ಸಾರ್ಕ್​ ರಾಷ್ಟ್ರಗಳ ನಾಯಕರ ವಿಡಿಯೋ ಕಾನ್ಫರೆನ್ಸ್​; Covid19 ತುರ್ತು ನಿಧಿ ಸ್ಥಾಪನೆಯ ಪ್ರಸ್ತಾವನೆಯನ್ನಿಟ್ಟ ಪ್ರಧಾನಿ ನರೇಂದ್ರ ಮೋದಿ..

ನವದೆಹಲಿ: ಜಾಗತಿಕ ಸಮಸ್ಯೆಯಾಗಿ ಪರಿಣಮಿಸಿರುವ ಕರೊನಾ ವೈರಸ್​ ವಿರುದ್ಧ ಹೋರಾಡಲು ಜಂಟಿ ಕಾರ್ಯತಂತ್ರ ರೂಪಿಸುವ ಸಲುವಾಗಿ ಇಂದು ನಡೆದ ಸಾರ್ಕ್​ ರಾಷ್ಟ್ರಗಳ ನಾಯಕರು, ಅಧಿಕಾರಿಗಳ ವಿಡಿಯೋ ಕಾನ್ಫರೆನ್ಸ್​ನಲ್ಲಿ ಹಲವು ಪ್ರಮುಖ ವಿಚಾರಗಳು ಚರ್ಚೆಯಾದವು.

ಎಲ್ಲ ರಾಷ್ಟ್ರಗಳ ನಾಯಕರು ಚರ್ಚೆಯಲ್ಲಿ ಸಕ್ರಿಯವಾಗಿ ಪಾಲ್ಗೊಂಡರು. ಪಾಕಿಸ್ತಾನ ಪ್ರಧಾನಿ ಇಮ್ರಾನ್ ಖಾನ್ ಬದಲಿಗೆ ಅವರ ವಿಶೇಷ ಆರೋಗ್ಯ ಸಹಾಯಕರು ಪಾಲ್ಗೊಂಡಿದ್ದರು.

ಈ ವೇಳೆ ಪ್ರಧಾನಿ ನರೇಂದ್ರ ಮೋದಿಯವರು ಪ್ರಮುಖ ವಿಚಾರವೊಂದನ್ನು ಪ್ರಸ್ತಾಪಿಸಿದರು. Covid19 (ಕರೊನಾ ವೈರಸ್​) ತುರ್ತು ನಿಧಿ ಸ್ಥಾಪನೆಯಾಗಬೇಕು. ನಿಧಿ ಸ್ಥಾಪನೆಗೆ ಸಾರ್ಕ್​ನ ಎಲ್ಲ ರಾಷ್ಟ್ರಗಳ ಸಹಮತವೂ ಇದ್ದರೆ ಭಾರತ 10 ಮಿಲಿಯನ್​ ಡಾಲರ್​ಗಳನ್ನು ಇದಕ್ಕೆ ನೀಡಲಿದೆ ಎಂದು ಭರವಸೆ ನೀಡಿದರು.

ಕರೊನಾ ಚಿಕಿತ್ಸೆ, ಮುಂಜಾಗ್ರತೆಗೆ ಸಂಬಂಧಪಟ್ಟಂತೆ ಸಾರ್ಕ್​ ರಾಷ್ಟ್ರಗಳಲ್ಲಿ ವೈದ್ಯಕೀಯ ತುರ್ತು ಪ್ರತಿಕ್ರಿಯಾ ತಂಡಕ್ಕೆ ಸೂಕ್ತ ತರಬೇತಿ ನೀಡಬೇಕು. ಸಾರ್ಕ್​ ರಾಷ್ಟ್ರಗಳಲ್ಲಿ ಕರೊನಾ ವೈರಸ್​ ವಿರುದ್ಧದ ಹೋರಾಟಕ್ಕೆ ಭಾರತೀಯ ಕ್ಷಿಪ್ರ ಪ್ರತಿಕ್ರಿಯಾ ತಂಡದ ವೈದ್ಯರು, ತಜ್ಞರೂ ಲಭ್ಯರಿರುತ್ತಾರೆ. ಅಗತ್ಯ ಬಿದ್ದರೆ ಅವರನ್ನು ಕಳಿಸಿಕೊಡಲಾಗುವುದು. ನಾವೆಲ್ಲ ನೆರೆಹೊರೆಯ ರಾಷ್ಟ್ರಗಳು ಒಗ್ಗಟ್ಟಾಗಿ ಕರೊನಾ ವಿರುದ್ಧ ಹೋರಾಡಿ ಗೆಲ್ಲಬೇಕು. ಜಗತ್ತಿಗೇ ಮಾದರಿಯಾಗಬೇಕು.

ಸಾರ್ಕ್​ ರಾಷ್ಟ್ರಗಳ ವಿಡಿಯೋ ಕಾನ್ಫರೆನ್ಸ್​ನಲ್ಲಿ ಪಾಲ್ಗೊಂಡ ಪ್ರಮುಖರು ಮಾತನಾಡಿದ ವಿಚಾರಗಳಲ್ಲಿ ಹಲವು ಪ್ರಮುಖ ಅಂಶಗಳನ್ನು ನಮ್ಮ ತಂಡ ಟಿಪ್ಪಣಿ ಮಾಡಿಟ್ಟುಕೊಂಡಿದೆ. ಹಾಗೇ ಔಷಧಿ ಮತ್ತು ವೈದ್ಯಕೀಯ ಸಾಧನಗಳಿಗೆ ಸಂಬಂಧಪಟ್ಟಂತೆ ಮನವಿಯನ್ನೂ ಮಾಡಿಕೊಂಡಿದ್ದಾರೆ. ಖಂಡಿತ ಅವುಗಳನ್ನು ಈಡೇರಿಸಲು ಪ್ರಯತ್ನಿಸಲಾಗುವುದು ಎಂದು ಹೇಳಿದರು.

