ಆರಕ್ಷಕರು ಮೃತರಾದರೆ 20 ಲಕ್ಷ ರೂಪಾಯಿ ವಿಮೆ

ಬೆಂಗಳೂರು: ಪೊಲೀಸ್ ಅಧಿಕಾರಿ ಮತ್ತು ಸಿಬ್ಬಂದಿ ಕರ್ತವ್ಯದ ವೇಳೆ ಆಕಸ್ಮಿಕವಾಗಿ ಮೃತರಾದರೆ ಅವರ ಕುಟುಂಬಸ್ಥರಿಗೆ 20 ಲಕ್ಷ ರೂ. ಮೊತ್ತದ ‘ವಿಶೇಷ ಗುಂಪು ವಿಮೆ’ಯನ್ನು ವಿಮಾ ಕಂಪನಿಯಿಂದ ಮಂಜೂರು ಮಾಡಿಸುವಂತೆ ಡಿಜಿಪಿ ಪ್ರವೀಣ್ ಸೂದ್ ಆದೇಶ ಹೊರಡಿಸಿದ್ದಾರೆ. ಮೃತಪಟ್ಟ ಅಧಿಕಾರಿ ಮತ್ತು ಸಿಬ್ಬಂದಿಯ ಮಾಹಿತಿ, ದಾಖಲೆಗಳನ್ನು ನಿಗದಿತ ಅವಧಿಯೊಳಗೆ ವಿಮಾ ಕಂಪನಿಗೆ ತಲುಪಿಸದಿದ್ದರೆ ಸಂಬಂಧಪಟ್ಟ ಘಟಕಾಧಿಕಾರಿಯನ್ನು ಹೊಣೆಗಾರರನ್ನಾಗಿಸಲಾಗುವುದು ಎಂದು ರಾಜ್ಯದ ಎಲ್ಲ ಘಟಕಾಧಿಕಾರಿ, ಡಿವೈಎಸ್​ಪಿ ಮತ್ತು ಠಾಣಾಧಿಕಾರಿಗಳಿಗೆ ಎಚ್ಚರಿಸಿದ್ದಾರೆ. ಪೊಲೀಸರ ಮತ್ತು ಅವರ ಕುಟುಂಬಸ್ಥರಿಗೆ ವಿಶೇಷ ಗುಂಪು ವಿಮೆ ಪಾವತಿಸಲು ಯುನೈಟೆಡ್ ಇಂಡಿಯಾ ಇನ್ಶೂರೆನ್ಸ್ ಕಂಪನಿಯನ್ನು ಮುಂದುವರಿಸಲಾಗಿದೆ. ತಿಂಗಳೊಳಗಾಗಿ ವಿಮೆ ಹಣ ತಲುಪಿಸಬೇಕಾಗಿದೆ. ಸ್ವಾಭಾವಿಕ ಕಾಯಿಲೆ, ಹೃದಯಾಘಾತ ಅಥವಾ ಆತ್ಮಹತ್ಯೆ ಮಾಡಿಕೊಂಡವರಿಗೆ ವಿಮೆ ಸೌಲಭ್ಯ ಸಿಗುವುದಿಲ್ಲ. ಮೃತರ ಮಾಹಿತಿಯನ್ನು 7 ದಿನಗೊಳಗೆ ವಿಮಾ ಕಂಪನಿಗೆ ತಿಳಿಸಬೇಕು.

