ಯಾವ ಜೀವದ ಪಾಕವು ಯಾವ ಅನುಭವದಿಂದ ಆಗುತ್ತದೆಯೋ, ಯಾವ ಪಾಪವು ಯಾವ ಪುಣ್ಯದಿಂದ ಕ್ಷಯವಾಗುತ್ತದೋ ಹೇಳುವುದಕ್ಕಿಲ್ಲ. ಬಿಸಿಯಾಗದೆ ಪಕ್ವವಾಗುವ ಜೀವವು ಈ ಇಳೆಯಲ್ಲಿ ಇಲ್ಲ. ಹಾಗಾಗಿ ನೋವುಗಳೆಲ್ಲವೂ ಅಗ್ನಿಯಂತೆ ಪರಿಷ್ಕರಿಸುತ್ತದೆ ಎನ್ನುತ್ತದೆ ಈ ಕಗ್ಗ. ಬದುಕಿನಲ್ಲಿ ಬಾಲ್ಯ, ಯೌವ್ವನ, ನಡು ಹರೆಯ ಮತ್ತು ವೃದ್ಧಾವಸ್ಥೆಗಳು ಎಲ್ಲರಿಗೂ ಸರಿಸಮಾನ. ಪ್ರತಿದಿನವೂ ನವನವೀನ ಅನುಭವಗಳನ್ನು ಪಡೆಯುತ್ತಾ, ಅರಿವನ್ನು ವಿಸ್ತರಿಸಿಕೊಳ್ಳುತ್ತಾ ಮುನ್ನಡೆಯುವುದು ಬಾಳಿನ ರೀತಿ. ಈ ಚಲನೆಯಲ್ಲಿ ವ್ಯಕ್ತಿಯು ಎದುರಿಸುವ ಸವಾಲುಗಳು, ಮತಿ-ಮನಸ್ಸುಗಳಲ್ಲಾಗುವ ಮಥನ, ಭಾವ ತಲ್ಲಣಗಳು ವ್ಯಕ್ತಿಯನ್ನು ಒಮ್ಮೆ ಕಂಗೆಡಿಸಿದರೂ ವಾಸ್ತವವನ್ನು ಅರಿತುಕೊಳ್ಳಲು ಸಹಾಯ ಮಾಡುತ್ತವೆ. ಮನುಷ್ಯನು ಸೋತಾಗಲೆ ತಾನೆ ಆತ್ಮಾವಲೋಕನವನ್ನು ಮಾಡಿಕೊಳ್ಳುವುದು? ಅಪಮಾನಿತನಾದಾಗಲೆ ಸೆಟೆದು ನಿಲ್ಲುವ ಛಲ ಹುಟ್ಟುವುದು.
