ಬಹುಮಾನ ಆಮಿಷವೊಡ್ಡಿ ಯುವತಿಗೆ ಯಾಮಾರಿಸಿದ ವಂಚನೆ

ಬೆಂಗಳೂರು: ಉದ್ಯೋಗ, ಸಾಲ, ಡೇಟಿಂಗ್​, ಮದುವೆ, ಗಿಫ್ಟ್... ಹೀಗೆ ಹಲವು ಆಮಿಷವೊಡ್ಡಿ ಜನರಿಗೆ ಮೋಸಮಾಡುವ ಜಾಲ ಸಕ್ರಿಯವಾಗಿದೆ. ಇಂತಹದ್ದೇ ವಂಚನೆಗೆ ಸಿಲುಕಿದ ಯುವತಿ ಇದೀಗ ಪೊಲೀಸ್​ ಠಾಣೆ ಮೆಟ್ಟಿಲೇರಿದ್ದಾರೆ.

ಪ್ರತಿಷ್ಠಿತ ಮೇಕಪ್​ ಕಂಪನಿಯ ಸೋಗಿನಲ್ಲಿ ಮಹಿಳೆಗೆ ಕರೆ ಮಾಡಿದ್ದ ವ್ಯಕ್ತಿ ಬಹುಮಾನದ ಆಮಿಷವೊಡ್ಡಿ 77 ಸಾವಿರ ರೂ. ವಂಚಿಸಿದ್ದಾನೆ. ಹಣ ಕಳೆದುಕೊಂಡ ಹೊಸಪಾಳ್ಯದ ವಿನುಶ್ರೀ ಕೊಟ್ಟ ದೂರಿನ ಮೇರೆಗೆ ರಾಕೇಶ್​ ನಾಯ್ಕ ಎಂಬಾತನ ವಿರುದ್ಧ ಆಗ್ನೇಯ ವಿಭಾಗ ಸಿಇಎನ್​ ಪೊಲೀಸರು ಪ್ರಕರಣ ದಾಖಲಿಸಿದ್ದಾರೆ.

ಇದನ್ನೂ ಓದಿರಿ ರಾತ್ರೋರಾತ್ರಿ 70ಕ್ಕೂ ಹೆಚ್ಚು ರೌಡಿಶೀಟರ್​ಗಳ ಮನೆ ಮೇಲೆ ದಾಳಿ, ಅಪಾರ ಪ್ರಮಾಣದ ಮಾರಕಾಸ್ತ್ರ ವಶ

ಜು.21ರಂದು ವಿನುಶ್ರೀಗೆ ಕರೆ ಮಾಡಿದ ರಾಕೇಶ್​ ಎಂಬಾತ ಪ್ರತಿಷ್ಠಿತ ಮೇಕಪ್​ ಕಂಪನಿಯ ನೌಕರನೆಂದು ಪರಿಚಯಿಸಿಕೊಂಡಿದ್ದ. ಕಂಪನಿ ಗ್ರಾಹಕರಿಗೆ ಪ್ರತಿವರ್ಷ ಬಹುಮಾನ ನೀಡುತ್ತದೆ. ಈ ವರ್ಷ ನೀವು ವಿಜೇತರಾಗಿದ್ದೀರಿ ಎಂದು ಯುವತಿಗೆ ಹೇಳಿದ್ದ. ಬಹುಮಾನವನ್ನು ಮನೆಗೆ ಪಾರ್ಸಲ್​ ಕಳುಹಿಸುವುದಾಗಿ ಹೇಳಿ ವಿಳಾಸ ಪಡೆದುಕೊಂಡಿದ್ದ.

ಆ.1ರಂದು ವಿನುಶ್ರೀ ಅವರ ಮನೆಗೆ ಕೋರಿಯರ್​ ಬಂದಿತ್ತು. ಕೋರಿಯರ್​ನಲ್ಲಿದ್ದ ಪತ್ರದಲ್ಲಿ ವಿಳಾಸ ಪರಿಶೀಲನೆ ಪತ್ರವಾಗಿದೆ ಎಂದು ಬರೆದಿತ್ತು. ಇದಾದ ಬಳಿಕ ಮತ್ತೆ ಕರೆ ಮಾಡಿದ್ದ ರಾಕೇಶ್​, ಕಂಪನಿ ಬಹುಮಾನ ಪಡೆದುಕೊಳ್ಳಲು ಶುಲ್ಕ ಪಾವತಿಸಬೇಕು ಎಂದಿದ್ದ. ಆತನ ಮಾತನ್ನು ನಂಬಿದ ಮಹಿಳೆ 77 ಸಾವಿರ ರೂ. ಬ್ಯಾಂಕ್​ ಖಾತೆಗೆ ಸಂದಾಯ ಮಾಡಿದ್ದರು. ಹಣ ಜಮೆ ಮಾಡಿದ ಬಳಿಕ ಆತ ಸಂಪರ್ಕಕ್ಕೆ ಸಿಕ್ಕಿಲ್ಲ. ಆಗ ಮೋಸ ಆಗಿರುವುದು ಗೊತ್ತಾಗಿ ಯುವತಿ ದೂರು ಕೊಟ್ಟಿದ್ದಾರೆ.

https://www.vijayavani.net/ganeshotsav-pramodmutalik/