ಸಭೆಯಲ್ಲಿ ವ್ಯಕ್ತವಾದ ಸಲಹೆ

1. ಶಾಂಘೈ ಸಹಕಾರ ಸಂಘ (ಎಸ್​ಸಿಒ) ಮತ್ತು ಸಾರ್ಕ್​ನ ಸದಸ್ಯನಾಗಿರುವ ಭಾರತ ಕರೊನಾವನ್ನು ಎದುರಿಸಲು ಎಲ್ಲ ಸದಸ್ಯ ರಾಷ್ಟ್ರಗಳಿಗೆ ಸಹಾಯ ಮಾಡಲಿ ಎಂದ ಅಫ್ಘಾನಿಸ್ತಾನ.
2. ವೇಗವಾಗಿ ಹರಡುತ್ತಿರುವ ವೈರಸನ್ನು ಎದುರಿಸಲು ದಕ್ಷಿಣ ಏಷ್ಯಾ ರಾಷ್ಟ್ರಗಳು ತಮ್ಮ ವಿಚಾರಧಾರೆಗಳನ್ನು ಹಂಚಿಕೊಳ್ಳವ ಅಗತ್ಯವಿದೆ. ಕರೊನಾದಿಂದ ಉಂಟಾದ ಆರ್ಥಿಕ ಸಮಸ್ಯೆ ಪರಿಹಾರಕ್ಕೆ ಕಾರ್ಯತಂತ್ರ ರೂಪಿಸಬೇಕು ಎಂದು ಶ್ರೀಲಂಕಾ ಅಭಿಪ್ರಾಯ.
3. ಸಾರ್ಕ್ ಸದಸ್ಯ ರಾಷ್ಟ್ರಗಳು ಸೀಮಿತ ಸಂಪನ್ಮೂಲಗಳನ್ನು ಹಂಚಿಕೊಳ್ಳಲು ಸಿದ್ಧಬೇಕು ಮತ್ತು ಪರಿಹಾರದ ಬಗ್ಗೆಯೂ ಯೋಚಿಸಬೇಕು ಎಂದ ಭೂತಾನ್ೆ.
4. ಸಾರ್ಕ್ ರಾಷ್ಟ್ರಗಳು ಕರೊನಾ ಪರಿಸ್ಥಿತಿಯನ್ನು ಒಟ್ಟಾಗಿ ಎದುರಿಸಿದರೆ ಪರಿಹಾರ ಸಾಧ್ಯವೆಂದು ವಿಶ್ವಾಸ ವ್ಯಕ್ತಪಡಿಸಿದ ಬಾಂಗ್ಲಾದೇಶ.
5. ಕರೊನಾ ವಿರುದ್ಧದ ಹೋರಾಟದಲ್ಲಿ ಅಗತ್ಯ ಕಾರ್ಯವಿಧಾನವನ್ನು ಅಭಿವೃದ್ಧಿಪಡಿಸುವುದು ಅವಶ್ಯಕವೆಂದ ನೇಪಾಳ.

ಪಾಕ್ ಕುಚೇಷ್ಟೆ

ಸಾರ್ಕ್ ನಾಯಕರ ವಿಶೇಷ ಸಭೆಯಲ್ಲೂ ಪಾಕ್ ಕಾಶ್ಮೀರ ಕ್ಯಾತೆಯನ್ನು ಎತ್ತಿತು. ಕಾಶ್ಮೀರದಲ್ಲಿ (ಭಾರತದ ಜಮ್ಮು- ಕಾಶ್ಮೀರ) 19 ಕರೊನಾ ಸೋಂಕಿತ ಪ್ರಕರಣಗಳು ಬೆಳಕಿಗೆ ಬಂದಿವೆ. ಹೀಗಾಗಿ ವೈರಸ್​ಗೆ ಕಡಿವಾಣ ಹಾಕಬೇಕಾದರೆ ಜಮ್ಮು- ಕಾಶ್ಮೀರದಲ್ಲಿ ವಿಧಿಸಿರುವ ನಿರ್ಬಂಧಗಳನ್ನು ತೆಗೆಯಬೇಕು ಎಂದು ಪಾಕ್ ಪರ ಹಾಜರಾಗಿದ್ದ ಸಚಿವ ಜಾಫರ್ ಮಿರ್ಜಾ ಹೇಳಿದರು. ಸಾರ್ಕ್ ದೇಶಗಳ ನಾಯಕರ ವಿಡಿಯೋ ಕಾನ್ಪರೆನ್ಸ್​ಗೆ ಪಾಕ್ ಪ್ರಧಾನಿ ಇಮ್ರಾನ್ ಖಾನ್ ತಮ್ಮ ಬದಲಿಗೆ ಮಿರ್ಜಾರನ್ನು ನಿಯೋಜಿಸಿದ್ದರು.

https://www.vijayavani.net/pm-modi-participates-in-saarc-video-conference/

https://www.vijayavani.net/us-president-donald-trump-tests-negative-for-coronavirus/