ಕರೊನಾ ವಿರುದ್ಧ ಹೋರಾಡಲು ಜಂಟಿ ಕಾರ್ಯತಂತ್ರಕ್ಕೆ ಪ್ರಧಾನಿ ಮೋದಿ ಕರೆ

ನವದೆಹಲಿ: ಕರೊನಾ ವಿರುದ್ಧ ಹೋರಾಡಲು ಸಾರ್ಕ್ ರಾಷ್ಟ್ರಗಳ ನಾಯಕರು ಜಂಟಿ ಕಾರ್ಯತಂತ್ರ ರೂಪಿಸಬೇಕು ಎಂದು ಪ್ರಧಾನಿ ಮೋದಿ ಶುಕ್ರವಾರ ಪ್ರಸ್ತಾಪಿಸಿದ್ದಾರೆ. ನಮ್ಮ ನಾಗರಿಕರನ್ನು ಆರೋಗ್ಯವಾಗಿಡುವ ಮಾರ್ಗಗಳನ್ನು ನಾವು ರ್ಚಚಿಸಬೇಕು ಎಂದು ಮೋದಿ ಕರೆ ನೀಡಿದ್ದಾರೆ. ಸಾರ್ಕ್ ಒಕ್ಕೂಟದಲ್ಲಿ ಅಫ್ಘಾನಿಸ್ತಾನ, ಬಾಂಗ್ಲಾದೇಶ, ಭೂತಾನ್, ಭಾರತ, ಮಾಲ್ದೀವ್ಸ್, ನೇಪಾಳ, ಪಾಕಿಸ್ತಾನ ಮತ್ತು ಶ್ರೀಲಂಕಾ ಸದಸ್ಯ ರಾಷ್ಟ್ರಗಳಾಗಿವೆ.

ಅಮೆರಿಕ ವಿರುದ್ಧ ಚೀನಾ ಅನುಮಾನ: ಕರೊನಾ ವೈರಸನ್ನು ಅಮೆರಿಕ ವುಹಾನ್​ವೈರಸ್ ಎಂದು ಕರೆದು ಚೀನಾ ಕೆಂಗಣ್ಣಿಗೆ ಗುರಿಯಾಗಿರುವ ಬೆನ್ನಲ್ಲೇ ಕರೊನಾಗೂ ಅಮೆರಿಕಕ್ಕೂ ಸಂಬಂಧವಿರಬಹುದು ಎಂಬ ಅನುಮಾನವನ್ನು ಚೀನಾ ವ್ಯಕ್ತಪಡಿಸಿದೆ. ಚೀನಾದಲ್ಲಿ ಸಾವಿನ ಸಂಖ್ಯೆ ಹಾಗೂ ಸೋಂಕಿನ ಸಂಖ್ಯೆಯಲ್ಲಿ ಗಣನೀಯವಾಗಿ ಇಳಿಕೆ ಕಂಡುಬರುತ್ತಿದ್ದು, ಕರೊನಾ ಹುಟ್ಟಿನ ಮೂಲ ವುಹಾನ್ ಎಂಬ ಆರೋಪಗಳಿಗೆ ಚೀನಾ ತೀಕ್ಷವಾಗಿ ಪ್ರತಿಕ್ರಿಯಿಸುತ್ತಿದೆ. ಈ ಬಗ್ಗೆ ಅಮೆರಿಕ ವಿರುದ್ಧ ಆರೋಪಿಸಿರುವ ಚೀನಾ ವಿದೇಶಾಂಗ ಸಚಿವಾಲಯದ ವಕ್ತಾರ ಜಚಾವೋ ಲಿಜಿಯಾನ್, ವುಹಾನ್​ಗೆ ಕರೊನಾ ಸೋಂಕನ್ನು ಅಮೆರಿಕ ಸೇನೆ ತಂದಿರಬಹುದು ಎಂದು ಅನುಮಾನ ವ್ಯಕ್ತಪಡಿಸಿ ಟ್ವೀಟ್ ಮಾಡಿದ್ದಾರೆ.

ಭಾರತದಲ್ಲಿ ಸೋಂಕಿತರ ಸಂಖ್ಯೆ 81ಕ್ಕೆ ಏರಿಕೆ: ಬೆಂಗಳೂರು, ನೊಯ್ಡಾದಲ್ಲಿನ ಕಂಪನಿಗಳ ತಲಾ ಓರ್ವ ಉದ್ಯೋಗಿ ಸೇರಿ ಭಾರತದಲ್ಲಿ ಶುಕ್ರವಾರ ಹೊಸದಾಗಿ 7 ಕರೊನಾ ಸೋಂಕಿತ ಪ್ರಕರಣಗಳು ಬೆಳಕಿಗೆ ಬಂದಿದ್ದು, ಸೋಂಕಿತರ ಸಂಖ್ಯೆ 81ಕ್ಕೆ ಏರಿಕೆಯಾಗಿದೆ. ದೆಹಲಿಯಲ್ಲಿ ಸೋಂಕು ಪ್ರಕರಣಗಳು ಹೆಚ್ಚಾಗುತ್ತಿರುವ ಹಿನ್ನೆಲೆ ಕೇಜ್ರಿವಾಲ್ ಸರ್ಕಾರ, ದೆಹಲಿಯಲ್ಲಿನ ಎಲ್ಲ ಶಾಲೆಗಳು, ಸಿನಿಮಾ ಥಿಯೇಟರ್​ಗಳು ಹಾಗೂ ಮಾಲ್​ಗಳನ್ನು ಮಾ.31ರವರೆಗೆ ಸ್ಥಬ್ಧಗೊಳಿಸಿದೆ. ಜೆಎನ್​ಯುು ಕೂಡ ತನ್ನ ಎಲ್ಲ ತರಗತಿಗಳನ್ನು ಸ್ಥಗಿತಗೊಳಿಸಿದೆ.

