ಬೆಂಗಳೂರಿನಲ್ಲಿ ಕಳೆದೆರಡು ದಿನಗಳಲ್ಲಿ ಒಂದರ ಹಿಂದೆ ಒಂದರಂತೆ ಎರಡು ಅಗ್ನಿ ಅವಘಡಗಳು ಸಂಭವಿಸಿ, ಜನಸಾಮಾನ್ಯರನ್ನು ಬೆಚ್ಚಿ ಬೀಳಿಸಿವೆ. ವಿಲ್ಸನ್ ಗಾರ್ಡನ್ನ ಚಿನ್ನಯ್ಯನಪಾಳ್ಯದಲ್ಲಿ ಸಿಲಿಂಡರ್ ಸ್ಪೋಟಕ್ಕೆ ಒಬ್ಬ ಬಾಲಕ ಬಲಿಯಾಗಿ 9 ಜನ ಗಾಯಗೊಂಡಿದ್ದರೆ, ನಗರ್ತಪೇಟೆಯಲ್ಲಿ ಶಾರ್ಟ್ಸರ್ಕ್ಯೂಟ್ನಿಂದ ಸಂಭವಿಸಿದ ಅಗ್ನಿ ದುರಂತದಲ್ಲಿ ಐವರು ಪ್ರಾಣ ಕಳೆದುಕೊಂಡಿದ್ದಾರೆ. ಇವೆರಡೂ ಕಿಕ್ಕಿರಿದ ವಾಸಸ್ಥಳಗಳಾಗಿದ್ದು, ರಕ್ಷಣಾ ಕಾರ್ಯಕ್ಕೆ ಬಂದ ಸಿಬ್ಬಂದಿಯ ವಾಹನಗಳು ಕೂಡ ಒಳಗೆ ಹೋಗುವಷ್ಟು ಜಾಗ ಇರಲಿಲ್ಲ. ಅಷ್ಟು ಚಿಕ್ಕ ವಿಸ್ತೀರ್ಣದ ಓಣಿಗಳಿವು. ನಗರ್ತಪೇಟೆಯಲ್ಲಂತೂ ಸುಮಾರು ಒಂದೂವರೆ ಕಿಲೋಮೀಟರ್ನಷ್ಟು ದೂರದಿಂದಲೇ ಬೆಂಕಿ ನಂದಿಸುವ ಕಾರ್ಯ ಮಾಡಬೇಕಾದ ಅನಿವಾರ್ಯತೆ ಅಗ್ನಿಶಾಮಕ ದಳದ ಸಿಬ್ಬಂದಿಗೆ ಎದುರಾಗಿತ್ತು.