ಸಲ್ಲಿಸಬೇಕಾದ ದಾಖಲೆ

• ಸೇವಾ ವಿವರದ ದೃಢಿಕೃತ ಪತ್ರ, ವಿಮಾ ಮೊತ್ತ ಯಾರಿಗೆ ನೀಡಬೇಕೆಂಬ ನಾಮನಿರ್ದೇಶಿತರ ಹೆಸರನ್ನು ಘಟಕಾಧಿಕಾರಿ ಶೀರ್ಷಿತ ಪತ್ರದಲ್ಲಿ ನಮೂದಿಸಿ ಕಳುಹಿಸಬೇಕು.
• ಪಿಂಚಣೀ ಮಂಜೂರಾತಿ ಪ್ರತಿ ಅಥವಾ ಎನ್​ಪಿಎಸ್ ಮೊತ್ತದ ಆದೇಶ ಪ್ರತಿ
• ಎಫ್​ಐಆರ್ ಪ್ರತಿ, ಮರಣೋತ್ತರ ಪರೀಕ್ಷೆಯ ವರದಿ, ದಿನಪತ್ರಿಕೆಯಲ್ಲಿ ಸುದ್ದಿ ಪ್ರಕಟವಾಗಿರುವ ದೃಢಿಕೃತ ಪ್ರತಿ
• ಉಪ ತಹಶೀಲ್ದಾರ್ ನೀಡುವ ಕುಟುಂಬದ ಜೀವಿತ ಸದಸ್ಯರ ವಿವರದ ದೃಢೀಕರಣ ಮೂಲ ಪತ್ರ
• ಪೊಲೀಸ್ ಠಾಣೆಯ ದಿನಚರಿ, ಕರ್ತವ್ಯ ನೇಮಿಸಿರುವ ಬಗ್ಗೆ ಠಾಣಾಧಿಕಾರಿಯ ದೃಢೀಕರಣ ಪತ್ರ
• ಕ್ಲೇಮ್​ದಾರರ ಚುನಾವಣಾ ಗುರುತಿನ ಚೀಟಿ, ಆಧಾರ್ ಕಾರ್ಡ್, ಪಾನ್​ಕಾರ್ಡ್ 
• ಬ್ಯಾಂಕ್​ ಖಾತೆ ವಿವರ, ಅಫಿಡವಿಟ್ ನೋಟರಿ, ಸಂಬಂಧಿಕರ ದೂರವಾಣಿ ಸಂಖ್ಯೆ

ಒಂದೇ ದಿನ 8,500 ಮಂದಿ ಸೋಂಕುಮುಕ್ತ

ಬೆಂಗಳೂರು: ರಾಜ್ಯದಲ್ಲಿ ಕೆಲ ದಿನಗಳಿಂದ ಸೋಂಕು ಹಾಗೂ ಸಾವಿನ ಪ್ರಕರಣಗಳು ಇಳಿಕೆಯಾಗಿದ್ದು, ಚೇತರಿಸಿಕೊಳ್ಳುತ್ತಿರುವವರ ಸಂಖ್ಯೆ ಹೆಚ್ಚಿದೆ. ಮಂಗಳವಾರ 8,500 ಮಂದಿ ಸೋಂಕು ಮುಕ್ತರಾಗಿದ್ದು, ಒಟ್ಟು ಗುಣಮುಖರ ಸಂಖ್ಯೆ 6,62,329 ತಲುಪಿದೆ. ಇನ್ನು 6,297 ಹೊಸ ಪ್ರಕರಣಗಳು ವರದಿಯಾಗಿದ್ದು, ಸೋಂಕಿತರ ಸಂಖ್ಯೆ 7,76,901ಕ್ಕೆ ಏರಿಕೆಯಾಗಿದೆ. ಸೋಂಕಿತರಲ್ಲಿ ಚಿಕಿತ್ಸೆ ಫಲಿಸದೆ 66 ಮಂದಿ ಸಾವನ್ನಪ್ಪಿದ್ದು, ಮೃತರ ಸಂಖ್ಯೆ 10,608 ಆಗಿದೆ. ಉಳಿದಂತೆ 1,03,945 ಸೋಂಕಿತರು ನಾನಾ ಆಸ್ಪತ್ರೆಗಳಲ್ಲಿ ಹಾಗೂ ಕೋವಿಡ್ ಆರೈಕೆ ಕೇಂದ್ರಗಳಲ್ಲಿ ದಾಖಲಾಗಿದ್ದು, ಈ ಪೈಕಿ 941 ಮಂದಿ ಗಂಭೀರ ಸಮಸ್ಯೆಯಿಂದ ತುರ್ತು ನಿಗಾ ಘಟಕದಲ್ಲಿದ್ದಾರೆ.