ಡೀಪ್​ಫೇಕ್ ವಿಡಿಯೋಗಳಿಗೆ ಪ್ರಧಾನಿ ಮೋದಿ ಕಳವಳ

ನವದೆಹಲಿ: ಡೀಪ್​ಫೇಕ್ ವಿಡಿಯೋ ಸೃಷ್ಟಿಸಲು ಕೃತಕ ಬುದ್ಧಿಮತ್ತೆ (ಎಐ) ತಂತ್ರಜ್ಞಾನವನ್ನು ಬಳಸಲಾಗುತ್ತಿರುವುದಕ್ಕೆ ಪ್ರಧಾನಿ ನರೇಂದ್ರ ಮೋದಿ ಶುಕ್ರವಾರ ತೀವ್ರ ಕಳವಳ ವ್ಯಕ್ತಪಡಿಸಿದ್ದಾರೆ. ಡೀಪ್​ಫೇಕ್ ವಿಡಿಯೋಗಳನ್ನು ಖಂಡಿಸುವಂತೆ ತಾವು ಚಾಟ್​ಜಿಪಿಟಿಗೆ ಸೂಚಿಸಿರುವುದಾಗಿ ಬಿಜೆಪಿ ಕೇಂದ್ರ ಕಚೇರಿಯಲ್ಲಿ ನಡೆದ ದೀಪಾವಳಿ ಮಿಲನ ಕಾರ್ಯಕ್ರಮದ ವೇಳೆ ಮಾಧ್ಯಮದವರೊಂದಿಗೆ ಮಾತನಾಡಿದ ಮೋದಿ ಹೇಳಿದರು.

ಇಂಥ ವಿಡಿಯೋಗಳು ಇಂಟರ್​ನೆಟ್​ನಲ್ಲಿ ಪ್ರಸಾರವಾದಾಗ ಆ ಬಗ್ಗೆ ಎಚ್ಚರಿಕೆ ನೀಡುವಂತೆಯೂ ಮೋದಿ ಚಾಟ್​ಜಿಪಿಟಿಗೆ ಸಲಹೆ ಮಾಡಿದ್ದಾರೆ. ಎಐ, ಅದರಲ್ಲೂ ವಿಶೇಷವಾಗಿ ಡೀಪ್​ಫೇಕ್ ಒಂದು ಹೊಸ ಸವಾಲು ಹಾಗೂ ಸಮಸ್ಯೆಯಾಗಿದೆ ಎಂದು ಮೋದಿ ವರ್ಣಿಸಿದರು. ತಾವು ಗರ್ಬಾ ಹಾಡನ್ನು ಹಾಡುವ ಡೀಪ್​ಫೇಕ್ ವಿಡಿಯೋವನ್ನು ಇತ್ತೀಚೆಗೆ ನೋಡಿದ್ದಾಗಿ ಪ್ರಧಾನಿ ಹೇಳಿದರು. ಆನ್​ಲೈನ್​ನಲ್ಲಿ ಇಂಥ ಅನೇಕ ಡೀಪ್​ಫೇಕ್ ವಿಡಿಯೋಗಳಿವೆ. ‘ನನ್ನನ್ನು ಇಷ್ಟಪಡುವವರು ಈ ವಿಡಿಯೋವನ್ನು ನನಗೆ ಫಾರ್ವರ್ಡ್ ಮಾಡಿದ್ದರು’ ಎಂದು ಮೋದಿ ವಿವರಿಸಿದರು. ‘ಕೃತಕ ಬುದ್ಧಿಮತ್ತೆಯ ಈ ಕಾಲಘಟ್ಟದಲ್ಲಿ ತಂತ್ರಜ್ಞಾನವನ್ನು ಜವಾಬ್ದಾರಿಯಿಂದ ಬಳಸುವುದು ತುಂಬಾ ಮುಖ್ಯವಾಗಿದೆ’ ಎಂದು ಮೋದಿ ಪ್ರತಿಪಾದಿಸಿದರು.

