ಇ-ಖಾತೆ ಕ್ಯಾತೆಗೆ ಜನ ಸುಸ್ತು; ನೋಂದಣಿ ಪ್ರಕ್ರಿಯೆಗೂ ಗ್ರಹಣ

ಆರ್. ತುಳಸಿಕುಮಾರ್ ಬೆಂಗಳೂರು

ರಾಜಧಾನಿಯ ಆಸ್ತಿ ಮಾಲೀಕರಿಗೆ ಇ-ಖಾತಾ ನೀಡುವ ಸರ್ಕಾರದ ಮಹತ್ವಾಕಾಂಕ್ಷಿ ಯೋಜನೆ ‘ಇ-ಆಸ್ತಿ’ಗೆ ಗ್ರಹಣ ಕವಿದಿದೆ. ಅಗತ್ಯ ಸಿದ್ಧತೆ ಮಾಡಿಕೊಳ್ಳದೆ ಅರೆಬರೆಯಾಗಿ ಯೋಜನೆಯನ್ನು ಅನುಷ್ಠಾನಕ್ಕೆ ತಂದ ಪರಿಣಾಮ, ಸಾರ್ವಜನಿಕರು ಡಿಜಿಟಲ್ ಖಾತಾ ಪಡೆಯಲು ಪರದಾಟ ಅನುಭವಿಸುತ್ತಿದ್ದಾರೆ. ಹೊಸ ತಂತ್ರಾಂಶದಲ್ಲಿನ ದೋಷದಿಂದಾಗಿ ಇ-ಖಾತಾ ಜನರೇಟ್ ಆಗದೆ ಆಸ್ತಿ ನೋಂದಣಿ ಪ್ರಕ್ರಿಯೆ ಆಮೆ ವೇಗದಲ್ಲಿ ನಡೆದಿದೆ.

ನೋಂದಣಿ ಪ್ರಕ್ರಿಯೆ ಯಲ್ಲಿ ನಕಲಿ ಪ್ರಕರಣಗಳನ್ನು ತಡೆಗಟ್ಟಿ ದಾಖಲೆಗಳಿಗೆ ಸುರಕ್ಷತೆ ಹಾಗೂ ಸಾಚಾತನ ತಂದುಕೊಡುವುದು ಸರ್ಕಾರದ ಉದ್ದೇಶವಾಗಿದೆ. ಈ ಕಾರಣದಿಂದಾಗಿ ನೋಂದಣಿ ವೇಳೆ ಇ-ಖಾತಾ ಕಡ್ಡಾಯಗೊಳಿಸಲಾಗಿದೆ. ಆದರೆ, ಬಿಬಿಎಂಪಿ ವ್ಯಾಪ್ತಿಯಲ್ಲಿನ ಆಸ್ತಿಗಳ ಮಾಲೀಕರಿಗೆ ಡಿಜಿಟಲ್ ಖಾತಾ ವರ್ಗಾವಣೆ ಆಗದೆ ಹೊಸದಾಗಿ ನೋಂದಣಿ ಆಗುತ್ತಿಲ್ಲ. ಪಾಲಿಕೆಯ ವಿವಿಧ ಕಂದಾಯ ಕಚೇರಿಗಳಲ್ಲಿ ಹಳೆಯ ದಾಖಲೆಗಳನ್ನು ಪರಾಮಶಿಸಿ ಇ-ಖಾತಾ ಜನರೇಟ್ ಮಾಡಿ ‘ಇ-ಆಸ್ತಿ’ ವ್ಯವಸ್ಥೆಗೆ ಅಳವಡಿಸುವ ಕಾರ್ಯ ಅಪೂರ್ಣವಾಗಿದೆ. ಈ ಒಂದು ಲೋಪ ಇಡೀ ವ್ಯವಸ್ಥೆಯನ್ನು ಬುಡಮೇಲು ಮಾಡಿದೆ.