ಇರಾನ್​ನಿಂದ 2ನೇ ತಂಡ ಆಗಮನ

ಇರಾನ್​ನಲ್ಲಿ ಸಿಲುಕಿದ್ದ ಭಾರತೀಯರಲ್ಲಿ 44 ಜನರ 2ನೇ ತಂಡ ಏರ್ ಇಂಡಿಯಾ ವಿಮಾನದಲ್ಲಿ ಶುಕ್ರವಾರ ಮುಂಬೈಗೆ ಬಂದಿಳಿದಿದೆ. ಇವರನ್ನು ದೆಹಲಿ ಸಮೀಪ ಭಾರತ-ಟಿಬೆಟ್ ಗಡಿ ಪೊಲೀಸರು ನಿರ್ವಿುಸಿರುವ ಶಿಬಿರದಲ್ಲಿಟ್ಟು 14 ದಿನಗಳ ಕಾಲ ನಿಗಾವಹಿಸಲಾಗುತ್ತದೆ ಎಂದು ವಿದೇಶಾಂಗ ಸಚಿವ ಎಸ್. ಜೈಶಂಕರ್ ತಿಳಿಸಿದ್ದಾರೆ. ಕಳೆದ ಶನಿವಾರ 58 ಜನರಿದ್ದ ಮೊದಲ ತಂಡವನ್ನು ಭಾರತ ರಕ್ಷಿಸಿ ಕರೆತಂದಿತ್ತು.

ಕರೊನಾಗೆ 5,000 ಜನರ ಸಾವು

• ವಿಶ್ವದಾದ್ಯಂತ ಮರಣಮೃದಂಗ ಬಾರಿಸುತ್ತಿರುವ ಮಾರಕ ಕರೊನಾ ವೈರಸ್​ಗೆ ಬಲಿಯಾದವರ ಸಂಖ್ಯೆ ಶುಕ್ರವಾರ 5 ಸಾವಿರದ ಗಡಿ ದಾಟಿದೆ. ಕಳೆದ 24 ಗಂಟೆಯಲ್ಲಿ 142 ಜನರು ಸಾವನ್ನಪ್ಪಿದ್ದು, ಮೃತರ ಸಂಖ್ಯೆ 5,116ಕ್ಕೆ ಏರಿಕೆಯಾಗಿದೆ.
• ಕೆನಡಾದ ಪ್ರಧಾನಿ ಜಸ್ಟಿನ್ ಟ್ರುಡೊ ಪತ್ನಿ ಸೋಫಿ ಗ್ರೆಗೊರಿಗೆ ಕರೊನಾ ವೈರಸ್ ಇರುವುದು ದೃಢಪಟ್ಟಿದೆ.
• ಏರ್ ಇಂಡಿಯಾ ಇಟಲಿ, ಫ್ರಾನ್ಸ್, ಜರ್ಮನಿ, ಸ್ಪೇನ್, ದಕ್ಷಿಣ ಕೊರಿಯಾ ಮತ್ತು ಶ್ರೀಲಂಕಾಕ್ಕೆ ಏ.30ರವರೆಗೆ ವಿಮಾನ ಪ್ರಯಾಣ ನಿರ್ಬಂಧಿಸಿದೆ.
• ಕರೊನಾ ಹಿನ್ನೆಲೆ ಟಿಕೆಟ್ ರದ್ದುಗೊಳಿಸಿದಾಗ ಮತ್ತು ಟಿಕೆಟ್ ಮರುನಿಗದಿಗಿರುವ ಶುಲ್ಕವನ್ನು ಮನ್ನಾ ಮಾಡಿ ಅಥವಾ ಇನ್ಯಾವುದೇ ಪ್ರೋತ್ಸಾಹಕ ಕ್ರಮ ಕೈಗೊಳ್ಳಿ ಎಂದು ವಿಮಾನಯಾನ ಸಂಸ್ಥೆಗಳಿಗೆ ಡಿಜಿಸಿಎ ಸೂಚಿಸಿದೆ.
• ಕರೊನಾ ಹಿನ್ನೆಲೆ ಮಾ.29ರವರೆಗೆ ಒಡಿಶಾ ವಿಧಾನಸಭಾ ಅಧಿವೇಶನವನ್ನು ಮುಂದೂಡಲಾಗಿದೆ.
• ಮಾರ್ಕೆ ಎಂಬ ವ್ಯಕ್ತಿ 2013ರಲ್ಲಿ ಕರೊನಾ ಬಗ್ಗೆ ಮಾಡಿದ್ದ ಟ್ವೀಟ್​ವೊಂದು ಜಾಲತಾಣಗಳಲ್ಲಿ ವೈರಲ್ ಆಗುತ್ತಿದೆ. ಆದರೆ ಆತ ಟ್ವಿಟ್ಟರ್ ಹ್ಯಾಕ್ ಮಾಡಿಯೂ ದಿನಾಂಕ ಬದಲಿಸಿರಬಹುದು ಎಂದು ಆರೋಪಿಸಿದ್ದಾರೆ.

https://www.vijayavani.net/rajasthan-doctors-cure-coronavirus-patient-with-hiv-drugs/

https://www.vijayavani.net/raveena-tandon-asks-american-channel-to-do-some-homework-as-they-call-prince-charles-namaste-a-prayer-like-gesture/