ನಾನು ಶೀಲಾ ದೀಕ್ಷಿತ್​ ಅವರನ್ನು ದೂಷಿಸಿಲ್ಲ..ನನ್ನ ಮಾತುಗಳನ್ನು ತಪ್ಪಾಗಿ ಅರ್ಥೈಸಲಾಗಿದೆ: ಪಿ.ಸಿ.ಚಾಕೋ ಸ್ಪಷ್ಟನೆ

ನವದೆಹಲಿ: ಕಾಂಗ್ರೆಸ್​ ಅವನತಿ ಶುರುವಾಗಿದ್ದು 2013ರಲ್ಲಿ. ಆಗ ಶೀಲಾ ದೀಕ್ಷಿತ್​ ಅವರೇ ಮುಖ್ಯಮಂತ್ರಿಯಾಗಿದ್ದರು ಎಂದು ಹೇಳುವ ಮೂಲಕ ಪಕ್ಷದ ವಲಯದಲ್ಲಿಯೇ ಅಸಮಾಧಾನ ಮೂಡಿಸಿದ್ದ ಕಾಂಗ್ರೆಸ್​ ನಾಯಕ ಪಿಸಿ ಚಾಕೋ ಇದೀಗ ತಮ್ಮ ಹೇಳಿಕೆಗೆ ಸ್ಪಷ್ಟನೆ ನೀಡಿದ್ದಾರೆ.

ನಾನು ಶೀಲಾ ದೀಕ್ಷಿತ್​ ಹೆಸರನ್ನು ಹೇಳಿದ್ದನ್ನು ತಪ್ಪಾಗಿ ಅರ್ಥೈಸಲಾಗಿದೆ. ಶೀಲಾ ಜಿ ಅವರ ಆಡಳಿತದಲ್ಲಿಯೇ ಕಾಂಗ್ರೆಸ್​ ಅವನತಿ ಶುರುವಾಗಿತ್ತು ಎಂದು ನಾನು ಹೇಳಲಿಲ್ಲ. 2013, 2014, 2015ರಲ್ಲಿ ಸೋತೆವು. 2017 ರ ಮುನ್ಸಿಪಲ್​ ಕಾರ್ಪೋರೇಶನ್​ ಚುನಾವಣೆಯಲ್ಲೂ ನಮಗೆ ಸೋಲಾಯಿತು ಎಂದು ಹೇಳಿದರು.

ನನ್ನ ಮಾತುಗಳು ತಪ್ಪಾಗಿ ಬಿಂಬಿತವಾಗಲು ಯಾರು ಕಾರಣ ಎಂಬುದು ನಮಗೆ ಗೊತ್ತು. ನಾನು ಶೀಲಾ ದೀಕ್ಷಿತ್​ ಅವರನ್ನು ದೂಷಿಸಿದ್ದೇನೆ ಎಂದು ಉದ್ದೇಶಪೂರ್ವಕವಾಗಿಯೇ ಆರೋಪ ಮಾಡಲಾಗುತ್ತಿದೆ. ಇದು ಮೊದಲಲ್ಲ. ಹಿಂದೆ ಕೂಡ ಇದನ್ನೇ ಮಾಡಲಾಗಿತ್ತು ಎಂದು ತಿಳಿಸಿದರು.

ಇಂದು ಬೆಳಗ್ಗೆ ರಾಜೀನಾಮೆ ನೀಡುವ ವೇಳೆ ಪ್ರತಿಕ್ರಿಯೆ ನೀಡಿದ್ದ ಚಾಕೋ ಅವರು, ಕಾಂಗ್ರೆಸ್​ ಸೋಲು ಪ್ರಾರಂಭವಾಗಿದ್ದು ಶೀಲಾ ದೀಕ್ಷಿತ್​ ಆಡಳಿತದಲ್ಲಿ ಎಂಬ ಅರ್ಥ ಬರುವಂತೆ ಮಾತನಾಡಿದ್ದರು. (ಏಜೆನ್ಸೀಸ್​)

https://www.vijayavani.net/ongress-leader-blames-sheila-dikshit/