ಎಲ್ಲಿದೆ ಹೆಲ್ಪ್​ಡೆಸ್ಕ್?: ಇ-ಖಾತಾ ಪಡೆಯುವ ಸಂಬಂಧ ನಾಗರಿಕರು ಎದುರಿಸುತ್ತಿರುವ ಸಮಸ್ಯೆ ನಿವಾರಿಸಲು ಬಿಬಿಎಂಪಿಯ ಎಲ್ಲ ಎಆರ್​ಒ ಕಚೇರಿಗಳಲ್ಲಿ ಹೆಲ್ಪ್​ಡೆಸ್ಕ್ ಆರಂಭಿಸುವ ಭರವಸೆಯನ್ನು ಸರ್ಕಾರ ನೀಡಿತ್ತು. ಇದನ್ನಾಧರಿಸಿ ಪಾಲಿಕೆ ಮುಖ್ಯ ಆಯುಕ್ತರು ಎಲ್ಲ ವಲಯಗಳ ಮುಖ್ಯಸ್ಥರಿಗೆ ಸಂದೇಶ ರವಾನಿಸಿದ್ದರು. ಈ ಸೂಚನೆ ಹೊರಬಿದ್ದು ವಾರ ಕಳೆದರೂ, ಈವರೆಗೂ ಹೆಲ್ಪ್​ಡೆಸ್ಕ್ ಆರಂಭವಾಗಿಲ್ಲ. ಒಂದೇ ದಿನದಲ್ಲಿ ಇ-ಖಾತಾ ನೀಡುವ ವಾಗ್ದಾನವೂ ಈಡೇರಿಲ್ಲ. ಈ ಸೌಲಭ್ಯ ಪಡೆಯಲು ಆಗಮಿಸುವ ನಾಗರಿಕರಿಗೆ ‘ನಾಳೆ ಬಾ . . .’ ಎಂಬ ಮಾಹಿತಿ ನೀಡಿ ವಾಪಸ್ ಕಳುಹಿಸಲಾಗುತ್ತಿದೆ.

‘ಬೆಂಗಳೂರು ಒನ್’ ಸೈಲೆಂಟ್: ಇ-ಖಾತಾ ಪಡೆಯಲು ಆಸ್ತಿ ಮಾಲೀಕರು ಕೆಲವೊಂದು ದಾಖಲೆಗಳನ್ನು ನೀಡಬೇಕಿದೆ. ಅವುಗಳನ್ನು ‘ಬೆಂಗಳೂರು ಒನ್’ ಕೇಂದ್ರಗಳಲ್ಲಿ ವೆಬ್​ಸೈಟ್ ಮೂಲಕ ಅಪ್​ಲೋಡ್ ಮಾಡಿ ಸೌಲಭ್ಯ ಒದಗಿಸುವ ಭರವಸೆ ನೀಡಲಾಗಿತ್ತು. ಇಲ್ಲೂ ಕೂಡ ಪೂರ್ಣ ದಾಖಲೆಗಳನ್ನು ನೀಡಹೋದಲ್ಲಿ, ನಮ್ಮಲ್ಲಿ ಇನ್ನೂ ಆ ಸೌಲಭ್ಯ ಆರಂಭವಾಗಿಲ್ಲ ಎಂದು ಸಿಬ್ಬಂದಿ ಸಮಜಾಯಿಷಿ ನೀಡಿ ವಾಪಸ್ ಕಳುಹಿಸುತ್ತಿದ್ದಾರೆ. ಈ ವಿಚಾರವಾಗಿ ಪಾಲಿಕೆ ಅಧಿಕಾರಿಗಳನ್ನು ಸಂರ್ಪಸಿದರೆ ಅಸಹಾಯಕತೆ ವ್ಯಕ್ತಪಡಿಸುತ್ತಿದ್ದಾರೆಂಬ ಆಕ್ಷೇಪ ಕೇಳಿಬಂದಿದೆ.

