕೆಯಷ್ಟು ಅಂಗವಿಕಲರಿಗೆ ಮಾತ್ರ ನೆರವು ಸಿಗುತ್ತಿದೆ. ಉಳಿದ ಅರ್ಜಿಗಳನ್ನು ತಿರಸ್ಕರಿಸಲಾಗುತ್ತಿದೆ. ಇದರಿಂದ ಅಂಗವಿಕಲರು ನೆರವಿಗಾಗಿ ಪರಿತಪಿಸುವಂತಾಗಿದೆ. 2023-24ರ ಹಣಕಾಸು ವರ್ಷದಲ್ಲಿ 4 ಸಾವಿರ ಫಲಾನುಭವಿಗಳಿಗೆ ಯಂತ್ರ (ಬ್ಯಾಟರಿ)ಚಾಲಿತ ದ್ವಿಚಕ್ರ ವಾಹನ, 411 ಅಂಧ ವಿದ್ಯಾರ್ಥಿಗಳಿಗೆ ಟಾಕಿಂಗ್ ಲ್ಯಾಪ್ಟಾಪ್, 520 ಜನರಿಗೆ ಗಾಲಿಕುರ್ಚಿ, 183 ದೃಷ್ಟಿಹೀನರಿಗೆ ಬ್ರೖೆಲ್ಕಿಟ್, 179 ಫಲಾನುಭವಿಗಳಿಗೆ ಹೊಲಿಗೆಯಂತ್ರಗಳನ್ನು ವಿತರಿಸಲಾಗಿತ್ತು. ಇದಕ್ಕಾಗಿ 54 ಕೋಟಿ ರೂ. ವೆಚ್ಚ ಮಾಡಲಾಗಿತ್ತು. ಆದರೆ, ಈ ಬಾರಿ ಅನುದಾನ ಕಡಿತವಾಗಿರುವುದರಿಂದ ಈ ಯಾವುದೇ ಸೌಕರ್ಯಗಳು ವಿಕಲಾಂಗರಿಗೆ ಸಿಗುತ್ತಿಲ್ಲ. ಇದರಿಂದ ರೋಸಿಹೋಗಿರುವ ಅಂಗವಿಕಲರು ಹೋರಾಟದ ಎಚ್ಚರಿಕೆಯನ್ನೂ ನೀಡಿದ್ದಾರೆ. ಸರ್ಕಾರ ಕೂಡಲೇ ಹೆಚ್ಚಿನ ಅನುದಾನವನ್ನು ಬಿಡುಗಡೆ ಮಾಡಿ, ಅಂಗವಿಕಲರಿಗೆ ಸಲ್ಲಬೇಕಾದ ಸೌಲಭ್ಯಗಳನ್ನು ಪ್ರಾಮಾಣಿಕವಾಗಿ ಒದಗಿಸಿಕೊಡಬೇಕು. ವಿಕಲಾಂಗರು ಹಲವು ಬಗೆಯ ಸಮಸ್ಯೆಗಳನ್ನು ಎದುರಿಸುತ್ತಿದ್ದು, ಅವರ ಬದುಕಿಗೆ ಭರವಸೆಯನ್ನು, ಜತೆಗೆ ಸೂಕ್ತ ಸೌಲಭ್ಯಗಳನ್ನು ಕಲ್ಪಿಸಬೇಕಿದೆ. ಹೀಗಿರುವಾಗ ಅನುದಾನವನ್ನು ಹೆಚ್ಚಿಸಬೇಕೆ ಹೊರತು ಕಡಿತಗೊಳಿಸುವುದು ಯಾವುದೇ ಕಾರಣಕ್ಕೂ ಸಮರ್ಥನೀಯವಲ್ಲ.
