ಹೈನುಗಾರಿಕೆಗೆ ಪ್ರಧಾನಿ ನೆರವು

ಬೆಂಗಳೂರು: ಹೈನೋದ್ಯಮ ಅಭಿವೃದ್ಧಿಗಾಗಿ ಕೇಂದ್ರ ಸರ್ಕಾರ 15,000 ಕೋಟಿ ರೂ. ಪ್ಯಾಕೇಜ್ ಘೋಷಿಸಿದ್ದು, ಹಾಲು ಉತ್ಪಾದಕರ ಸಹಕಾರ ಸಂಘ, ಹಾಲು ಒಕ್ಕೂಟಗಳ ಡೇರಿಗಳು ಹಾಗೂ ಮಹಾಮಂಡಳಗಳ ಡೇರಿಗಳು/ಘಟಕಗಳು ಹಾಗೂ ವಿವಿಧ ಮೂಲ ಸೌಲಭ್ಯಗಳ ಅಭಿವೃದ್ಧಿಗೆ ಈ ಅನುದಾನ ನೆರವಾಗಲಿದೆ.

ಕರೊನಾದಿಂದಾಗಿ ಹಾಲು ಮತ್ತು ಹಾಲಿನ ಉತ್ಪನ್ನಗಳ ಮಾರುಕಟ್ಟೆ ಕುಸಿದಿದ್ದು, ಹಾಲಿನ ಪುಡಿ, ಬೆಣ್ಣೆ, ತುಪ್ಪ ಸೇರಿ ಹಲವು ಉತ್ಪನ್ನಗಳು ಹೆಚ್ಚಿನ ಪ್ರಮಾಣದಲ್ಲಿ ದಾಸ್ತಾನಾಗಿದ್ದು, ಹಾಲು ಉತ್ಪಾದಕರಿಗೆ ಬಟವಾಡೆ ಸಮಸ್ಯೆಯೂ ಎದುರಾಗಬಹುದು ಎನ್ನುವುದನ್ನು ಪ್ರಧಾನಿ ನರೇಂದ್ರ ಮೋದಿ ಅವರ ಅರಿವಿಗೆ ಬಂದಿದೆ. ಹಾಗಾಗಿ ಹಾಲು ಸಹಕಾರಿ ಮಹಾಮಂಡಳಿ ಮತ್ತು ಒಕ್ಕೂಟಗಳೊಂದಿಗೆ ಸಮಾಲೋಚಿಸಿ, ಬ್ಯಾಂಕ್​ಗಳ ಮೂಲಕ ದುಡಿಯುವ ಬಂಡವಾಳವನ್ನು ಸಾಲವನ್ನಾಗಿ ಪಡೆಯಲು ಹಾಗೂ ಪಡೆಯುವ ಸಾಲದ ಮೇಲಿನ ಬಡ್ಡಿಯಲ್ಲಿ ಶೇ. 2ರಿಂದ 4ರಷ್ಟು ಕೇಂದ್ರ ಸರ್ಕಾರದಿಂದ ದುಡಿಯುವ ಬಂಡವಾಳಕ್ಕಾಗಿ ಒಟ್ಟು 5000 ಕೋಟಿ ರೂ. ಕಾಯ್ದಿರಿಸಿ ಕೇಂದ್ರ ಸರ್ಕಾರ ಯೋಜನೆ ಘೋಷಿಸಿದೆ.

ಇದನ್ನೂ ಓದಿ: ಮನೆಯಲ್ಲಿ ಚಿನ್ನ ಇದೆಯಾ? – ಕೇಂದ್ರ ಸರ್ಕಾರ ಬೇಕು ಅಂದ್ರೆ ಕೊಡ್ತೀರಾ?!

