ಸ್ಮಾರ್ಟ್‌ಫೋನ್ ಇಲ್ಲದೆ 30 ದಿನ ಬದುಕಿದ ವ್ಯಕ್ತಿ; ನಂತರ ನಡೆದದ್ದು ಏನು ಗೊತ್ತಾ? | Smartphone

ನಾಥನ್ ಕೋವಿ (Nathan Covey) ಎಂಬ ವ್ಯಕ್ತಿ ಇತ್ತೀಚೆಗೆ ಸಾಮಾಜಿಕ ಜಾಲತಾಣ X ನಲ್ಲಿ ತಮ್ಮ ಅನುಭವವನ್ನು ಹಂಚಿಕೊಂಡಿದ್ದಾರೆ. ಒಂದು ತಿಂಗಳ ಕಾಲ ಐಫೋನ್ ಸೇರಿದಂತೆ ಯಾವುದೇ ಆಧುನಿಕ ಸ್ಮಾರ್ಟ್‌ಫೋನ್ ಬಳಸದ ಅವರು, ಅದರ ಬದಲು ಸಾಮಾನ್ಯ ಫ್ಲಿಪ್‌ಫೋನ್ ಬಳಸಿದ್ದರು.

ಸ್ಮಾರ್ಟ್‌ಫೋನ್‌ಗಳು ನಮ್ಮ ದೈನಂದಿನ ಜೀವನದ ಮೇಲೆ ಎಷ್ಟು ಪ್ರಭಾವ ಬೀರಿವೆ ಎಂಬುದನ್ನು ಅರಿಯಲು ಅವರು ಈ ಪ್ರಯೋಗ ಆರಂಭಿಸಿದ್ದರು. ಆರಂಭದಲ್ಲಿ ಸ್ಮಾರ್ಟ್‌ಫೋನ್ ಇಲ್ಲದೆ ಬದುಕುವುದು ತುಂಬಾ ಕಷ್ಟವಾಗಬಹುದು, ಅನೇಕ ಸಮಸ್ಯೆಗಳನ್ನು ಎದುರಿಸಬೇಕಾಗಬಹುದು ಎಂದು ಅವರು ಭಾವಿಸಿದ್ದರು.ಆದರೆ ಒಂದು ತಿಂಗಳ ಅನುಭವದ ಬಳಿಕ ಅವರ ಅಭಿಪ್ರಾಯ ಸಂಪೂರ್ಣ ಬದಲಾಗಿದೆ.

"ಜನರು ಸ್ಮಾರ್ಟ್‌ಫೋನ್‌ಗೆ ನಾನು ಊಹಿಸಿದ್ದಕ್ಕಿಂತಲೂ ಹೆಚ್ಚು ವ್ಯಸನಿಗಳಾಗಿದ್ದಾರೆ. ಫ್ಲಿಪ್‌ಫೋನ್ ಬಳಸಿದಾಗ, ಒಂದು ಕೊಠಡಿಯಲ್ಲಿ ಮೊಬೈಲ್ ನೋಡದೇ ಇರುವ ಏಕೈಕ ವ್ಯಕ್ತಿ ನೀವೇ ಆಗಿರುವುದನ್ನು ಗಮನಿಸುತ್ತೀರಿ" ಎಂದು ಅವರು ಬರೆದುಕೊಂಡಿದ್ದಾರೆ.

ಸ್ಮಾರ್ಟ್‌ಫೋನ್ ಬಳಕೆ ಕಡಿಮೆಯಾದ ನಂತರ ಅವರ ಸಂವಹನ ಶೈಲಿಯಲ್ಲೂ ಬದಲಾವಣೆ ಕಂಡುಬಂದಿದೆ. ಹಿಂದೆ ಸಂದೇಶಗಳ ಮೂಲಕವೇ ಹೆಚ್ಚು ಮಾತನಾಡುತ್ತಿದ್ದ ಅವರು, ಈಗ ಸ್ನೇಹಿತರು ಮತ್ತು ಕುಟುಂಬದವರೊಂದಿಗೆ ನೇರವಾಗಿ ಕರೆ ಮಾಡಿ ಮಾತನಾಡಲು ಆರಂಭಿಸಿದ್ದಾರೆ. "ಅನೇಕ ಸಂದರ್ಭಗಳಲ್ಲಿ ಕರೆ ಮಾಡುವುದು ಸಂದೇಶ ಕಳುಹಿಸುವುದಕ್ಕಿಂತ ಹೆಚ್ಚು ಪರಿಣಾಮಕಾರಿ ಎಂಬುದು ನನಗೆ ಈಗ ಅರಿವಾಗಿದೆ" ಎಂದು ಅವರು ಹೇಳಿದ್ದಾರೆ.