ತಂತ್ರಾಂಶ ಮೇಲ್ದರ್ಜೆ ವಿಳಂಬ: ಸಬ್ ರಿಜಿಸ್ಟ್ರಾರ್ ಕಚೇರಿಗಳಲ್ಲಿ ಆಸ್ತಿ ನೋಂದಣಿ ಮಾಡಿಕೊಳ್ಳಲು ಕಾವೇರಿ 2.0 ಹಾಗೂ ಪಾಲಿಕೆಯ ಇ-ಆಸ್ತಿ ಲಿಂಕ್ ಆಗಬೇಕು. ಈ ಪ್ರಕ್ರಿಯೆ ಆಗದಿದ್ದಲ್ಲಿ ಪಾಲಿಕೆ ಸಿದ್ಧಪಡಿಸಿರುವ ದಾಖಲೆಗಳ ಅಪ್​ಲೋಡ್ ಆಗದೆ ಇ-ಖಾತಾ ಜನರೇಟ್ ಆಗದು. ಈ ತಂತ್ರಾಂಶವನ್ನು ಪಾಲಿಕೆಯು ಖಾಸಗಿ ಕಂಪನಿಗೆ ನೀಡಿದ್ದು, ಅದಿನ್ನೂ ಪೂರ್ಣ ಪ್ರಮಾಣದಲ್ಲಿ ಕಾರ್ಯಾಚರಿಸಲು ಕೆಲವೊಂದು ದೋಷಗಳು ಕಾಣಿಸಿಕೊಂಡಿವೆ. ಇವುಗಳನ್ನು ನಿವಾರಿಸುವ ಯತ್ನ ನಡೆದಿದೆ. ಇದಾದ ಬಳಿಕ ಇ-ಖಾತಾ ಜನರೇಟ್ ಮಾಡುವ ವಿಧಾನವನ್ನು ಪಾಲಿಕೆಯ ಕಂದಾಯ ವಿಭಾಗದ ಅಧಿಕಾರಿ/ಸಿಬ್ಬಂದಿಗೆ ತರಬೇತಿ ನೀಡಲಾಗುತ್ತದೆ. ಆ ಬಳಿಕವೇ ಇ-ಖಾತಾ ಪ್ರಕ್ರಿಯೆ ಚಾಲ್ತಿಗೆ ಬಂದು ಜನರಿಗೆ ಸೌಲಭ್ಯ ಸಿಗಲಿದೆ. ಇದಕ್ಕಾಗಿ ಇನ್ನೂ ಒಂದು ತಿಂಗಳು ಕಾಯಬೇಕಿದೆ ಎಂದು ಬಿಬಿಎಂಪಿ ಅಧಿಕಾರಿಯೊಬ್ಬರು ಪ್ರತಿಕ್ರಿಯಿಸಿದ್ದಾರೆ.

ತಾಳೆಯಾಗದ ದಾಖಲೆ: ಹಾಲಿ ಪಾಲಿಕೆಯ ಕಡತದಲ್ಲಿರುವ ಆಸ್ತಿಗಳ ಮಾಹಿತಿಯನ್ನು ಡಿಜಿಟಲ್ ರೂಪಕ್ಕೆ ಬದಲಾಯಿಸಲಾಗುತ್ತಿದೆ. ಈ ವೇಳೆ ಕಣ್ತಪ್ಪಿನಿಂದ ಹಲವು ಲೋಪಗಳು ನುಸುಳಿವೆ. ಇವು ಯಥಾವತ್ತಾಗಿ ಇ-ಖಾತಾ ದಾಖಲೆಯಲ್ಲಿ ನಮೂದಾಗಿ ಮತ್ತೆ ತಪು್ಪ ಪುನರಾವರ್ತನೆಯಾಗುತ್ತಿವೆ. ಉದಾಹರಣೆಗೆ ಆಸ್ತಿಯ ಮಾಲೀಕರ ಹೆಸರಿನ ಅಕ್ಷರಗಳು ತಪ್ಪಾಗಿ ನಮೂದಾಗಿವೆ. ಸ್ವತ್ತಿನ ವಿಳಾಸ, ಅಳತೆಯಲ್ಲಿ ವ್ಯತ್ಯಾಸವಾಗಿವೆ. ವಿದ್ಯುತ್ ಬಿಲ್​ನ 10 ಅಂಕಿಯ ಸಂಖ್ಯೆಯನ್ನು ಒಂದಕ್ಕಿಂತ ಹೆಚ್ಚು ಬಾಡಿಗೆ ಮನೆಗಳಲ್ಲಿದ್ದಲ್ಲಿ ಆರ್.ಆರ್. ನಂಬರ್ ನಮೂದಿಗೆ ತಾಂತ್ರಿಕ ಅಡ್ಡಿ ಎದುರಾಗಿದೆ.

ಜನರಿಗೆ ಏನೆಲ್ಲ ಸಮಸ್ಯೆ?

