ಜಿಲ್ಲೆಯ ವಿವಿಧ ಹಣಕಾಸು ಸಂಸ್ಥೆಗಳಲ್ಲಿ ಸಾರ್ವಜನಿಕರು ಕೋಟ್ಯಂತರ ರೂ. ಠೇವಣಿ ಮಾಡಿದ್ದರು. ಇದರಲ್ಲಿ ಅನೇಕ ಸಂಸ್ಥೆಗಳು ವಂಚನೆಗೈದು ಪರಾರಿಯಾಗಿವೆ. ಸಂಸ್ಥೆಯ ಯಾವ ಅಧಿಕಾರಿಯೂ ಠೇವಣಿದಾರರ ಸಂಪರ್ಕಕ್ಕೆ ಸಿಗುತ್ತಿಲ್ಲ. ಹಣ ಹೂಡಿಕೆ ಮಾಡಿದವರ ಬದುಕು ಬೀದಿಗೆ ಬಿದ್ದಿದೆ ಎಂದು ಪ್ರತಿಭಟನಾಕಾರರು ಆಕ್ರೋಶ ವ್ಯಕ್ತಪಡಿಸಿದರು.
ಅಗ್ರಿಗೋಲ್ಡ್ ಇ-ಸ್ಟೋರ್, ಸಮೃದ್ಧ ಜೀವನ, ಸಾಯಿ ಪ್ರಸಾದ್, ಗರೀಮಾ ಹಿಂದೂಸ್ತಾನ, ಪಿಎಸಿಎಲ್ ಮುಂತಾದ ಕಂಪನಿಗಳು ಈಗಾಗಲೇ ಜಿಲ್ಲೆಯಿಂದ ಕಾಲ್ಕಿತ್ತಿವೆ. ಗ್ರಾಹಕರ ಹಣಕ್ಕೆ ಪಂಗನಾಮ ಹಾಕಿವೆ. ರಾಜ್ಯದಲ್ಲಿ ಸುಮಾರು 250 ಇಂತಹ ಕಂಪನಿಗಳು ಠೇವಣಿದಾರರನ್ನು ವಂಚಿಸಿವೆ. ಸರ್ಕಾರ ಕೂಡಲೇ ಕಂಪನಿಗಳ ವಿರುದ್ಧ ಕ್ರಮ ಕೈಗೊಂಡು ಠೇವಣಿದಾರರಿಗೆ ಹಣ ಮರಳಿಸುವಂತೆ ನೋಡಿಕೊಳ್ಳಬೇಕೆಂದು ಒತ್ತಾಯಿಸಿದರು.
ವಂಚನೆ ಸಂತ್ರಸ್ತ ಠೇವಣಿದಾರ ಕುಟುಂಬದ ಅಧ್ಯಕ್ಷೆ ಎಚ್.ಮಮತಾ, ಪ್ರಮುಖರಾದ ಶಾಂತಮ್ಮ, ಪ್ರತಿಮಾ, ಸಂತೋಷ್, ಹರೀಶ್, ಸುಬ್ರಾಯ್ ಶೇಟ್, ಲಿಂಗಪ್ಪ ಮುಂತಾದವರು ಪ್ರತಿಭಟನೆಯಲ್ಲಿ ಪಾಲ್ಗೊಂಡಿದ್ದರು.
