ಏಪ್ರಿಲ್​ನಲ್ಲಿ ಮೇಲ್ಮನೆ ಫೈಟ್: ವೈಎಸ್​ಆರ್​ಸಿ, ಟಿಎಂಸಿ ಸ್ಥಾನ ಹೆಚ್ಚಳ ಸಾಧ್ಯತೆ

245 ಸದಸ್ಯ ಬಲದ ರಾಜ್ಯಸಭೆಯಲ್ಲಿ ಬಿಜೆಪಿ 82 ಸದಸ್ಯರನ್ನು ಹೊಂದಿದೆ. ಬಿಜೆಡಿ ಮತ್ತು ವೈಎಸ್​ಆರ್​ಸಿಯಂತಹ ಪಕ್ಷಗಳ ಬೆಂಬಲ ಪಡೆದು ಮಸೂದೆಗಳನ್ನು ಅಂಗೀಕರಿಸುತ್ತಿದೆ. ಏಪ್ರಿಲ್​ನಲ್ಲಿ ಬಿಜೆಪಿಯ 18 ಸದಸ್ಯರು ನಿವೃತ್ತಿ ಹೊಂದುತ್ತಿದ್ದಾರೆ. ಇವರಲ್ಲಿ 13 ಸ್ಥಾನಗಳು ಬಿಜೆಪಿಗೆ ಲಭಿಸಬಹುದು ಎಂದು ಅಂದಾಜಿಸಲಾಗಿದೆ. 46 ಸಂಖ್ಯಾಬಲ ಹೊಂದಿರುವ ಕಾಂಗ್ರೆಸ್​ನ 11 ಸದಸ್ಯರು ನಿವೃತ್ತಿ ಹೊಂದಲಿದ್ದು, ಅದು 10 ಸ್ಥಾನಗಳನ್ನು ಗೆಲ್ಲುವ ನಿರೀಕ್ಷೆ ಇದೆ. ಒಡಿಶಾದ ಮೂರು ಸ್ಥಾನಗಳಲ್ಲಿ ಬಿಜೆಡಿಗೆ ಎರಡು ಮತ್ತು ಬಿಜೆಪಿಗೆ ಒಂದು ಸ್ಥಾನ ಸಿಗಲಿದೆ. ಆಂಧ್ರಪ್ರದೇಶದ ಎಲ್ಲ ನಾಲ್ಕು ಸ್ಥಾನಗಳನ್ನೂ ವೈಎಸ್​ಆರ್ ಕಾಂಗ್ರೆಸ್ ಬಾಚಿಕೊಳ್ಳಲಿದೆ. ಹಿಮಾಚಲ ಮತ್ತು ಹರಿಯಾಣದಿಂದ ಬಿಜೆಪಿಗೆ ತಲಾ ಒಂದು ಸ್ಥಾನ ಸಿಗಲಿದೆ ಎನ್ನಲಾಗಿದೆ. ಶಿವಸೇನೆ ಜತೆ ಮೈತ್ರಿ ಮುರಿದು ಬಿದ್ದಿದ್ದರಿಂದ ಸರ್ಕಾರ ರಚಿಸಲು ವಿಫಲವಾಗಿರುವ ಬಿಜೆಪಿ ಮಹಾರಾಷ್ಟ್ರದಿಂದ ಇಬ್ಬರು ಸದಸ್ಯರನ್ನು ರಾಜ್ಯಸಭೆಗೆ ಕಳುಹಿಸುವ ನಿರೀಕ್ಷೆಯಲ್ಲಿದೆ. ಶಿವಸೇನೆ ಕೂಡ ತನ್ನ ಮೈತ್ರಿ ಪಕ್ಷಗಳಾದ ಎನ್​ಸಿಪಿ, ಕಾಂಗ್ರೆಸ್​ನ ಬೆಂಬಲ ಪಡೆದು ಒಬ್ಬರನ್ನು ರಾಜ್ಯಸಭೆಗೆ ಕಳುಹಿಸುವ ಸಾಧ್ಯತೆ ಇದೆ. ಎನ್​ಸಿಪಿ, ಕಾಂಗ್ರೆಸ್ ಮಹಾರಾಷ್ಟ್ರದಲ್ಲಿ ಕ್ರಮವಾಗಿ 2 ಮತ್ತು 1 ಸ್ಥಾನಗಳನ್ನು ಪಡೆಯಲಿವೆ.