ಏ.5ರ ರಾತ್ರಿ 9ಗಂಟೆಗೆ ವಿದ್ಯುತ್​ ಪೂರೈಕೆಯ ಪ್ರಮಾಣ ಎಷ್ಟು ಕಡಿಮೆ ಆಗಿತ್ತು ಗೊತ್ತಾ? ಪ್ರಧಾನಿ ಕರೆಗೆ ಭರ್ಜರಿ ರೆಸ್ಪಾನ್ಸ್​...!

ನವದೆಹಲಿ: ಕರೊನಾ ಅಂಧಕಾರದ ವಿರುದ್ಧ ಎಲ್ಲರೂ ಒಗ್ಗಟ್ಟಾಗಿದ್ದೇವೆ ಎಂಬ ಸಂದೇಶ ಸಾರುವ ಸಲುವಾಗಿ ನರೇಂದ್ರ ಮೋದಿಯವರು ದೇಶದ ಜನರಲ್ಲಿ ದೀಪ ಹಚ್ಚುವಂತೆ ಕರೆ ನೀಡಿದ್ದರು.

ಏ.5ರಂದು ರಾತ್ರಿ 9 ಗಂಟೆಗೆ 9 ನಿಮಿಷ ಮನೆಯ ವಿದ್ಯುತ್​ ಲೈಟ್​ಗಳನ್ನು ಆರಿಸಿ, ಬಾಲ್ಕನಿಗೋ, ಬಾಗಿಲ ಬಳಿಯೋ ಬಂದು ದೀಪ, ಮೊಂಬತ್ತಿ, ಮೊಬೈಲ್​ ಫ್ಲಾಶ್​ ಅಥವಾ ಟಾರ್ಚ್​ ಮೂಲಕ ಬೆಳಕು ಹೊತ್ತಿಸಿ ಎಂದು ಹೇಳಿದ್ದರು.

ಪ್ರಧಾನಿ ನರೇಂದ್ರ ಮೋದಿಯವರ ಕರೆಗೆ ದೇಶದ ಜನರು ಸ್ಪಂದಿಸಿದ್ದಾರೆ. ನಿನ್ನೆ ರಾತ್ರಿ ಅದೆಷ್ಟೋ ಜನರು ದೀಪ ಬೆಳಗಿದ್ದಾರೆ.

ಈ ಸಮಯದಲ್ಲಿ ವಿದ್ಯುತ್​ ಪೂರೈಕೆಯ ಪ್ರಮಾಣ ಎಷ್ಟು ಕಡಿಮೆ ಆಗಿತ್ತು ಎಂಬ ಬಗ್ಗೆ ಇಂಧನ ಸಚಿವಾಲಯ ತಿಳಿಸಿದೆ.

ದೆಹಲಿಯಲ್ಲಿರುವ ರಾಷ್ಟ್ರೀಯ ಇಂಧನ ಉಸ್ತುವಾರಿ ಕೇಂದ್ರಕ್ಕೆ ಭೇಟಿ ನೀಡಿ ಪರಿಶೀಲನೆ ನಡೆಸಿದ ಬಳಿಕ ಮಾತನಾಡಿದ ಇಂಧನ ಖಾತೆ ರಾಜ್ಯ ಸಚಿವ ಆರ್​. ಕೆ.ಸಿಂಗ್​, ಪ್ರಧಾನಿ ನರೇಂದ್ರ ಮೋದಿಯವರು ದೀಪ ಬೆಳಗಲು ನೀಡಿದ್ದ ಕರೆಗೆ ಅಭೂತಪೂರ್ವ ಸ್ಪಂದನೆ ಸಿಕ್ಕಿದೆ. 117 ಗಿಗಾ ವ್ಯಾಟ್​ ಇದ್ದ ವಿದ್ಯುತ್​ ಬೇಡಿಕೆ ಆ ಸಮಯದಲ್ಲಿ ರಾಷ್ಟ್ರಾದ್ಯಂತ 85.3 ಗಿಗಾ ವ್ಯಾಟ್​ಗೆ ಇಳಿದಿತ್ತು. ಅಂದರೆ ಸುಮಾರು 35 ಗಿಗಾ ವ್ಯಾಟ್​ಗಳಷ್ಟು ಕಡಿಮೆಯಾಗಿತ್ತು ಎಂದಿದ್ದಾರೆ.

ಆ 9 ನಿಮಿಷಗಳು ಮುಗಿದ ಬಳಿಕ ಮತ್ತೆ ವಿದ್ಯುತ್​ ಪೂರೈಕೆ 110 ಗಿಗಾ ವ್ಯಾಟ್​ಗೆ ಏರಿಕೆ ಆಯಿತು. ಈ ಸಂದರ್ಭವನ್ನು ಇಂಜಿನಿಯರ್​ಗಳೂ ಸೂಕ್ತವಾಗಿ ನಿಭಾಯಿಸಿದ್ದಾರೆ ಎಂದು ಶ್ಲಾಘಿಸಿದ್ದಾರೆ. (ಏಜೆನ್ಸೀಸ್​)