ತೀವ್ರ ಆಕ್ರೋಶ: ಸಾಮಾಜಿಕ ಮಾಧ್ಯಮದಲ್ಲಿ ನಟಿಯರಾದ ರಶ್ಮಿಕಾ ಮಂದಣ್ಣ, ಕತ್ರಿನಾ ಕೈಫ್ ಮತ್ತು ಕಾಜಲ್ ಅವರ ಡೀಪ್​ಫೇಕ್ ವಿಡಿಯೋಗಳು ಪ್ರತ್ಯಕ್ಷವಾಗಿರುವ ಬೆನ್ನಲ್ಲೇ ಮೋದಿ ಈ ಟಿಪ್ಪಣಿ ಮಾಡಿದ್ದಾರೆ. ನಟಿಯರ ಡೀಪ್​ಫೇಕ್​ಗಳಿಗೆ ವ್ಯಾಪಕ ಆಕ್ರೋಶ ವ್ಯಕ್ತವಾಗಿದ್ದು ಕಾನೂನು ಕ್ರಮಕ್ಕೂ ಆಗ್ರಹಿಸಲಾಗಿದೆ. ವಿಶೇಷವಾಗಿ ಸಾರ್ವಜನಿಕ ವ್ಯಕ್ತಿಗಳ ವಿಡಿಯೋಗಳ ಬಗ್ಗೆ ಕಳವಳ ವ್ಯಕ್ತವಾಗಿದೆ. ತಮ್ಮ ಮುಖಗಳುಳ್ಳ ದೃಶ್ಯಗಳ ವಿಡಿಯೋದಿಂದ ಅವರಿಗೆ ಸಮಸ್ಯೆ ಉಂಟಾಗಬಹುದು ಎಂದು ಹೇಳಲಾಗಿದೆ.

ಲಕ್ಷ ರೂಪಾಯಿ ದಂಡ: ಡೀಪ್​ಫೇಕ್​ಗಳ ಸೃಷ್ಟಿ ಮತ್ತು ಪ್ರಸಾರಕ್ಕೆ -ಠಿ;1 ಲಕ್ಷ ದಂಡ ಮತ್ತು 3 ವರ್ಷ ಸೆರೆವಾಸದ ಶಿಕ್ಷೆ ವಿಧಿಸುವುದಾಗಿ ಕೇಂದ್ರ ಸರ್ಕಾರ ಹೇಳಿದೆ. ‘ಛತ್ ಪೂಜಾ’ ಒಂದು ರಾಷ್ಟ್ರೀಯ ಹಬ್ಬವಾಗಿ ರೂಪುಗೊಂಡಿರುವುದಕ್ಕೆ ಮೋದಿ ಸಂತಸ ವ್ಯಕ್ತಪಡಿಸಿದರು. ದೇಶವನ್ನು ‘ವಿಕಸಿತ ಭಾರತ’ವನ್ನಾಗಿ ಮಾಡುವ ತಮ್ಮ ಸಂಕಲ್ಪ ಕೇವಲ ಮಾತುಗಳಲ್ಲ; ಒಂದು ವಾಸ್ತವತೆಯಾಗಿದೆ ಎಂದು ಮೋದಿ ಹೇಳಿದರು.

ಹಿರಿಯ ನಟ ಅಮಿತಾಭ್ ಬಚ್ಚನ್ ಧ್ವನಿ ಅನುಕರಣೆ: ಹಿರಿಯ ನಟ ಅಮಿತಾಭ್ ಬಚ್ಚನ್ ಸಹಿತ ಸಿನಿಮಾ ಕ್ಷೇತ್ರದಲ್ಲಿರುವ ಹಲವರ ಧ್ವನಿಗಳ ಅನುಕರಣೆ ಕೂಡ ಫೇಕ್ ಆಡಿಯೋ ಕುರಿತ ಚರ್ಚೆಯನ್ನು ಹುಟ್ಟು ಹಾಕಿದ್ದು ಕಾನೂನು ಕ್ರಮಕ್ಕೆ ಆಗ್ರಹಿಸಲಾಗಿದೆ. ಇಂಥ ಡೀಪ್​ಫೇಕ್​ಗಳ ಪ್ರಸಾರದಿಂದ ಎದುರಿಸ ಬೇಕಾಗುವ ಕಾನೂನು ಪ್ರಕ್ರಿಯೆಗಳ ಬಗ್ಗೆ ಇಲೆಕ್ಟ್ರಾನಿಕ್ಸ್ ಮತ್ತು ಮಾಹಿತಿ ತಂತ್ರಜ್ಞಾನ ಸಚಿವಾಲಯ ಕಳೆದ ವಾರವೇ ಸಾಮಾಜಿಕ ಮಾಧ್ಯಮ ವೇದಿಕೆಗಳಿಗೆ ಸಲಹೆ ರೂಪದ ಎಚ್ಚರಿಕೆ ನೀಡಿತ್ತು. ಇಂಥ ವಿಡಿಯೋಗಳ ಸೃಷ್ಟಿ ಮತ್ತು ಪ್ರಸಾರಕ್ಕಾಗಿ ದಂಡ ಕಟ್ಟಬೇಕಾದೀತೆಂದೂ ಹೇಳಿತ್ತು.

https://www.vijayavani.net/state-president-opposition-leader-posts-will-make-bsy-strong

https://www.vijayavani.net/yatnal-statement-created-more-curiosity-about-development-in-bjp