ನಾಥನ್ ಅವರ ಪೋಸ್ಟ್ ಸಾಮಾಜಿಕ ಜಾಲತಾಣಗಳಲ್ಲಿ ಭಾರಿ ಚರ್ಚೆಗೆ ಕಾರಣವಾಗಿದೆ. ಸಾವಿರಾರು ಜನರು ತಮ್ಮ ಅಭಿಪ್ರಾಯಗಳನ್ನು ಹಂಚಿಕೊಂಡಿದ್ದಾರೆ. ಕೆಲವರು, ಬ್ಯಾಂಕಿಂಗ್, ಡಿಜಿಟಲ್ ಪಾವತಿ, QR ಕೋಡ್ ಸ್ಕ್ಯಾನ್, Gmail ಹಾಗೂ Google Calendar ಮುಂತಾದ ಸೇವೆಗಳನ್ನು ಸ್ಮಾರ್ಟ್‌ಫೋನ್ ಇಲ್ಲದೆ ಹೇಗೆ ನಿರ್ವಹಿಸಿದರು ಎಂದು ಪ್ರಶ್ನಿಸಿದ್ದಾರೆ. ಇನ್ನೂ ಕೆಲವರು ತಾವು ಕೂಡ ಇದೇ ರೀತಿಯ ಅನುಭವ ಹೊಂದಿರುವುದಾಗಿ ತಿಳಿಸಿದ್ದಾರೆ.

ಸಾಮಾಜಿಕ ಜಾಲತಾಣದ ಬಳಕೆದಾರರೊಬ್ಬರು, "ರೆಸ್ಟೋರೆಂಟ್‌ಗಳಲ್ಲಿ ಪೋಷಕರು ಮತ್ತು ಮಕ್ಕಳು ಒಂದೇ ಟೇಬಲ್‌ನಲ್ಲಿ ಕುಳಿತಿದ್ದರೂ ತಮ್ಮ ತಮ್ಮ ಮೊಬೈಲ್‌ಗಳಲ್ಲಿ ಮುಳುಗಿರುವುದನ್ನು ನೋಡಿದಾಗ ಬೇಸರವಾಗುತ್ತದೆ" ಎಂದು ಪ್ರತಿಕ್ರಿಯಿಸಿದ್ದಾರೆ. ಮೊಬೈಲ್ ಬಳಕೆಯಿಂದ ಕುಟುಂಬ ಸದಸ್ಯರ ನಡುವಿನ ನೇರ ಸಂವಹನ ಕಡಿಮೆಯಾಗುತ್ತಿರುವ ಬಗ್ಗೆ ಹಲವರು ಕಳವಳ ವ್ಯಕ್ತಪಡಿಸಿದ್ದಾರೆ.

ನಾಥನ್ ಅವರ ಅನುಭವವು ಅನೇಕರಲ್ಲಿ ಸರಳ ಜೀವನಶೈಲಿಯ ಬಗ್ಗೆ ಹೊಸ ಆಸಕ್ತಿ ಮೂಡಿಸಿದೆ. ನೋಟ್‌ಬುಕ್, ಪೆನ್, ಫಿಲ್ಮ್ ಕ್ಯಾಮೆರಾ ಹಾಗೂ ಮೆಕ್ಯಾನಿಕಲ್ ವಾಚ್‌ಗಳಂತಹ ಸಾಂಪ್ರದಾಯಿಕ ವಸ್ತುಗಳ ಬಳಕೆಯತ್ತ ಜನರು ಮತ್ತೆ ಆಕರ್ಷಿತರಾಗುತ್ತಿದ್ದಾರೆ.

ಡಿಜಿಟಲ್ ಸಾಧನಗಳ ಅತಿಯಾದ ಬಳಕೆಯಿಂದ ಗಮನ ಚದುರುವುದು, ನಿದ್ರೆಯ ಗುಣಮಟ್ಟ ಕುಸಿಯುವುದು ಹಾಗೂ ಮಾನಸಿಕ ಒತ್ತಡ ಹೆಚ್ಚಾಗುವುದು ಎಂಬುದನ್ನು ಹಲವು ಅಧ್ಯಯನಗಳು ಸೂಚಿಸಿವೆ. ಈ ಹಿನ್ನೆಲೆಯಲ್ಲಿ ಸ್ಕ್ರೀನ್ ಟೈಮ್ ಕಡಿಮೆ ಮಾಡುವ ಮೂಲಕ ಉತ್ತಮ ಜೀವನಶೈಲಿಯನ್ನು ಅಳವಡಿಸಿಕೊಳ್ಳಬಹುದು ಎಂಬ ಚರ್ಚೆಗೆ ನಾಥನ್ ಕೋವಿ ಅವರ ಒಂದು ತಿಂಗಳ ಪ್ರಯೋಗ ಹೊಸ ಉತ್ತೇಜನ ನೀಡಿದೆ.

ಸ್ಮಾರ್ಟ್‌ಫೋನ್ ಇಲ್ಲದ ಜೀವನ ಸಂಪೂರ್ಣ ಸಾಧ್ಯವೇ ಎಂಬ ಪ್ರಶ್ನೆಗೆ ಅವರ ಅನುಭವವೇ ಉತ್ತರ ನೀಡಿದ್ದು, ತಂತ್ರಜ್ಞಾನವನ್ನು ಬಳಸಬೇಕು ಹೊರತು ಅದರ ಗುಲಾಮರಾಗಬಾರದು ಎಂಬ ಸಂದೇಶವನ್ನೂ ನೀಡಿದೆ,(ಏಜೆನ್ಸೀಸ್​).