ಕರೊನಾ ಸೋಂಕಿಗೆ ನಿಖರವಾದ ಮದ್ದು ಇಲ್ಲದಿರುವ ಈ ಸಂಕಷ್ಟದ ಸಮಯದಲ್ಲಿ ಮಲೇರಿಯಾ ತಡೆಗೆ ಬಳಸುವ ಹೈಡ್ರಾಕ್ಸಿಕ್ಲೋರೊಕ್ವಿನ್ ಮಾತ್ರೆ ಕೋವಿಡ್-19 ಸೋಂಕಿಗೆ ಸದ್ಯ ರಾಮಬಾಣವಾಗಿದೆ. ಹೀಗಾಗಿ ಈ ಔಷಧಕ್ಕೆ ಭಾರಿ ಬೇಡಿಕೆ ಬಂದಿದೆ. ಆದ್ದರಿಂದ ಈ ಮಾತ್ರೆಯ ರಫ್ತಿಗೆ ಭಾರತ ಕಳೆದವಾರ ನಿಷೇಧ ಹೇರಿತ್ತು. ಈ ಮಧ್ಯೆ, ಕಳೆದ ಭಾನುವಾರ ದೂರವಾಣಿ ಮೂಲಕ ಪ್ರಧಾನಿ ಮೋದಿ ಜತೆ ಮಾತುಕತೆ ನಡೆಸಿದ ಟ್ರಂಪ್, ಅಮೆರಿಕದಲ್ಲಿನ ಸಾವು-ನೋವಿನ ಬಗ್ಗೆ ದುಗುಡ ವ್ಯಕ್ತಪಡಿಸಿದ್ದರು. ಜತೆಗೆ ಹೈಡ್ರಾಕ್ಸಿಕ್ಲೋರೊಕ್ವನ್ ಮಾತ್ರೆಯನ್ನು ಸರಬರಾಜು ಮಾಡುವಂತೆ ಮನವಿ ಮಾಡಿದ್ದರು. ಮಾನವೀಯ ದೃಷ್ಟಿಯಿಂದ ರಫ್ತು ನಿಷೇಧವನ್ನು ಭಾಗಶಃ ಸಡಿಲಿಸಿದ ಭಾರತ, ಕರೊನಾದಿಂದ ತೀವ್ರವಾಗಿ ಬಾಧಿತವಾಗಿರುವ ರಾಷ್ಟ್ರಗಳಿಗೆ ಸೂಕ್ತ ಪ್ರಮಾಣದಲ್ಲಿ ಮಾತ್ರೆ ಪೂರೈಕೆ ಮಾಡುವುದಾಗಿ ಸೋಮವಾರ ಹೇಳಿತ್ತು.