• ಹೊಸದಾಗಿ ಆಸ್ತಿ ಖರೀದಿಸುವವರು ಸ್ವತ್ತುದಾರರಾಗಲು ವಿಳಂಬ
• ಆಸ್ತಿ ಮಾರಾಟಗಾರರು ಹಣ ಪಡೆದು ನೋಂದಣಿ ಮಾಡಿಕೊಡುತ್ತಿಲ್ಲವೆಂಬ ಆರೋಪ
• ಸಹೋದರರು ಆಸ್ತಿ ಪಾಲು ಮಾಡಿಕೊಂಡು ನೋಂದಣಿ ಮಾಡಿಕೊಳ್ಳಲಾಗುತ್ತಿಲ್ಲ
• ಮಕ್ಕಳ ಹೆಸರಿನಲ್ಲಿ ಆಸ್ತಿ ಖರೀದಿಸಿ ನೋಂದಣಿ ಮಾಡಲು ವಿಳಂಬ

ಸಬ್ ರಿಜಿಸ್ಟ್ರಾರ್ ಕಚೇರಿ ಕೆಲಸ: ವಿಲ್, ನ್ಯಾಸ ಪತ್ರ (ಟ್ರಸ್ಟ್ ಡೀಡ್), ಮದುವೆ ನೋಂದಣಿ, ಋಣಭಾರ ಪ್ರಮಾಣಪತ್ರ, ನಕಲು ಪ್ರತಿಗಳು, ಜಿಪಿಎ.

ನಮ್ಮ ಫ್ಲಾ ್ಯ್ ಒಂದನ್ನು ಖರೀದಿಸಲು ಅಡ್ವಾನ್ಸ್ ನೀಡಿ ತಿಂಗಳಾಗಿದೆ. ಖರೀದಿದಾರರಿಗೆ ಬ್ಯಾಂಕ್​ನಿಂದ ಸಾಲ ಮಂಜೂರಾಗಿ 2 ತಿಂಗಳಾಗಿದ್ದು, ಸಿಂಗಪುರದಿಂದ ಇಂದು ಬೆಂಗಳೂರಿಗೆ ಬರಲಿದ್ದಾರೆ. ಇ-ಖಾತಾಗೆ ಅರ್ಜಿ ಹಾಕಿ 15 ದಿನಗಳೇ ಕಳೆದರೂ ಈವರೆಗೂ ಸಿಕ್ಕಿಲ್ಲ. ಇನ್ನೂ ಕೆಲ ದಿನ ಕಾಯಿಸಿ ಎಂದು ಪಾಲಿಕೆ ಅಧಿಕಾರಿಗಳು ಹೇಳುತ್ತಿದ್ದಾರೆ. ಫ್ಲಾ ್ಯ್ ನೋಂದಣಿ ಆಗದೆ ಖರೀದಿದಾರರು ವಾಪಸ್ ಹೋಗುವುದಿಲ್ಲವೆಂದು ಹೇಳಿದರೆ ನಾನೇನು ಮಾಡಲಿ.

| ಜಾರ್ಜ್ ಸ್ಟೀಫನ್ ಆಸ್ತಿ ಮಾಲೀಕ, ಹೆಬ್ಬಾಳ ಕೆಂಪಾಪುರ

ಆಸ್ತಿಗಳಿಗೆ ಇ-ಖಾತಾ ನೀಡುವ ವಿಧಾನ ಸರಿ ಇದೆ. ಈ ವ್ಯವಸ್ಥೆಯನ್ನು ಮೊದಲೇ ಪೂರ್ಣಗೊಳಿಸಿ ಸಾಧಕ-ಬಾಧಕಗಳನ್ನು ಪರಾಮಶಿಸಿ ಅನುಷ್ಠಾನಕ್ಕೆ ತರಬೇಕಿತ್ತು. ಆದರೆ, ಆತುರವಾಗಿ ಜಾರಿ ಮಾಡಿದ ಕಾರಣ ಜನರು ಬವಣೆಗೆ ಒಳಗಾಗಿದ್ದಾರೆ. ಪಾಲಿಕೆಯವರು ಇ-ಖಾತಾ ಜನರೇಟ್ ಮಾಡಿಕೊಳ್ಳಲು ವಿಫಲವಾಗಿರುವ ಕಾರಣ ನೋಂದಣಿ ಪ್ರಕ್ರಿಯೆ ಸ್ಥಗಿತಗೊಂಡು ಸರ್ಕಾರಕ್ಕೆ ನಷ್ಟವಾಗಿದೆ.

| ಅಮರೇಶ್ ವ್ಯವಸ್ಥಾಪಕ ಟ್ರಸ್ಟಿ, ಮಾಹಿತಿಹಕ್ಕು ಅಧ್ಯಯನ ಕೇಂದ್ರ

https://www.vijayavani.net/rcb-retain-list-out-with-a-puzzle-twist

https://www.vijayavani.net/actor-darshan-released-from-bellary-jail-do-you-know-what-to-do-first-when-you-come-to-bangalore