ಎಣ್ಣೆ ಹೊಡಿಬೇಕು ಡಿಸ್ಟರ್ಬ್ ಮಾಡ್ಬೇಡ ಅಂದಿದ್ದಕ್ಕೆ ಚಾಕು ಹಾಕಿದ್ದ: ಪೊಲೀಸರ ಅತಿಥಿಯಾದ ಆರೋಪಿ

ಬೆಂಗಳೂರು: ಬಾರ್​ ಒಂದರಲ್ಲಿ ಎಣ್ಣೆ ಹೊಡಿಬೇಕು ಡಿಸ್ಟರ್ಬ್​ ಮಾಡಬೇಡ ಎಂದಿದ್ದಕ್ಕೆ ಚಾಕುವಿಂದ ಚುಚ್ಚಿದ್ದ ಆರೋಪಿಯನ್ನು ಇಂದು ಬಂಧಿಸಲಾಗಿದೆ.

ಫೆ.16ರ ರಾತ್ರಿ ನೀಲಸಂದ್ರದ ಬಾರ್​ ಒಂದರಲ್ಲಿ ಕಿರಣ್​ ಹೆಸರಿನವ ಕುಡಿಯುತ್ತಾ ಕುಳಿತಿದ್ದ. ಅದೇ ಸಮಯಕ್ಕೆ ಬಾರ್​ಗೆ ಬಂದ ಸೋಮು ಹೆಸರಿನ ವ್ಯಕ್ತಿ ಜೋರು ಜೋರಾಗಿ ಮಾತಾಡುತ್ತಾ ಬಾರಿನ ತುಂಬೆಲ್ಲಾ ಓಡಾಡಲಾರಂಭಿಸುತ್ತಾನೆ. ಇದರಿಂದ ತನಗೆ ಡಿಸ್ಟರ್ಬ್​ ಆಗುತ್ತಿದೆ ಎಂದೆನಿಸಿದ ಕಿರಣ್​, ಸೋಮುವಿನ ಬಳಿ "ಸೈಲೆಂಟಾಗ್ ಇರು, ಡಿಸ್ಟರ್ಬ್ ಮಾಡ್ಬೇಡ, ಬಾರ್​ಗೆ ಬರೋದ್ ಎಣ್ಣೆ ಹೊಡ್ಯೋಕೆ ನಿನ್ ಸೌಂಡ್ ಕೇಳೊಕಲ್ಲ" ಎಂದು ಬೈದಿದ್ದಾನೆ. ಕಿರಣ್​ ಹೇಳಿದ್ದನ್ನು ಕೇಳಿ ಸಿಟ್ಟಿಗೆದ್ದ ಸೋಮು ಚಾಕುವಿನಿಂದ ಕಿರಣ್​ ಮೇಲೆ ಹಲ್ಲೆ ಮಾಡಿದ್ದ.

ಕಿರಣ್​ನ ಹೊಟ್ಟೆಯ ಎರಡೂ ಪಕ್ಕೆಗಳಿಗೆ ಗಾಯಗಳಾಗಿದ್ದು ಆತನನ್ನು ಆಸ್ಪತ್ರೆಗೆ ಸೇರಿಸಲಾಗಿತ್ತು. ಅಶೋಕ್​ನಗರ ಪೊಲೀಸ್​ ಠಾಣೆಯಲ್ಲಿ ಪ್ರಕರಣ ದಾಖಲಿಸಿಕೊಂಡ ಪೊಲೀಸರು ಇಂದು ಆರೋಪಿಯನ್ನು ಬಂಧಿಸಿ ನ್ಯಾಯಾಂಗ ಬಂಧನಕ್ಕೆ ತಳ್ಳಿದ್ದಾರೆ.