ಉದ್ಯಮ ವಲಯ ಅದರಲ್ಲೂ ಸಣ್ಣ, ಮಧ್ಯಮ ಕೈಗಾರಿಕೆಗಳು ಹಲವು ಸವಾಲು ಎದುರಿಸುತ್ತಿವೆ. ದೇಶದ ಬಹುತೇಕ ರಾಜ್ಯಗಳಲ್ಲಿ ಕಠಿಣ ನಿರ್ಬಂಧಗಳು ಜಾರಿಯಾಗಿರುವುದರಿಂದ ಕಚ್ಚಾ ವಸ್ತುಗಳ ಪೂರೈಕೆಯಲ್ಲಿ ವ್ಯತ್ಯಯವಾಗಿದೆ. ಕಚ್ಚಾವಸ್ತುಗಳ ಅಲಭ್ಯತೆಯಿಂದ, ಉತ್ಪಾದನಾ ರಂಗದ ಚಟುವಟಿಕೆಗಳಿಗೆ ತೀವ್ರ ಹಿನ್ನಡೆ ಉಂಟಾಗಿದೆ. ಅಲ್ಲದೆ, ಹಲವು ವಲಯಗಳ ಉತ್ಪಾದನಾ ಸಾಮರ್ಥ್ಯ ಗಣನೀಯವಾಗಿ ಕುಸಿಯುವುದರಿಂದ, ಮಾರುಕಟ್ಟೆಯಲ್ಲಿ ಅಂಥ ಉತ್ಪನ್ನಗಳ ಲಭ್ಯತೆ ಕಡಿಮೆ ಆಗುವುದಲ್ಲದೆ ಬೆಲೆಯೂ ಏರುಮುಖ ಕಾಣುತ್ತದೆ. ಈಗಾಗಲೇ ಕರೊನಾದ ಹೊಡೆತ, ಉದ್ಯೋಗನಷ್ಟ, ಸಂಬಳಕಡಿತದಿಂದ ಹೈರಾಣಾಗಿರುವ ಜನಸಾಮಾನ್ಯರಿಗೆ ಬೆಲೆಏರಿಕೆಯ ಬರೆ ಇನ್ನಷ್ಟು ಸಂಕಷ್ಟ ಹೆಚ್ಚಿಸಿದೆ. ಮುಂದಿನ ದಿನಗಳಲ್ಲಿ ಈ ಪ್ರಮಾಣ ಇನ್ನೂ ಹೆಚ್ಚಾಗದಂತೆ ನಿಗಾ ವಹಿಸಬೇಕಿದೆ. ಕೈಗಾರಿಕಾ ಅಗತ್ಯಗಳನ್ನು ಪೂರೈಸಲು, ಮುಖ್ಯವಾಗಿ ಕಚ್ಚಾವಸ್ತುಗಳ ಪೂರೈಕೆ ಅಬಾಧಿತವಾಗಿರುವಂತೆ ನೋಡಿಕೊಳ್ಳಲು ಆದ್ಯತೆ ನೀಡಬೇಕು. ಲಾಕ್ಡೌನ್ ಬಳಿಕ ಉದ್ಯಮ ರಂಗ ಸೇರಿ ಎಲ್ಲ ವಲಯಗಳಲ್ಲೂ ಆರ್ಥಿಕ ಚಟುವಟಿಕೆಗಳು ಚೇತರಿಕೆ ಕಾಣುವಂತೆ ದೂರದೃಷ್ಟಿಯ ಕ್ರಮಗಳನ್ನು ಕೈಗೊಳ್ಳಬೇಕು. ಕರೊನಾ ಹೊಡೆತದಿಂದ ಪಾರಾಗುವುದು ಎಷ್ಟು ಸವಾಲಿನಿಂದ ಕೂಡಿದೆಯೋ, ಆರ್ಥಿಕ ವಿಪತ್ತಿನಿಂದ ಹೊರಬರುವುದೂ ಅಷ್ಟೇ ಸವಾಲಿನದ್ದಾಗಿದೆ. ಸರ್ಕಾರ ಈ ಬಗ್ಗೆ ಗಂಭೀರ ಚಿಂತನೆ ನಡೆಸಿ, ಸೂಕ್ತ ಮತ್ತು ಸಕಾಲಿಕ ಹೆಜ್ಜೆ ಇರಿಸುವಂತಾಗಲಿ.