ಕೆಎಂಎಫ್​ನಿಂದ 75 ಲಕ್ಷ ಲೀ. ಹಾಲು ಸಂಗ್ರಹ

ಕೆಎಂಎಫ್ ಸದ್ಯ 75 ಲಕ್ಷ ಲೀಟರ್ ಹಾಲು ಸಂಗ್ರಹಿಸುತ್ತಿದ್ದು, ಆಗಸ್ಟ್ ಹೊತ್ತಿಗೆ 85 ಲಕ್ಷ ಲೀಟರ್ ಸಂಗ್ರಹವಾಗುವ ನೀರಿಕ್ಷೆಯಲ್ಲಿದೆ. ನೆರೆ ರಾಜ್ಯಗಳಾದ ಆಂಧ್ರಪ್ರದೇಶ, ತೆಲಂಗಾಣ, ತಮಿಳುನಾಡು, ಮಹಾರಾಷ್ಟ್ರ, ಗೋವಾಗಳಲ್ಲೂ ಲಾಕ್​ಡೌನ್ ಮುಂದುವರಿದಿದ್ದು, ಕೆಎಂಎಫ್​ನಿಂದ ಪ್ರತಿ ದಿನ ಮಾರಾಟವಾಗುತ್ತಿದ್ದ ಸುಮಾರು 10 ಲಕ್ಷ ಲೀ. ಹಾಲು ಮಾರಾಟವಾಗದೆ ಉಳಿಯುತ್ತಿದೆ. ಸುಗ್ಗಿ ಕಾಲದಲ್ಲಿ ಹೆಚ್ಚುವರಿ ಹಾಲು ಉತ್ಪಾದನೆ ಹಾಗೂ ಅದಕ್ಕೆ ಅನುಗುಣವಾಗಿ ಮಾರುಕಟ್ಟೆ ದೊರಕದ ಕಾರಣ ಹಾಲಿನ ಪುಡಿ (ಎಸ್​ಎಮ್) ಮತ್ತು ಸಗಟು ಬೆಣ್ಣೆಯಾಗಿ ಪರಿವರ್ತಿಸುವ ಸಂದರ್ಭ ಸೃಷ್ಟಿಯಾಗಿದೆ. ಸಂಗ್ರಹಣೆಯಾಗುವ ಹಾಲಿನಲ್ಲಿ ಶೇ.35 ಅನ್ನು ಪರಿವರ್ತಿಸಿ ಹಾಲಿನ ಪುಡಿ ಮಾಡಲಾಗುತ್ತಿದೆ. ಜತೆಗೆ ತುಪ್ಪ, ಬೆಣ್ಣೆಯನ್ನು ಮಾಡಿ ಸಂಗ್ರಹಿಸಲಾಗುತ್ತಿದೆ. ಈ ಅವಧಿಯಲ್ಲಿ ಸುಮಾರು 35 ರಿಂದ 40 ಸಾವಿರ ಮೆಟ್ರಿಕ್ ಟನ್ ಹಾಲಿನ ಪುಡಿ ಉತ್ಪಾದನೆಯಾಗುವ ನೀರಿಕ್ಷೆ ಇದೆ. ಈ ಎಲ್ಲ ಕಾರಣಗಳಿಂದ ಮಾರುಕಟ್ಟೆ ಸಮಸ್ಯೆ ಎದುರಾಗಿ, ರೈತರಿಗೆ ಹಾಲಿನ ಬಟವಾಡೆ ಕಷ್ಟವಾಗಬಹುದು. ಆದ್ದರಿಂದ ಕೆಎಂಎಫ್ ಮತ್ತು ಜಿಲ್ಲಾ ಹಾಲು ಒಕ್ಕೂಟಗಳು ದುಡಿಯುವ ಬಂಡವಾಳಕ್ಕಾಗಿ ಬ್ಯಾಂಕ್​ಗಳಿಂದ ಸಾಲ ಪಡೆದರೆ ಸದರಿ ಮೊತ್ತಕ್ಕೆ ಶೇ.2 ಬಡ್ಡಿಯನ್ನು ಕೇಂದ್ರ ಸರ್ಕಾರ ಭರಿಸಲಿದೆ. ಇದರಿಂದ ಕೆಎಮ್​ಫ್ ಹಾಗೂ ಒಕ್ಕೂಟಗಳಿಗೆ ಅನುಕೂಲವಾಗಲಿದೆ. ನಿಗದಿತ ಅವಧಿಯಲ್ಲಿ ಸಾಲ ಮರುಪಾವತಿಸಿದರೆ ಹೆಚ್ಚುವರಿಯಾಗಿ ಶೇ.2 ಬಡ್ಡಿಯನ್ನು ಅಂದರೆ ಶೇ.4 ಸಾಲದ ಮೇಲಿನ ಬಡ್ಡಿಯನ್ನೂ ಕೇಂದ್ರವೇ ಭರಿಸಲಿದೆ.

ಇದನ್ನೂ ಓದಿ: ಕೇಂದ್ರ ಸರ್ಕಾರವೂ ಪ್ರಕಟಿಸಿತು ‘ವರ್ಕ್​ ಫ್ರಂ ಹೋಮ್’ ಕರಡು ಮಾರ್ಗಸೂಚಿ

ಯೋಜನೆಯಿಂದಾಗುವ ಲಾಭ

1. ಹಾಲು ಉತ್ಪಾದಕರಿಗೆ ಸತತ ಮಾರುಕಟ್ಟೆ ಒದಗಿಸಲು ಅನುಕೂಲ.
2. ಹಾಲು ಉತ್ಪಾದಕ ಸಹಕಾರಿ ಸಂಸ್ಥೆಗಳು ಹೈನುಗಾರ ರೈತರಿಗೆ ಉತ್ಪಾದಿಸುವ ಹಾಲಿಗೆ ಸಕಾಲದಲ್ಲಿ ಬಟವಾಡೆ ಮಾಡಲು ಉಪಯುಕ್ತ.
3. ಸುಗ್ಗಿ ಕಾಲದಲ್ಲೂ ಹಾಲು ಉತ್ಪಾದಕರಿಗೆ ಉತ್ತಮ ಬೆಲೆ ದೊರಕಿಸಿ ಕೊಡುವುದರ ಜತೆಗೆ ಡೇರಿ ಉದ್ಯಮದ ಕಾರ್ಯ ಚಟುವಟಿಕೆ, ಆಡಚಣೆಯಿಲ್ಲದೆ ನಿರ್ವಹಣೆ ಮಾಡಲು ಸಹಕಾರಿ.
4. ಸಹಕಾರಿ ಸಂಸ್ಥೆಗಳು ಉತ್ತಮ ಗುಣಮಟ್ಟದ ಹಾಲು ಮತ್ತು ಹಾಲಿನ ಉತ್ಪನ್ನಗಳನ್ನು ಕೈಗೆಟುಕುವ ಬೆಲೆಯಲ್ಲಿ ಗ್ರಾಹಕರಿಗೆ ಸರಬರಾಜು ಮಾಡಲು ಪ್ರಯೋಜನ.
5. ದೇಶದ ಮಾರುಕಟ್ಟೆಯಲ್ಲಿ ಡೇರಿ ಉತ್ಪನ್ನಗಳ ಮಾರಾಟ ಬೆಲೆಯಲ್ಲಿ ಸುಸ್ಥಿರತೆ ಕಾಪಾಡಿಕೊಳ್ಳಲು ಸಹಕಾರಿ.
6. ಸುಗ್ಗಿ ಕಾಲದ ಹೆಚ್ಚುವರಿ ಹಾಲನ್ನು ಉಪ ಉತ್ಪನ್ನಗಳಾಗಿ ಪರಿವರ್ತಿಸಲು ಅನುಕೂಲ.