ವಂದೇ ಭಾರತ್ ಮಿಷನ್ನ ಮೊದಲನೇ ಹಂತ ಮೇ 16ಕ್ಕೆ ಮುಗಿಯಲಿದ್ದು ಅಂದಿನಿಂದ ಮೇ 22ರವರೆಗೆ ಎರಡನೇ ಹಂತ ಜಾರಿಯಲ್ಲಿರಲಿದೆ. ಎರಡನೇ ಹಂತದಲ್ಲಿ 149 ವಿಮಾನಗಳ ಮೂಲಕ ಭಾರತೀಯರನ್ನು ಕರೆತರಲಾಗುವುದು. ಒಟ್ಟು 31 ದೇಶಗಳಲ್ಲಿರುವವರನ್ನು ಕರೆ ತರುವುದಾಗಿ ತಿಳಿಸಲಾಗಿದೆ. ಅಮೆರಿಕದಿಂದ 13 ವಿಮಾನ, ಅರಬ್ ಸಂಯುಕ್ತ ಸಂಸ್ಥಾನದಿಂದ (ಯುಎಇ) 11, ಕೆನಡಾದಿಂದ 10, ಸೌದಿ ಅರೇಬಿಯಾ ಮತ್ತು ಬ್ರಿಟನ್ನಿಂದ ತಲಾ 9, ಮಲೇಷ್ಯಾ ಮತ್ತು ಓಮನ್ನಿಂದ ತಲಾ 8, ಕಜಕಿಸ್ತಾನ್ ಮತ್ತು ಆಸ್ಟ್ರೇಲಿಯಾದಿಂದ ತಲಾ 7 ವಿಮಾನ ಗಳು ಬರಲಿವೆ. ಉಕ್ರೇನ್, ಕತಾರ್, ಇಂಡೋನೇಷ್ಯಾ, ರಷ್ಯಾ, ಫಿಲಿಪೈನ್ಸ್, ಫ್ರಾನ್ಸ್, ಸಿಂಗಾಪುರ ಹಾಗೂ ಹಲವು ದೇಶಗಳಿಂದ ಭಾರತೀಯರನ್ನು ಕರೆತರಲಾಗುತ್ತಿದೆ. ಮೇ 7ರಿಂದ ವಂದೇ ಭಾರತ್ ಮಿಷನ್ ಆರಂಭವಾಗಿದೆ. ಒಟ್ಟು 64 ವಿಮಾನಗಳ ಮೂಲಕ 12 ದೇಶಗಳಲ್ಲಿರುವ 15,000 ಭಾರತೀಯರನ್ನು ಮೊದಲನೇ ಹಂತದಲ್ಲಿ ಕರೆತರಲಾಗುತ್ತಿದೆ.
